बार्सिलोना । ला लिगा फुटबलमा बार्सिलोना बराबरीमा रोकिएको छ । शनिबार राती सम्पन्न खेलमा बार्सिलोना सेल्टा भिगोसँग २-२ गोलको बराबरीमा रोकिएको हो । अन्तिम समयमा अग्रता जोगाउन नसक्दा बार्सिलोना बराबरीमा रोकिएको हो । दुई खेल कम खेलेको बार्सिलोना तेस्रो स्थानको रियल मड्रिडभन्दा सात अंकले अगाडि छ ।
बार्सिलोनाका तर्फबाट राफिन्हा र रोबर्ट लेवान्डोस्कीले गोल गर्नुभयो । खेलको १५औँ मिनेटमा कोउन्डेको लामो पासमा राफिन्हाले गोल गर्दै बार्सिलोनालाई सुरुवाती अग्रता दिलाउनुभएको थियो । ६१औँ मिनेटमा राफिन्हाको पासमा लेवान्डोस्कीले अग्रता दोब्बर पार्नुभयो । लेवान्डोस्कीले लिगका १४ खेलमा १५ गोल गर्नुभएको छ ।
तर, ८१औँ मिनेटमा बार्सिलोनाका डिफेन्सिभ मिडफिल्डर मार्क कासाडो दोस्रो पहेंलो कार्ड खाँदै मैदानबाट बाहिरिएपछि खेलमा नाटकीय परिवर्तन भएको थियो । त्यसको तीन मिनेटपछि जुल्स कोउन्डेले गोलकिपरलाई ब्याक पास दिन ढिला गर्दा अल्फोन गोन्जालेजले बल खोस्दै गोल गर्नुभयो ।
ADVERTISEMENT
बालाइडोस स्टेडियममा भएको खेलमा हृयुगो अल्भारेजले ८६औँ मिनेटमा बराबरी गोल फर्काउनुभयो । आफ्नो टोलीले पासिङ खेललाई स्थापित गर्न नसकेको र २-० ले अगाडि रहँदा पनि गल्ती गरिरहेकाले बराबरी खेल्नुपरेको बार्सिलोनाका प्रशिक्षक हृयान्सी फ्लिकले बताउनुभयो । ‘अन्तिम १० मिनेटमात्र होइन, पूरै खेल निकै खराब खेल्यौँ । पासिङ खराब थियो । हामीले धेरै गल्ती गर्यौँ,’ उहाँले भन्नुभयो । लमिन यमल दाहिने खुट्टाको चोटका कारण अनुपस्थित भएपछि बार्सिलोना लगातार दोस्रो खेलमा जितविहीन भएको हो । यमलबिना नै रियल सोसिडाडसँग बार्सिलोना १-० ले पराजित भएको थियो ।
बराबरीपछि पनि शीर्ष स्थानमा कायमै रहेको बार्सिलोना १४ खेलमा ३४ अंकमा छ । दुई खेल कम खेलेको रियल मड्रिडसँग बार्सिलोनाको सात अंकको अग्रता रहेको छ । सेल्टा भने समान खेलमा १८ अंकका साथ ११औँ स्थानमा छ । एजेन्सी ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
देशका अधिकांश जिल्लामा वर्षा, सतर्कता