काठमाडौं । नेपाली कांग्रेसका सभापति शेरबहादुर देउवाले १४औँ महाधिवेशनको तीन वर्षपछि बल्ल पार्टी कोषाध्यक्ष नियुक्त गर्नुभएको छ । कांग्रेसको महाधिवेशन २०७८ साल मंसिरमा काठमाडौंमा भएको थियो । कांग्रेस पदाधिकारीमध्ये एक मात्रै मनोनीत पद कोषाध्यक्ष विधानतः ६ महिनाभित्र मनोनयन भइसक्नुपर्ने थियो । सभापति देउवाले भने विधानले दिएको चार वर्षे कार्यकाल सकिन एक वर्ष मात्रै बाँकी रहँदा बल्ल पदाधिकारीलाई पूर्णता दिनुभएको छ ।
कांग्रेस केन्द्रीय सदस्य एवं पूर्व-राज्यमन्त्री उमेश श्रेष्ठलाई सभापति देउवाले केन्द्रीय कोषाध्यक्षको जिम्मेवारी दिनुभएको हो । यसअघि श्रेष्ठ पार्टीको कृषि विभाग प्रमुखसमेत हुनुहुन्छ । कांग्रेसमा छोटो सक्रियतामै महत्वपूर्ण जिम्मेवारी हासिल गर्ने नेतामध्येमा श्रेष्ठ पनि एक हुनुहुन्छ । १४औँ महाधिवेशनमा कांग्रेस केन्द्रीय सदस्यमा निर्वाचित हुनुभएका श्रेष्ठ व्यावसायिक पुष्ठभूमिबाट राजनीतिमा होमिनुभएको हो । पुख्र्यौली घर भोजपुर भए पनि राजनीतिक रूपमा चितवनबाट क्रियाशील रहँदै आउनुभएका श्रेष्ठ निर्वाचन अघिको सरकारमा केही समय स्वास्थ्य राज्यमन्त्री रहनुभएको थियो ।
२०७९ मंसिरमा सम्पन्न निर्वाचनमा चितवन-२ मा रास्वपाका सभापति रवि लामिछानेसँग पराजित हुनुभएका श्रेष्ठ छोटो समय स्वास्थ्यमन्त्री हुँदा सकरात्मक पहल गरेर चर्चामा आउनुभएको थियो ।
ADVERTISEMENT
कांग्रेसमा पदाधिकारी चयनमा ढिलाइ हुनु परम्परा जस्तै भइसकेको छ । विगतमा आफ्नो पहिलो कार्यकालमा पनि सभापति देउवाले महाधिवेशनको सम्मुखसम्म मनोनयन गरिरहनु भएको थियो । १२औँ महाधिवेशनपछि तत्कालीन सभापति सुशील कोइरालाले पनि सहमतिमा पदाधिकारी मनोनयन गर्ने भन्दै विधानले दिएको भन्दा बढी म्याद लिनुभएको थियो । कांग्रेसमा सभापतिसहित दुई निर्वाचित उपसभापति, दुई निर्वाचित महामन्त्री, आठ निर्वाचित सहमहामन्त्री र एक मनोनीत कोषाध्यक्ष रहने प्रावधान छ । सभापतिले मनोनीत गर्ने पार्टी प्रवक्ताले पनि पदाधिकारीको हैसियत पाउने परम्परा छ ।
को को थिए आकांक्षी ?
१४औँ महाधिवेशनका क्रममा टिम मिलाउन गाह्रो हुने भएपछि सभापति देउवाले पार्टीका आधा दर्जन बढी नेतालाई कोषाध्यक्ष बनाउने आश्वासन दिनुभएको थियो । यस्तो आश्वासन पाउनेमा पूर्व-कोषाध्यक्ष चित्रलेखा यादव, केन्द्रीय सदस्यहरू ज्ञानेन्द्रबहादुर कार्की, विनोद चौधरी, पुष्पा भुसाल, सुनिल थापा लगायतका नेताहरू हुनुहुन्थ्यो । लामो समयदेखि देउवाको विश्वासपात्र रही आउनुभएका श्रेष्ठ २०६४ सालमा मन्त्रिपरिषद् कोटामा संविधानसभा सदस्य बन्नुभएको थियो । २०७४ मा समानुपातिकबाट सांसद बन्नुभएका उहाँले कांग्रेसको कोषलाई पारदर्शी र सुदृढ बनाउने आफ्नो जिम्मेवारी रहेको बताउनुभएको छ ।
केन्द्रीय समिति अझै अपूर्ण
कांग्रेसको केन्द्रीय समितिले अझै पूर्णता पाउन बाँकी छ । सभापति देउवाले विधानको अधिकारअनुसार अझै केही केन्द्रीय सदस्य, अधिकांश विभाग र त्यसका सदस्यहरू चयन गर्न बाँकी छ । कांग्रेसका ७० मध्ये १७ विभाग मात्रै गठन भएका छन् । गठन भएका सबै विभागले पूर्णता पाइसकेका पनि छैनन् ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
देशका अधिकांश जिल्लामा वर्षा, सतर्कता