सहकारी ठगीको जालो

काठमाडौं । राष्ट्रिय स्वतन्त्र पार्टीका सभापति रवि लामिछानेविरुद्ध पर्सामा पनि पक्राउ पुर्जी जारी भएको छ । बुधबार जिल्ला अदालत पर्साले लामिछानेसहित १४ जनाविरुद्ध पुर्जीविरुद्ध जारी गरेको हो । वीरगञ्जको सानोपाइला सहकारीबाट गोर्खा मिडिया नेटवर्कमा रकम गएको देखिएको छ । त्यस सम्बन्धमा प्रहरीले अनुसन्धान अघि बढाएको हो । लामिछानेसँगै जिबी राई र पूर्व-डिआइजी छविलाल जोशीविरुद्ध पनि पुर्जी जारी भएको हो । सानोपाइला बचत तथा ऋण सहकारी संस्था लिमिटेडमा एक अर्ब ४५ करोड बढी रकम बचत थियो । त्यसमध्ये उक्त सहकारीबाट गोर्खा मिडिया नेटवर्कमा आठ करोडभन्दा बढी रकम प्रवाह भएको देखिएको सहकारी अपचलनसम्बन्धी संसदीय विशेष समितिको प्रतिवेदनमा उल्लेख छ ।

सहकारीले ऐनविपरीत सदस्यसमेत नरहेका वीरगञ्ज बाहिरका व्यक्तिलाई ऋण दिएर रकम अपचलन गरेको आरोप छ । बचतमध्ये करिब ९२ करोड रुपैयाँ कार्यक्षेत्र बाहिर गएर लगानी गरेर अपचलन गरेको आरोप छ । यो सहकारीबाट जिबी राई सञ्चालक रहेको नेचर हब इन्टरनेसनलाई एक करोड ३७ लाख, नेचर नेष्ट प्रालिलाई एक करोड ८५ लाख र स्प्रिङ वुड रियल स्टेटलाई एक करोड एक लाख कर्जा प्रवाह गरिएको छ ।

त्यस्तै, विशाल तामाङको नाममा ६ करोड ८३ लाख, छविलाल जोशीको नाममा एक करोड ८६ लाख, तीर्थराज लामिछानेको नाममा एक करोड ६ लाख, विमला पौडेलको नाममा दुई करोड सात लाख कर्जा प्रवाह गरिएको खुलेको छ ।

ADVERTISEMENT

लामिछानेमाथि कास्कीको सूर्यदर्शन सहकारी, बुटवलको सुप्रिम सहकारी, चितवनको साहारा सहकारी लगायतमा भएको रकम हिनामिनामा पनि अनुसन्धान भइरहेको छ । अहिले उहाँमाथि चितवनमा बयान भइरहेको छ । गत कात्तिक २ गते काठमाडौंबाट पक्राउ पर्नुभएका लामिछानेलाई कास्की, रुपन्देही, काठमाडौं हुँदै अहिले चितवन लगिएको हो । सुरुमा लामिछानेमाथि सहकारी ठगी र संगठित अपराधमा अनुसन्धान थालिएको थियो भने पछि कास्की प्रहरीले सम्पत्ति शुद्धीकरणको कसुरमा अनुसन्धान थालेको थियो । प्रहरी अधिकृतहरूले यो बीचमा ऋण तिर्न भन्दै लामिछानेले काटेका चेकहरू समेत बरामद गरेको छ ।

चितवनमा रास्वपा कार्यकर्ता र प्रहरीबीच झडप
चितवनमा राष्ट्रिय स्वतन्त्र पार्टी (रास्वपा)का कार्यकर्ता र प्रहरीबीच झडप भएको छ । रास्वपा सभापति रवि लामिछानेको रिहाइको माग गर्दै प्रदर्शनमा उत्रिएका कार्यकर्ता र प्रहरीबीच झडप भएको हो । झडपमा आठ प्रहरी घाइते भएका छन् । जिल्ला प्रहरी कार्यालयका प्रहरी उपरीक्षक गौतम मिश्रका अनुसार प्रदर्शनकारीले सरकारी वकिलको कार्यालय जाने बाटो अवरुद्ध गर्न खोज्दा झडप भएको हो । प्रदर्शनकारीले ढुंगा प्रहार गर्न थालेपछि अश्रुग्यास र पानीको फोहोरा प्रयोग गर्नुपरेको थियो । घाइते प्रहरीको भरतपुर अस्पतालमा उपचार भइरहेको छ । ‘प्रहरीले बल प्रयोग गरेको छैन । प्रदर्शनकारीले ढुंगा हान्दा प्रहरी घाइते भएका हुन्,’ प्रहरी उपरीक्षक मिश्रले भन्नुभयो । जिल्ला प्रहरी कार्यालय अगाडि सभापति लामिछानेको रिहाइको माग गर्दै प्रदर्शनकारीले निषेधित क्षेत्र नाघेपछि झडप भएको उहाँको भनाइ छ ।

सहकारी पीडितले गरे चितवनमा प्रदर्शन
चितवनको सहारा बहुउद्देश्यीय सहकारी संस्थाका बचतकर्ता पीडितले प्रदर्शन गरेका छन् । सहकारी ठगीको आरोपमा लामिछानेसँग जिल्ला प्रहरी कार्यालय चितवनमा बयान भइरहेका बेला पीडितले प्रदर्शन गरेका हुन् । पीडितहरूले सहकारीमा बचत गरेको रकम फिर्ता गर्नका लागि पहल गरिदिन सरकारसँग माग गरेका छन् । त्यस्तै, ‘गोर्खा मिडियामा गएको ६५ करोड फिर्ता गर्’ लेखिएको ब्यानरमा जिबी राई, रवि लामिछाने लगायतको तस्बिर राखेर प्रदर्शन गरेका थिए । पीडितहरूले जिबी राईलाई तत्काल पक्राउ गर्न पनि सरकारसँग माग गरेका छन् । जिल्ला प्रहरी कार्यालय चितवनबाहिर लामिछानेको समर्थनमा विरोध प्रदर्शन भइरहेका बेला पीडितले पनि प्रदर्शन गरेका हुन् । पीडितहरूले सहकारी बचत अपचलनमा संलग्न सबैलाई कारबाहीको माग गरेका छन् । पीडितहरूले तत्काल न्यायिक प्राधिकरण गठन गरी सहकारीमा जम्मा गरेको बचत रकम फिर्ता गर्न माग गरेका हुन् ।