धरहरा परिसरबाट एनपिएलको ट्रफी सार्वजनिक

काठमाडौं । नेपाल प्रिमियर लिग (एनपिएल)को ट्रफी सार्वजनिक गरिएको छ । सोमबार बिहान प्रधानमन्त्री केपी शर्मा ओली र आठ टिमका मार्की खेलाडीले धरहरा परिसरबाट एनपिएलको ट्रफी अनावरण गरेका हुन् । ट्रफीमा कालापत्थरबाट ल्याइएको ढुंगा राखिएको छ ।

अनावरण कार्यक्रमलाई सम्बोधन गर्दै प्रधानमन्त्री ओलीले नेपाली क्रिकेटका लागि विशेष दिन रहेको बताउनुभयो । एनपिएलमा सहभागी सबै टिमलाई आफ्नो समर्थन रहेको बताउँदै प्रधानमन्त्री ओलीले भन्नुभयो, ‘अहिले सबैलाई शुभकामना दिन्छु, जितेपछि जित्नेलाई बधाई दिन्छु ।’ प्रधानमन्त्री ओलीले एनपिएलले पर्यटन प्रवद्र्धन पनि गर्ने विश्वास व्यक्त गर्नुभयो । सरकारले खेलकुद क्षेत्रलाई जति प्रोत्साहन गर्नुपर्ने हो, त्यति गर्न नसकेको पनि उहाँले स्वीकार गर्नुभयो । ‘सरकारले खेलकुद क्षेत्रलाई सहयोग गर्न सकेको छैन, त्यसमा मलाई चित्त बुझेको छैन,’ प्रधानमन्त्री ओलीले भन्नुभयो, ‘गर्नुपर्ने जति प्रोत्साहन गर्न सकेको छैन ।’

कार्यक्रममा बोल्दै क्यानका सचिव पारस खड्काले एनपिएलले नेपालको प्राकृतिक सम्पदाको प्रवद्र्धन गर्दै पर्यटनमा सहयोग पुर्‍याउने आशा व्यक्त गर्नुभयो । उहाँले प्राकृतिक सम्पदाहरूको संरक्षण गर्नसमेत एनपिएलको ट्रफी महत्वपूर्ण हुने विश्वास व्यक्त गर्नुभयो । उहाँले भन्नुभयो, ‘नेपाल प्रिमियर लिगको यो ट्रफीले एक त नेपालको प्राकृतिक सम्पदाको प्रवद्र्धन गर्दै पर्यटनमा सहयोग पुर्‍याउने आशा राखेको छ । सँगै अझ महत्वपूर्ण पक्ष हाम्रो प्राकृतिक सम्पदाहरूको संरक्षण गर्नसमेत महत्वपूर्ण हुनेछ । यो ट्रफीमात्रै रहेन, यो सिंगो देशलाई एकै ठाउँमा, एकै स्वरमा विश्वलाई संरक्षण गर्ने सन्देश रहेको छ ।’ सचिव खड्काले सिंगो देशलाई एकै ठाउँमा उभ्याउन एनपिएल महत्वपूर्ण साबित हुने बताउनुभयो । एनपिएलमा आठ टिमले सहभागिता जनाउँदैछन् । चर्चित स्पोर्ट्स टेलिभिजन स्टार स्पोर्ट्सले खेलको प्रत्यक्ष प्रसारण गर्नेछ ।

ADVERTISEMENT

एनपिएलले नेपालको आर्थिक गतिविधि चलायमान बनाउनेछ : खेलकुदमन्त्री चौधरी
युवा तथा खेलकुदमन्त्री तेजुलाल चौधरीले नेपाल प्रिमियर लिग (एनपिएल) ले नेपालको आर्थिक गतिविधि चलायमान बनाउने बताउनुभएको छ । सोमबार धरहरा परिसरमा एनपिएलको ट्रफी अनावरण कार्यक्रममा बोल्दै उहाँले सो विश्वास व्यक्त गर्नुभएको हो । उहाँले एनपिएलको चर्चा स्वदेशमा मात्र नभए विदेशमा समेत भइरहेको भन्दै एनपिएलले आर्थिक, औद्योगिक र पर्यटकीय क्षेत्रमा पनि महत्वपूर्ण भूमिका खेल्ने बताउनुभयो । उहाँले सबै टिमलाई जितको अग्रिम शुभकामना दिनुभयो । उहाँले खेल क्षेत्रले नेपाललाई अब विश्वमा चिनाउने पनि बताउनुभयो ।

एनपिएल ऐतिहासिक प्रतियोगिता : सदस्य-सचिव घिसिङ
राष्ट्रिय खेलकुद परिषद्का सदस्य-सचिव टंकलाल घिसिङले एनपिएल नेपाली खेलकुदलाई बुझ्ने पुरानो मूल्य, मान्यता तोडेर नयाँ मान्यता स्थापित गर्ने एउटा ऐतिहासिक प्रतियोगिता भएको बताउनुभयो । उहाँले खेलकुदलाई शारीरिक स्वास्थ्यसँग मात्रै जोड्ने कुराका रूपमा हेरे पनि एनपिएललाई उद्यम, आर्थिक क्रियाकलापको क्षेत्रका रूपमा अघि सारिएको बताउनुभयो । उहाँले भन्नुभयो, ‘एनपिएल नेपाली खेलकुदलाई बुझ्ने पुरानो मूल्य, मान्यता तोडेर नयाँ मान्यता स्थापित गर्ने एउटा ऐतिहासिक प्रतियोगिताका रूपमा मैले यसलाई लिन्छु । हाम्रो माझमा खेलकुदलाई शारीरिक स्वास्थ्यसँग मात्रै जोड्ने कुरा थियो तर अब यो एउटा उद्यम, आर्थिक क्रियाकलापको क्षेत्रका रूपमा एनपिएललाई अघि सारिएको छ । म यसको सुरुवाती दिनदेखि नै सँगै छु ।’ सदस्य-सचिव घिसिङले खेललाई स्वास्थ्यसँग मात्रै जोडेर हेर्न नहुने बताउनुभयो ।

महिला नेपाल प्रिमियर लिगको आयोजना गर्न क्यानलाई प्रधानमन्त्रीको निर्देशन
प्रधानमन्त्री केपी शर्मा ओलीले महिला नेपाल प्रिमियर लिगको आयोजना गर्न नेपाल क्रिकेट संघलाई निर्देशन दिनुभएको छ । सोमबार धरहरा परिसरमा नेपाल प्रिमियर लिगको ट्रफी अनावरण कार्यक्रमलाई सम्बोधन गर्दै प्रधानमन्त्री ओलीले नेपाल प्रिमियर लिगको शुभकामना दिँदै आगामी दिनमा महिला नेपाल प्रिमियर लिगको आयोजना गर्न पनि क्यानका पदाधिकारीहरूसँग आग्रह गर्नुभएको हो । उहाँले क्रिकेट युवा पुस्ताको एउटा सपना र गौरव बनेको बताउनुभयो । उहाँले क्रिकेट खेलमात्र नभई राष्ट्रिय जागरुकता, अनुशासनको प्रतीक पनि बनेको उल्लेख गर्नुभयो । प्रधानमन्त्री ओलीले सबै टिमहरूलाई शुभकामना दिनुभयो । उहाँले एनपिएलले पर्यटन व्यवसायको पनि प्रवद्र्धन गर्ने विश्वास व्यक्त गर्नुभयो ।