सुदूरपश्चिम र जनकपुरको लगातार जित

काठमाडौं । नेपाल प्रिमियर लिग (एनपिएल)मा बिहीबार भएका दुई खेलमा सुदूरपश्चिम रोयल्स र जनकपुर बोल्ट्स विजयी भएका छन् । त्रिवि क्रिकेट मैदानमा भएको पहिलो खेलमा जनकपुर बोल्ट्सले पोखरा एभेन्जर्सलाई सात विकेटले हराएको हो भने दोस्रो खेलमा सुदूरपश्चिम रोयल्सले काठमाडौं गोर्खाजलाई ७३ रनले हरायो । पोखरालाई हराउँदै जनकपुरले जितको हृयाट्रिक गरेको छ । जनकपुरले एनपिएलमा लगातार तेस्रो जित हात पारेको छ भने सुदूरपश्चिमको यो दोस्रो जित हो । काठमाडौंको यो तेस्रो हार हो भने पोखराको दोस्रो हार हो ।

बिहीबार कीर्तिपुरस्थित त्रिवि क्रिकेट मैदानमा सम्पन्न खेलमा सुदूरपश्चिमले प्रस्तुत गरेको १६८ रनको लक्ष्य पछ्याउने क्रममा काठमाडौंले १५.५ ओभरमा सबै विकेट गुमाएर ९४ रनमात्रै बनाउन सक्यो । काठमाडौंका स्टेफन एस्किनाजीले सर्वाधिक ३७ रन बनाउनुभयो । उहाँले ३३ बलमा पाँच चौका र एक छक्का प्रहार गर्नुभएको थियो । सुमित महर्जनले १० बलमा दुई चौकासहित १४ रन बनाउनुभयो भने भीम सार्की र गेरहार्ड इरास्मसले समान १० रन बनाउनुभयो । यसबाहेक काठमाडौंका अन्य ब्याटरले दोहोरो अंकको रन जोडन सकेनन् ।

काठमाडौंलाई सस्तैमा समेट्न सुदूरपश्चिमका नरेन साउदले पाँच विकेट लिनुभयो । ३.५ ओभर बलिङ गर्नुभएका नरेनले १९ रनमात्र खर्चिएर काठमाडौंका गेरहार्ड इरास्मस, एस्किनाजी, राशिद खान, करण केसी र साहब आलमलाई पभेलियनको दिशा देखाउनुभएको थियो । यस्तै, अविनाश बोहराले दुई विकेट लिनुभयो । तीन ओभर बलिङ गर्नुभएका अविनाशले एक मेडन फ्याँक्दै १२ रनमात्र खर्चिनुभयो । ब्रान्डन म्याकमुलम र सैफ जैबले समान एक-एक विकेट लिनुभयो ।

त्यसअघि टस हारेर ब्याटिङमा आएको सुदूरपश्चिमले निर्धारित २० ओभरमा ६ विकेट गुमाएर १६७ रनको योगफल खडा गरेको थियो । सुदूरपश्चिमका ब्रान्डन म्याकमुलमले ५३ रन बनाउनुभयो । उहाँले ३६ बलमा तीन चौका र चार छक्का प्रहार गर्नुभएको थियोे । म्याकमुलमलाई १२औँ ओभरको अन्तिम बलमा गेरहार्ड इरास्मसले साहब आलमबाट क्याच गराउनुभएको थियो ।

ओपनर विनोद भण्डारीले २८ बलमा दुई चौका र दुई छक्कासहित ३५ रन बनाउनुभयो । १७-१ को स्थितिबाट विनोद र म्याकमुलमले ११४ रनको शतकीय साझेदारी गर्दै सुदूरपश्चिमलाई १०३-२ को बलियो स्थितिसम्म पुर्‍याउनुभएको थियो ।

विनोदलाई साहबले १३औँ ओभरको पहिलो बलमा एलबिडब्लूको धरापमा पार्नुभएको थियो । यस्तै, कप्तान दीपेन्द्रसिंह ऐरीले ४३ रन जोड्नुभयो । १९औँ ओभरको चौथो बलमा आउट हुनुभएका दीपेन्द्रले २५ बलमा तीन चौका र दुई छक्का प्रहार गर्नुभएको थियो । उहाँलाई करण केसीले माइकल लेभिटनबाट क्याच गराउनुभएको थियो ।

ADVERTISEMENT

ओपनर सैब जैबले ११ रन जोड्नुभयो । नौ बलमा एक छक्का प्रहार गर्नुभएका जैबलाई दोस्रो ओभरको अन्तिम बलमा राशिद खानले बोल्ड गर्नुभएको थियो । रोहन मुस्ताफालाई राशिदले नै १६औँ ओभरको अन्तिम बलमा बोल्ड गर्नुभएको थियो । उहाँले मात्र चार रन बनाउनुभएको थियो । १७औँ ओभरको चौथो बलमा रनआउट हुनुअघि आरिफ सेखले तीन बलमा तीन रन बनाउनुभएको थियो ।

काठमाडौंका राशिद खानले दुई विकेट लिँदा करण केसी, साहब आलम र गेरहार्ड इरास्मसले समान एक-एक विकेट लिनुभएको थियो ।

उत्कृष्ट लयमा जनकपुर
नेपाल प्रिमियर लिग (एनपिएल) को पहिलो सिजनमा हालसम्म जनकपुर बोल्ट्स उत्कृष्ट लयमा देखिएको छ । टिममा देखिएको सन्तुलन खेलाडीले मैदानमा देखाइरहेका छन् । जनकपुर बोल्ट्सले बिहीबारको खेलसँगै लगातार तेस्रो जित हात पारेको छ । बिहीबार दिउँसो त्रिवि क्रिकेट मैदानमा भएको पहिलो खेलमा पोखरा एभेन्जर्सलाई सात विकेटले हराउँदै जनकपुरले जितको हृयाट्रिक गरेको हो । पोखरा भने लगातार दोस्रो खेलमा पराजित भयो । पोखराले दिएको १३९ रनको लक्ष्य जनकपुरले १७.१ ओभरमा तीन विकेट गुमाएर पूरा गर्‍यो ।

जनकपुरको जितमा लाहिरू मालन्थाले ४५ रन बनाउनुभयो । ३२ बल खेल्नुभएका उहाँले आठ चौका प्रहार गर्नुभयो । यस्तै, जेम्स निशमले ४० रन बनाउनुभयो । २० बल खेल्नुभएका उहाँले पाँच छक्का प्रहार गर्नुभयो । यस्तै, आसिफ शेखले ३३ बलमा ३३ र हर्स ठाकेरले १४ बलमा १३ रन बनाउनुभयो । शेखले तीन चौका प्रहार गर्दा ठाकेरले एक चौका हान्नुभयो । जनकपुरविरुद्ध फितलो बनेको पोखराबाट बलिङमा विपिन खत्री, माइकल लियस्क र कुशल भुर्तेलले समान एक/एक विकेट लिनुभयो ।

यसअघि टस हारेर ब्याटिङको निम्तो पाएको पोखराले निर्धारित २० ओभरमा ७ विकेट गुमाएर १३८ रन बनाएको थियो । पोखराका ब्याटर दोस्रो खेलमा पनि चल्न सकेनन् । पोखराका लागि म्याट क्रिच्लेले सर्वाधिक ३५ रन बनाउनुभयो । ३० बल खेल्नुभएका उहाँले तीन चौका र एक छक्का प्रहार गर्नुभयो । माइकल लिस्कले १३ बलमा तीन छक्कासहित २५ रन बनाउनुभयो ।

ओपनरद्वय दिनेश खरेल १० र एन्ड्रयु गाउसले २० रन बनाउनुभएको थियो । १६ बल खेल्नुभएका गाउसले तीन चौका र एक छक्का प्रहार गर्नुभयो । कप्तान कुशल भुर्तेलले फेरि निराश पार्नुभयो । उहाँलाई ललित राजवंशीले स्टम्प आउट गर्नुभयो । दीलिप नाथ ११ र रामोन रिफर १७ रनमा आउट हुनुभयो । ललितले चार ओभरमा ३१ रन खर्चेर तीन विकेट लिनुभयो । जिम्मी निशमले चार ओभरमा २९ रन खर्चेर दुई विकेट लिनुभयो । पोखरा पहिलो खेलमा चितवन राइनोजसँग ८७ रनले पराजित भएको थियो । पहिलो दुई खेल जितेको जनकपुर अंक तालिकाको शीर्ष स्थानमा छ । जनकपुरले पहिलो खेलमा विराटनगर किंग्स र दोस्रो खेलमा कर्णाली याक्सलाई समान आठ विकेटले हराएको थियो । पोखराले यसअघि चितवन राइनोजसँग ८७ रनको हार बेहोरेको थियो ।