कर्णालीलाई हराउँदै जनकपुर एनपिएलको फाइनलमा

काठमाडौं । नेपाल प्रिमियर लिग (एनपिएल)को उपाधिका लागि सुदूरपश्चिम रोयल्स र जनकपुर बोल्ट्स भिड्ने भएका छन् । बिहीबार कीर्तिपुरस्थित त्रिवि क्रिकेट मैदानमा भएको दोस्रो क्वालिफायर खेलमा जनकपुर बोल्ट्सले कर्णाली याक्सलाई पराजित गर्दै फाइनलमा सुदूरपश्चिमसँगको भेट पक्का गरेको हो ।

जनकपुर बोल्ट्सले कर्णालीलाई दुई विकेटले पराजित गर्दै फाइनल पुगेको हो । कर्णालीले दिएको ११९ रनको लक्ष्य पछ्याएको जनकपुरले १९ ओभरमा ८ विकेट गुमाएर पूरा गरेको थियो । शीर्षक्रम धराशायी बने पनि अलराउन्डर जिम्मीले इनिङ सम्हालेपछि जनकपुरले ११९ रनको लक्ष्य १९ ओभरमा आठ विकेट गुमाएर पूरा गरेको थियो । त्यसअघि टस हारेर ब्याटिङमा उत्रिएको कर्णालीले २० ओभरमा नौ विकेट गुमाएर ११८ रन बनाएको थियो ।

जनकपुरको जितमा निसमले सर्वाधिक ४५ रन बनाउनुभयो । उहाँले १७ बलमा दुई चौका र पाँच छक्का प्रहार गर्नुभएको थियो । निसमलाई १५.३ ओभरमा विपिन शर्माले बोल्ड गर्नुभएको थियो । निसम आउट हुँदा जनकपुरलाई जितका निम्ति २७ बलमा २५ रनको आवश्यकता थियो । सोही ओभरको अन्तिम बलमा विपिनले जनकपुरका मोहमद मोहसिनलाई एलबिडब्लुको धरापमा पारेपछि खेल रोमाञ्चक मोडमा पुगेको थियो ।

९६-७ को स्थितिबाट जितका निम्ति २३ रन आवश्यक हुँदा आठौँ विकेटका निम्ति शेर मल्ल र मयन यादवले १९ रनको साझेदारी गर्दै जनकपुरलाई जितनजिक पु¥याउनुभएको थियो । तर, १९औँ ओभरको चौथो बलमा दुई रन लिन खोज्दा मयन रनआउट भएपछि खेल पुनः ‘थ्रिलर’ मोडमा पुगेको थियो । जतिबेला जनकपुरलाई जितका निम्ति आठ बलमा चार रनको आवश्यकता थियो । तर, मयन आउट भएपछि पनि नन्दन यादवले गरेको उक्त ओभरको पाँचौँ र छैटौँ बलमा शेर मल्लले समान दुई रन लिएपछि जनकपुरले रोमाञ्चक जित पक्का गरेको हो ।

निसम स्कोरबोर्डमा ४१-४ को स्थितिमा ब्याटिङका निम्ति आउनुभएको थियो । उहाँले ५८-५ को स्थितिबाट छैटौँ विकेटका निम्ति मयन यादवसँग ३८ रनको साझेदारी गर्नुभएको थियो ।

ADVERTISEMENT

जनकपुरले दोस्रो ओभरको तेस्रो ओभरमा पहिलो विकेट गुमायो । जनकपुरका ओपनर सुवास कंसाकारलाई विपिन शर्माले कप्तान सोमपाल कामीबाट क्याच गराउनुभएको थियो । उहाँले तीन रन जोड्नुभयो । यस्तै हर्ष ठाकेरले १७, शेर मल्लले १६, मयन यादवले १४ तथा आकाश त्रिपाठीले १३ रन बनाउनुभयो ।

कर्णालीका लागि विपिन शर्माले तीन विकेट लिनुभयो । यस्तै कप्तान सोमपाल कामी, जिशान मक्सुद र विलियम बोसिस्टोले समान एक-एक विकेट लिनुभयो । यसअघि टस हारेर पहिले ब्याटिङ गरेको कर्णालीले नौ विकेट गुमाएर ११८ रन बनाएको थियो । कर्णालीका लागि गुल्सन झाले सर्वाधिक २५ रन बनाउँदा ओपनर देव खनालले २४ रन बनाएर आउट हुनुभयो । विलियम बोसिस्टो १४, जिसान मक्सुद र युनिस ठकुरीले समान १२-१२, चाडविक वाल्टनले ११ रन बनाए पनि अन्य ब्याटरले दोहोरो अंकमा रन बनाउन सकेनन् ।
बलिङतर्फ जनकपुरका लागि ललितनारायण राजवंशी, जिमी निसम र मोहमद मोहसिनले समान दुई-दुई विकेट लिनुभयो । हर्ष ठाकेर र शेर मल्लले समान एक-एक विकेट लिनुभएको थियो ।

कर्णालीले एलिमिनेटरमा चितवनलाई हराउँदै दोस्रो क्वालिफायरमा स्थान बनाएको हो भने जनकपुर पहिलो क्वालिफायरमा सुदूरपश्चिम रोयल्ससँग पराजित हुँदै दोस्रो क्वालिफायरमा आएको हो । प्रतियोगितामो लिग चरणबाट दोस्रो स्थानमा रहँदै प्लेअफमा आएको जनकपुर पहिलो क्वालिफायरमा सुदूरपश्चिम रोयल्ससँग आठ विकेटले पराजित भएको थियो । लिग चरणबाट चौथो स्थानमा रहँदै प्लेअफमा आएको कर्णालीले भने एलिमिनेटरमा चितवन राइनोजविरुद्ध २१ रनको जित निकाल्दै दोस्रो क्वालिफायरमा स्थान बनाएको थियो ।

जितसँगै फाइनलमा स्थान बनाएको जनकपुरले अब उपाधिका निम्ति सुदूरपश्चिम रोयल्सविरुद्ध प्रतिस्पर्धा गर्ने छ । प्रतियोगिताको फाइनल खेल शनिबार कीर्तिपुरस्थित त्रिवि क्रिकेट मैदानमै हुने तालिका छ ।