विराटनगर । विभागीय टोली त्रिभुवन आर्मी क्लबले गिरिजाप्रसाद कोइराला स्मृति चौथो राष्ट्रिय पुरुष हक्की प्रतियोगिताको उपाधि जितेको छ । विराटनगरमा भएको खेलमा विभागीय टोली आर्मीले अर्को विभागीय टोली नेपाल पुलिस क्लबलाई १-० गोल अन्तरमा पराजित गर्दै उपाधि जितेको हो । आर्मीले प्रतियोगिताको उद्घाटन खेलमा समेत पुलिसलाई पराजित गरेको थियो । आर्मी साबिकको विजेता हो । पहिलो गण्डकी र दोस्रो लुम्बिनीले उपाधि जितेको थियो ।
लिग चरणमा सहजै जित निकालेको आर्मीलाई फाइनलमा जित निकाल्न निकै संघर्ष गर्नुपरेको थियो । खेलको ४१औँ मिनेटमा आर्मीका काशीराज राईले गरेको गोल नै निर्णायक बन्यो । म्यान अफ द म्याच आर्मीका नितिज न्यौपाने हुनुभयो ।
कार्यक्रमका प्रमुख अतिथि कोशी प्रदेशका मुख्यमन्त्री हिक्मतकुमार कार्कीले विराटनगरमा दक्षिण एसियाली महिला हक्की प्रतियोगिता आयोजना गर्न आवश्यक सहयोग गर्ने बताउनुभयो । आगामी वर्षको नीति, कार्यक्रम एवं बजेटमा यस प्रतियोगितालाई राख्ने बताउँदै मुख्यमन्त्री कार्कीले भन्नुभयो, ‘हक्कीका लागि आवश्यक पर्ने जग्गा जोहो गरे प्रदेश सरकारले अन्तर्राष्ट्रियस्तरको रंगशाला निर्माण गर्न सहयोग गर्छ । यस खेलमा युवा पुस्तालाई आकर्षित गराउन र अन्य प्राविधिक कुरामा सहयोग गर्न प्रदेश सरकार तयार रहेको छ ।’
नेपाल हक्की संघद्वारा आयोजित प्रतियोगिताको उत्कृष्ट गोलरक्षक पुलिसका हरिदत्त पाण्डे, इमर्सिङ प्लेयर सुदूरपश्चिम प्रदेशका महेश नेपाली, सर्वाधिक गोलकर्ता आर्मीका रोमन राना, उत्कृष्ट डिफेन्डर पुलिसका योगेश बारघरे र सर्वोत्कृष्ट खेलाडी आर्मीका नितिश न्यौपाने हुनुभयो ।
खेलाडीहरूलाई मुख्यमन्त्री हिक्मतकुमार कार्की, सामाजिक विकासमन्त्री बुद्धिकुमार राजभण्डारी, हक्की संघका वरिष्ठ उपाध्यक्ष अनिलप्रसाद शर्मा, नेपाली कांग्रेसकी केन्द्रीय सदस्य डा. डिला संग्रौला, प्रतियोगिताका संयोजक रञ्जन थापा, नेपाल हक्की संघ मोरङका अध्यक्ष राजेश गुप्ता, विराट गोल्डकप ट्रष्टका अध्यक्ष सन्तोष बानियाँलगायतले पुरस्कार प्रदान गर्नुभयो ।
प्रतियोगिताको विजेता आर्मीले ७५ हजार र उपविजेता नेपाल पुलिसले ४१ हजार रुपैयाँका साथै ट्रफी प्राप्त गरे । त्यस्तै, मधेश प्रदेशलाई पराजित गर्दै तेस्रो भएको सुदूरपश्चिम प्रदेशले २५ हजार प्राप्त गरेको छ । प्रतियोगितामा आर्मी, पुलिस, कोशी प्रदेश, मधेश प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशको सहभागिता रहेको थियो ।
Like
Love
Happy
Surprised
Sad
Excited
Angry
