सुदूरपश्चिम रोयल्समा पश्चिमेलीको बर्चस्व

काठमाडौं । नेपाल प्रिमियर क्रिकेट लिग (एनपिएल)मा सुदूरपश्चिम प्रदेशको प्रतिनिधित्व गर्ने टोली सुदूरपश्चिम रोयल्समा प्रायः सुदूरपश्चिमका खेलाडीको बर्चस्व देखिएको छ । नेपाली क्रिकेट इतिहासमा अलराउन्डतर्फ विश्व क्रिकेट वरीयतामा दोस्रो स्थानमा रहनुभएका दीपेन्द्रसिंह ऐरी सुदूरपश्चिम रोयल्सको भरोसायुक्त खेलाडी हुनुहुन्छ । सुदूरपश्चिममा जन्मिनुभएका २४ वर्षीय ऐरी टोलीको मार्की खेलाडी हुनुहुन्छ । सुदूरपश्चिममा आइकोनिकसहित सात खेलाडी सुदूरपश्चिम क्षेत्रका खेलाडी छन् ।

मार्की खेलाडी ऐरीसहित विनोद भण्डारी, नरेश बुढाएर, नरेन साउद, खड्ग बोहरा र भोजराज भट्ट सुदूरपश्चिम क्षेत्रका हुनुहुन्छ । यस्तै बलर अविनाश बोहरा भने कर्णाली प्रदेशका हुनुहुन्छ । यसबाहेक आरिफ शेख पर्सा, अर्जुन कुमाल गुल्मी, इशान पाण्डे र अमित श्रेष्ठ काठमाडौंका खेलाडी हुनुहुन्छ ।

ऐरी, आरिफ, अविनाश बोहरा, विनोद भण्डारी, इशान पाण्डे, नरेश बुढाएरले भने राष्ट्रिय टोलीबाट नेपालको प्रतिनिधित्व गर्दै विभिन्न अन्तर्राष्ट्रिय प्रतियोगिता खेलिसक्नुभएको छ । सुदूरपश्चिमले चार विदेशी खेलाडीलाई अनुबन्ध गरेको छ । चार विदेशी खेलाडीमध्ये तीनजना ब्याटिङ अलराउन्डर छन् भने एकजना बलिङ अलराउन्डर छन् । नेपालमा आएर अन्तर्राष्ट्रिय प्रतियोगिता खेलिसकेका संयुक्त अरब इमिरेट्स (युएई)का रोहन मुस्ताफा र स्कटल्याण्डका ब्राण्डन म्याकमुलेन हुनुहुन्छ ।

त्यसैगरी इंग्ल्याण्डका सैफ अली जैब र चेन्नई सुपर किंसबाट आइपिएल खेल्नुभएका न्युजिल्याण्डका बलर स्कट कुगेलेइन सुदूरपश्चिम रोयल्समा आबद्ध हुनुहुन्छ । टोलीका दुई युवा खेलाडी अर्जुन कुमाल र नरेन साउदले भने आफ्नो टोलीको उद्घाटन खेल गुमाउनुहुनेछ । उहाँहरू नेपाली यू–१९ टोलीबाट एसिसी एसिया कप खेल्न युएई जाँदै हुनुहुन्छ ।

सुदूरपश्चिम रोयल्सको मुख्य प्रशिक्षकमा राष्ट्रिय टोलीमा पनि प्रशिक्षकको भूमिका निर्वाह गरिसक्नुभएका जगत् टमाटा हुनुहुन्छ । सुदूरपश्चिममा जन्मनुभएका ६० वर्षीय टमाटाले आफ्नो टोलीले जितका लागि खेल्ने बताउनुभयो । नेपाली टोलीका सफल प्रशिक्षकका रूपमा परिचित उहाँले एनपिएलमा आफूले सहभागिता जनाउन पाउँदा खुसी लागेको बताउँदै आफ्नो टोलीले सय प्रतिशत दिएर खेल्ने उल्लेख गर्नुभयो ।

ADVERTISEMENT

प्रशिक्षक टमाटाले आफ्नो टोलीको तयारी उल्लेख्य रहेको भन्दै सुदूरपश्चिम र नेपाली क्रिकेटलाई माया गर्न सबैलाई आग्रहसमेत गर्नुभयो । यही नोभेम्बर २७ देखि ३० तारिखसम्म सबै विदेशी खेलाडी नेपाल आइपुग्ने उहाँले जानकारी दिनुभयो । टमाटासँग राष्ट्रिय क्रिकेट टिम पुरुष, महिला सिनियर टोलीदेखि उमेर समूहको टोलीमा प्रशिक्षको भूमिका निर्वाह गरिसक्नुभएको अनुभव छ । सुदूरपश्चिम रोयल्सको ओनर भने एम्पायर स्पोर्ट्स रहेको छ । त्यस्तै मेन्टरमा अष्ट्रेलियाका ब्राड हज हुनुहुन्छ । उहाँ सोमबार नेपाल आइपुग्नुभएको छ । टोलीको ब्राण्ड एम्बासडरमा भने ओलम्पियन खेलाडी दीपक विष्ट हुनुहुन्छ ।

नेपाल क्रिकेट संघ (क्यान)को आयोजनामा हुन लागेको लिग हालसम्मकै सबैभन्दा ठूलो घरेलु प्रतियोगिता हो । प्रतियोगितामा आठ टोलीको सहभागिता रहनेछ । प्रतियोगिताको उद्घाटन खेल मंसिर १५ गते विराटनगर किंस र जनकपुर बोल्ट्सबीच प्रतिस्पर्धा हुनेछ । त्यस्तै सुदूरपश्चिमले मंसिर १८ गते विराटनगर किंससँग खेल्दै प्रतियोगिताको उद्घाटन गर्नेछ ।

एनपिएलको टिकट दर तय, खल्ती एपबाट खरिद गर्न सकिने
क्यानले एनपिएलका लागि टिकट दर तय गरेको छ । क्यानले एनपिएलका खेल हेर्न साधारण र भिआइपी गरी दुई किसिमको टिकट दर सार्वजनिक गरेको हो । एनपिएलको उद्घाटन खेलमा साधारणतर्फ तीन सय तथा भिआइपीतर्फ सात सय रुपैयाँको टिकट दर तोकेको छ । एनपिएलको खेलका लागि साधारणतर्फ तीन सय र भिआइपीतर्फ पाँच सय रुपैयाँ टिकट दर निर्धारण गरिएको क्यानले जनाएको छ । लिग खेलमा एउटा टिकटले दुवै खेल हेर्न मिल्नेछ ।

क्यानका अनुसार प्लेअफका दिन साधारणतर्फ पाँच सय र भिआइपितर्फ सात सय रुपैयाँ टिकट दर तोकिएको छ । क्यानले एनपिएलको फाइनलमा साधारणतर्फ पाँच सय र भिआइपीतर्फ एक हजार रुपैयाँ मूल्य तय गरेको छ ।

सिजनल टिकटसमेत खरिद गर्न सकिने व्यवस्था रहेको क्यानले जनाएको छ । त्यसका लागि साधारणतर्फ चार हजार ४८० र भिआइपीतर्फ आठ हजार २४० रुपैयाँ निर्धारण गरिएको छ । एनपिएलको टिकट खल्ती एपबाट खरिद गर्न सकिनेछ । टिकट बिक्री सोमबार रातीबाटै सुरु भइसकेको क्यानले जनाएको छ । मंसिर १५ देखि पुस ६ गतेसम्म प्रतियोगिताका सबै खेल त्रित्रि क्रिकेट मैदान कीर्तिपुरमा हुनेछन् ।