काठमाडौं । लाहिरू मिलान्था र हर्ष ठाकेरको शतकीय साझेदारीप्रेरित जनकपुर बोल्ट्सले नेपाल प्रिमियर लिग (एनपिएल)को उद्घाटन खेलमा विराटनगर किंग्सविरुद्ध आठ विकेटको सहज जित निकालेको छ । शनिबार कीर्तिपुरस्थित त्रिवि क्रिकेट मैदानमा विराटनगरले प्रस्तुत गरेको १२८ रनको मध्यम लक्ष्य जनकपुरले १५.३ ओभरमा दुई विकेट गुमाएर पूरा गरेको थियो । १५.३ ओभरमा १२७-२ को स्थिति हुँदा ठाकेरले चौका प्रहार गर्दै जनकपुरको जित पक्का गर्नुभएको थियो ।
विराटनगरले दिएको १२८ रनको लक्ष्य जनकपुरले १५.२ ओभरमा दुई विकेटको क्षतिमा भेट्टायो । तेस्रो विकेटका लागि लाहिरू मिलान्था र हर्ष ठाकेरले ११६ रनको अविजित साझेदारी गरेपछि जनकपुरले सहजै लक्ष्य भेट्टाएको हो ।
मिलान्था ५२ बलमा नौ चौका र दुई छक्का सहयोगमा ७५ रनमा अविजित रहनुभयो भने ठाकेर ३३ बलमा दुई चौका सहयोगमा २९ रनमा नटआउट रहनुभयो । मिलान्थाले १२औँ ओभरको पहिलो बलमा अर्धशतक पूरा गर्नुभयो । उहाँले ३९ बलमा ६ चौका र दुई छक्का प्रहार गर्दै टोलीका लागि पहिलो अर्धशतक पूरा गर्नुभएको थियो । एनपिएलमा यो दोस्रो अर्धशतक हो ।
मार्की खेलाडी आशिफ शेख पहिलो ओभरको चौथो बलमा नै बोल्ड आउट हुनुभयो । आशिफ शून्य रनमा नै क्रिस सोलेको बलमा आउट हुनुभएको थियो । कप्तान अनिल शाह पाँच रनमा बोल्ड आउट हुनुभयो । अनिल दोस्रो ओभरको अन्तिम बलमा सोलेको बलमा बोल्ड आउट हुनुभएको थियो ।
विराटनगरका क्रिस सोले र प्रतिश जिसीले समान एक-एक विकेट लिनुभएको थियो । त्यसअघि कीर्तिपुरस्थित त्रिवि क्रिकेट मैदानमा जनकपुरले टस जितेर फिल्डिङ रोजेपछि ब्याटिङ गरेको विराटनगर १९ ओभरमा १२७ रन बनाउँदा अलआउट भएको थियो ।
ADVERTISEMENT
विराटनगरका लागि मार्टिन गुप्टिलले सर्वाधिक ५५ रनको योगदान दिनुभयो । उहाँले ४३ बलमा सात चौका र एक छक्का प्रहार गर्नुभयो । गुप्टिल १४औँ ओभरको अन्तिम बलमा हर्ष ठाकेरको बलमा अनिल शाहको हातबाट क्याच आउट हुनुभयो । गुप्टिलले १३औँ ओभरको पहिलो बलमा बेन माइकलाई छक्का प्रहार गर्दै अर्धशतक पूरा गर्नुभयो ।
विराटनगरले दोस्रो ओभरमा ६ रन बनाउँदा पहिलो विकेट गुमाएको थियो । ओपनर लोकेश बम पाँच रन बनाउँदा ललित राजवंशीको बलमा बोल्ड आउट हुनुभयो । ललित राजवंशीले दोस्रो ओभरको पहिलो बलमा विकेट लिँदै लोकेशलाई पेभेलियनको बाटो देखाउनुभएको थियो ।
नवौँ ओभरको दोस्रो बलमा अकिब इलियास १५ रन बनाउँदा आउट हुनुभयो । जनकपुरका मोहम्मद मोहसिनले अकिब इलियासलाई एलबिडब्लु धरापमा पार्नुभएको थियो ।
१२औँ ओभरको अन्तिम बलमा निकोलस किर्तन नौ रन बनाउँदा हर्ष ठाकेरको बलमा बोल्ड आउट हुनुभयो । बसिर अहमद र सन्दीप लामिछाने समान सात र राजेश पुलामी एक रनमा आउट हुनुभयो । प्रतिश जिसी दुई रनमा बोल्ड आउट हुनुभयो । जितेन्द्र मुखिया शून्य रनमा नै बोल्ड आउट हुनुभएको थियो ।
किशोरले १८औँ ओभरको तेस्रो बलमा सन्दीप र चौथो बलमा जितेन्द्र मुखियालाई आउट गराउनुभएको थियो । जनकपुरका लागि ललित राजवंशीले तीन विकेट लिनुभयो । हर्ष ठाकेर र किशोर महतोले समान दुई विकेट झार्नुभयो । मोहम्मद मोहसिन र वेन माइकले समान एक-एक विकेट लिनुभएको थियो ।
प्रतियोगितामा आज (आइतबार) कुनै खेल छैनन् भने सोमबार (भोलि) दुई खेल हुनेछन् । पहिलो खेलमा काठमाडौं गुर्खाज र चितवन राइनोजबीच प्रतिस्पर्धा हुनेछ । दोस्रो खेलमा कर्णाली याक्स र जनकपुर बोल्ट्स भिड्नेछन् ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry