सत्यनारायणबहादुर श्रेष्ठ प्रेस स्वतन्त्रता सेनानी पुरस्कार प्रदान

काठमाडौं । नेवाः पत्रकार राष्ट्रिय दबुले शुक्रबार सत्यनारायणबहादुर श्रेष्ठ प्रेस स्वतन्त्रता सेनानी पुरस्कार गोरखापत्रका वरिष्ठ पत्रकार लक्की चौधरीलाई प्रदान गरेको छ । प्रेस काउन्सिलका अध्यक्ष बालकृष्ण बस्नेतले स्वर्गीय श्रेष्ठको १०८औं जन्मजयन्तीको अवसरमा आयोजित समारोहमा चौधरीलाई २५ हजार रुपैयाँसहित ताम्रपत्र प्रदान गर्नुभएको हो ।

सोही कार्यक्रममा नेवाः पत्रकार राष्ट्रिय दबुको मुखपत्र ‘आज्जु’को विमोचन पनि गरिएको थियो । पत्रकार चौधरीले २०७२ सालदेखि स्वर्गीय श्रेष्ठका बारेमा खोज गरी निरन्तर लेख, रचना लेख्ने र नेपाल पत्रकार महासंघको इतिहासलाई पुनःलेखनको बारे सार्वजनिक बहस र विमर्शको विषय बनाउन पुर्‍याउनुभएको योगदानको आधारमा सो पुरस्कार प्रदान गर्ने निर्णय गरिएको हो ।

प्रेस काउन्सिल नेपालले २०७२ पुसमा प्रकाशित संहितामा इतिहास बाङ्गिएको दुःखेसो, प्रेस चौतारी नेपालले २०७३ सालमा प्रकाशित गरेको पत्रिकामा नेपाली पत्रकारिताको बहस र यथार्थ, नेपाल आदिवासी जनजाति पत्रकार महासंघ (फोनिज)बाट विसं २०८० भदौमा महासंघको संस्थापक प्रकाशित सत्यनारायणबहादुर श्रेष्ठ गरी चौधरीका लेख प्रकाशित छन् । चौधरीले विभिन्न सार्वजनिक बहसमा सो सम्बन्धी अनुसन्धात्मक कार्यपत्र प्रस्तुत गर्दै आउनुभएको छ ।

नेवाः पत्रकार राष्ट्रिय दबुले स्वर्गीय श्रेष्ठलाई नेपाल पत्रकार महासंघको संस्थापक अध्यक्षको पहिचान दिलाउने अभियान चलाउँदै आएको छ । सोही अभियानअन्तर्गत सत्यनारायणबहादुर श्रेष्ठ प्रेस स्वतन्त्रता सेनानी पुरस्कार यस वर्षदेखि थालनी गरिएको हो ।

नेपाल पत्रकार महासंघको संस्थापक अध्यक्षका रुपमा पत्रकार संगठित गर्ने अभियानको सुरुवात २००८ सालमा नेपाल टुडेको सम्पादक श्रेष्ठले आफ्नो अध्यक्षतमा पहिलो पटक नेपाल पत्रकार संघको गठन गरेको हो । २००९ सालमा संघको दोस्रो सभाबाट पुनः श्रेष्ठलाई अध्यक्षमा चयन गरिएको थियो । २०१२ सालमा पत्रकारहरूको अर्को बैठकबाट पूर्वप्रधानमन्त्री तथा नेपाली कांग्रेसका पूर्वसभापति वृmष्णप्रसाद भट्टराईको सभापतित्वमा नेपाल पत्रकार संघको पुनर्गठन गरिएको थियो । त्यसपछि यही तथ्यलाई पहिलो घटनाको रूपमा व्याख्या गरी भट्टराईलाई नेपाल पत्रकार महासंघको संस्थापक मानिँदै आएको छ ।

प्रेस काउन्सिलका अध्यक्ष बालकृष्ण बस्नेतले नेपालीहरू आफ्नै पहिचान मेटाइरहेकाले नेपाल उभो लाग्न नसकेको बताउनुभयो । ‘सत्यनारायण बहादुर श्रेष्ठ नेपाल पत्रकार महासंघको संस्थापक अध्यक्ष हो, भन्ने विषय घाम जस्तै छर्लंग छ । तर, आफ्नै क्षेत्रको बारेमा हामीले सही तथ्य बङ्ग्यारहेका छौं । आफ्नै छिनोफानो गर्न नसक्दा नेपाली पत्रकारितालाई कसरी विश्वास गर्छ भन्ने पनि प्रश्न हुनसक्छ’, उहाँले भन्नुभयो । उहाँले श्रेष्ठलाई पत्रकार महासंघको संस्थापक अध्यक्षमा स्थापित गर्न अझै अध्ययन, अनुसन्धानको आवश्यकता भएमा प्रेस काउन्सिलको सहयोग रहने जानकारी पनि दिनुभयो ।

ADVERTISEMENT

नेपाल पत्रकार राष्ट्रिय दबुका अध्यक्ष नृपेन्द्रलाल श्रेष्ठले नेपाल पत्रकार दबुले विगत चार वर्षदेखि श्रेष्ठलाई संस्थापक अध्यक्षको पहिचान दिन अभियान चलाएको र यसपटक उहाँको १०८औं जन्मजयन्तीको अवसरमा सत्यनारायणबहादुर श्रेष्ठ स्मृति फुटसल र पत्रकारिता पुरस्कारको स्थापना गरेर यो अभियानलाई अझ बृहत् रूपमा लगेको जानकारी दिनुभयो ।

यसैगरी, श्रेष्ठकी छोरी तथा आदर्श विद्या मन्दिरकी प्रिन्सिपल सुजिता मानन्धरले सत्यनारायणबहादुर श्रेष्ठ कर्म गर्ने तर फलको आशा नगर्ने व्यक्तित्व भएको भन्नु हुँदै ‘पत्रकारिता गर्ने क्रममा राजनीतिक वितृष्णाले उहाँ शिक्षा क्षेत्रमा होमिनुभएको र त्यसपछि शिक्षामै बढी फोकस हुनुभयो’, भन्नुभयो । श्रेष्ठलाई नेपालका अग्रज शिक्षाविद्को रूपमा पनि चिनिन्छ ।

सो अवसरमा पत्रकारिता पुरस्कारबाट सम्मानित हुने चौधरीले यस सम्मानपछि सत्यनारायणबहादुर श्रेष्ठलाई संस्थापक अध्यक्षको पहिचान दिलाउने अभियानमा अझ बढी शोध गर्न आफूलाई घच्घचाएको र त्यसलाई सफल बनाइछाड्ने अठोट व्यक्त गर्नुभयो । उहाँले भन्नुभयो, ‘सत्यनारायणबहादुर श्रेष्ठले पत्रकार महासंघको संस्थापक अध्यक्षको मान्यता पाएपछि मात्र उहाँप्रति सच्चा श्रद्धाञ्जलि हुनेछ । न्याय हुनेछ ।’

नेवाः पत्रकार राष्ट्रिय दबुका उपाध्यक्ष सुनील महर्जन, महासचिव केके मानन्धर र सचिव तथा कार्यक्रम संयोजक राजु नापितले पनि श्रेष्ठबारे आ-आफ्नो धारणा प्रस्तुत गर्नुभएको थियो ।

सोही अवसरमा सत्यनारायणबहादुर श्रेष्ठ स्मृति मिडिया कप फुटसल प्रतियोगिताको विजेता नेवाः पत्रकार राष्ट्रिय दबु, चितवन, उपविजेता नेवाः पत्रकार राष्ट्रिय दबु काठमाडौं र तेस्रो स्थान हािसल गर्ने नेवाः कलाकारको टिमलाई ट्रफी, पदक तथा प्रमाण पत्र प्रदान गरिएको थियो ।

यसैगरी सत्यनारायणबहादुर श्रेष्ठ स्मृति मिडिया कपका संयोजक प्रजित शाक्य, नेवाः पत्रकार राष्ट्रिय दबुद्वारा प्रकाशित बुलेटिन आज्जुका प्रधान सम्पादक सुरजवीर वज्राचार्य, भिडियो÷फोटो संयोजन गर्ने अनुप प्रधान र सत्यनारायणबहादुर श्रेष्ठ जन्मजयन्ती कार्यक्रमका संयोजक राजु नापितलाई पनि सम्मान पत्र प्रदान गरिएको थियो ।