युरोपका १५ देशमा देखाउन एचबिओले किन्यो चलचित्र ‘द रेड सुटेकेस’ 

हिमालय टाइम्स कालिकोट, संवाददाता
हिमालय टाइम्स कालिकोट, संवाददाता
Read Time = 6 mins

काठमाडौं । घर घरमा टेलिभिजन च्यानलमार्फत बिगत ५१ वर्षदेखि हलिउडका सिनेमाको सेवा दिँदै आएको हलिउडको जेठो सिनेमा च्यानल (हाल ओटिटी प्लेटफर्मसमेत रहेका) होम बक्स अफिस (एचबिओ)ले सेटेलाईट र ओटिटी वितरणको लागि पहिलो पटक नेपाली चलचित्र किनेको छ ।

एचबिओले पहिलो पटक नेपाली चलचित्र ‘द रेड सुटकेस’ किनेको हो । यो चलचित्र यही ३० चैतबाट नयाँ वर्ष २०८१ को अबसरमा नेपालमा रिलिज हुँदैछ । यसै क्रममा हलिउड म्यागजिन भेराइटीले बिहिबारी सम्प्रेषण गरेको यो समाचार नेपाली चलचित्रकर्मीहरुका लागि एउटा सुखद समाचार बनेको छ ।

नेपाली चलचित्रलाई अन्तराष्ट्रिय ओटिटी प्लेटफर्महरुले महत्व नदिएको बेला विश्वकै पुरानो सेटेलाईट फिल्म वितरण सँस्था र अहिलेको त्यत्तिकै प्रभावशाली ओटिटी प्लेटफर्म एचबिओले युरोपका १५ देशमा ओटिटी राईट्स वितरणका लागि चलचित्र ‘द रेड सुटकेस’ किनेको हो ।

यो चलचित्रका निर्माता रामकृष्ण पोखरेलकाअनुसार एचबीओले १५ वटा युरोपियन देशको लागि ओटीटी अधिकार लिएसँगै आफ्नो लगानी सुरक्षित भएको बताएका छन् । एचविओले आफुहरुको चलचित्र किनेपछि थप हौसला बढेको उनले बताएका छन् ।

बेलायत बेस बनाएर बसेको फिल्म सेल्स एजेन्ट ‘रिजन ८ फिल्मस्’ले २०२३को भेनिसमा प्रदर्शित नेपाली चलचित्र द रेड सुटकेस’लाई युरोपको १५ देशमा वितरण गर्न एचबिओ च्यानललाई बिक्री गरेको छ । हलिउडको भेराईटी म्यागेजिनका अनुसार सो वितरक संस्थाले मलेसिया र बु्रनाईमा द रेड सुटकेश विक्री वितरण् तथा प्रदर्शनको अधिकारी सुराया फिल्मस्लाई बिक्री गरेको छ ।

एचबिओसँगको सम्झौता अन्तर्गत १५ देशहरु अल्बानिया, चेक गणतन्त्र, स्लोभाक गणतन्त्र, हंगेरी, पोल्याण्ड, रोमानिया, मोल्डोभा, क्रोएसिया, स्लोभेनिया, सर्बिया, कोसोभो, मोन्टेनेग्रो, बोस्निया-हर्जेगोभिना, म्यासेडोनिया र बुल्गेरिया समावेश छन् । अब यी मुलुकमा द रेड सुटकेसलाई अचबिओले देखाउने छ । यस्तै उत्तरी अमेरिका र ल्याटिन अमेरिकाको लागि यो चलचित्र विक्री वितरण गर्न अन्य वितरक कम्पनीसँग बार्ता भईरहेको पनि रिजन ८ फिल्मस्ले भेराईटी म्यागेजिनलाई जनाएको छ ।

ADVERTISEMENT

फिडेल देवकोटाले डेब्यु निर्देशनमा बनेको कथानक चलचित्र द रेड सुटकेस भेनिस फिल्म फेस्टिभलको होराइजन्स स्ट्र्यान्डमा प्रिमियर भएको थियो । सो फेस्टिभल रनमा जुरिच र मुम्बई समावेश थिए । सिनेमासँग सहकार्य गरेर श्रीलँकामा पोष्ट प्रोडक्सन गरिएको पनि यो नै पहिलो नेपाली चलचित्र हो ।

निर्माता पोखरेलले बिहिबार बेलुका सञ्चारकर्मीसँग भने,‘ नेपालमा केही प्रदर्शकहरुले हामीलाई प्रदर्शनमा वेवस्ता गरेको बेला एचबिओले द रेड सुटकेसको ओटिटी राईटस् खरिद गर्नु हाम्रा लागि महत्वपूर्ण कुरा हो । यसले घरेलु बजारको दबाबमा नपरी पनि अन्तराष्ट्रिय बजारबाट लगानी उठाउन सकिन्छ भन्ने आत्मविश्वास दिएको छ ।’

निर्देशक फिडेल देवकोटा पनि फिल्म निर्माण गर्दा नै आफूहरु परम्परागत बजारको पक्षमा नरहेको र सोही अनुसार नै चलचित्र वितरणको फराकिलो तयारीका साथ अघि बढेको जानकारी गराए,‘ स्थानीय बजारमा मात्र चलचित्र देखाउँछु भन्नेबारे भर नपरी अन्तराष्ट्रिय बजारका लागि पनि चलत्रिच निर्माण गर्नुपर्छ भन्ने मेरो सिद्धान्त हो । यसले हामीलाई नयाँ बजारको खोजीका लागि झक्झक्याउँछ र यसपटक एचबिओमार्फत हामीले नयाँ बजारका रुपमा युरोपका १५ वटा मुलुकलाई पनि पाएका छौं ।’ यो सुखद खबर भएको निर्देशक देवकोटाले बताए, आज द रेड सुटकेसले बनाएको यो नयाँ बजार भविष्यमा यसरी बन्ने अन्य नेपाली चलचित्रका लागि पनि त्यत्तिकै फाइदाजनक बन्ने छ ।’

चलचित्र द रेड सुटकेसमा अभिनेता सौगात मल्ल, प्रवीण खतिवडा, सृष्टि श्रेष्ठ, विपिन कार्कीलगायतको मुख्य भूमिका रहेको छ । आइसफल प्रडक्सनका लागि शोभा थापाको निर्माण रहेको फिल्मलाई सुशन प्रजापतिले छायांकन गरेका हुन् ।

भिजुअल एन्थ्रोप्लोजीमा विधावारिधी गरेर यो चलचित्र निर्देशन गरेको फिडेलले यस अघि २०१४ मा सर्ट फिल्म ‘द लास्ट याक हर्डर अफ धे’ र बृत्तचित्र ‘विन्ड अफ चेन्ज इन लो मुस्ताङ’ निर्देशन गरेका थिए ।

यो खबर पढेर तपाईलाई कस्तो महसुस भयो ?
0 Like Like
0 Love Love
0 Happy Happy
0 Surprised Surprised
0 Sad Sad
0 Excited Excited
0 Angry Angry

Leave a Reply

Your email address will not be published. Required fields are marked *