माओवादीले ७५३ वटै पालिकामा खबरदारी गर्ने

हेटौँडा । प्रमुख प्रतिपक्षी नेकपा माओवादी केन्द्रले देशभरका ७५३ वटै पालिकामा सरकारविरुद्ध खबरदारी सभा आयोजना गर्ने भएको छ । पार्टीका अध्यक्ष पुष्पकमल दाहाल ‘प्रचण्ड’ले देशभरका सबै पालिकामा खबरदारी सभा आयोजना गर्ने घोषणा गर्नुभएको हो । शनिबार मकवानपुरको थाहा नगरपालिकामा आयोजित वाइसिएलको कार्यक्रमलाई सम्बोधन गर्दै अध्यक्ष प्रचण्डले त्यसबारे सोमबार बैठक बसेर निर्णय गरिने बताउनुभयो । ‘अब अर्को एउटा मेची महाकाली अभियान चलाउँदै छु, हामी बैठक बसेर ७५३ वटै पालिकामा खबरदारी सभा गर्नेगरी हामी निर्णय गर्दै छौँ,’ अध्यक्ष प्रचण्डले भन्नुभयो, ‘मलाई विश्वास छ, उनीहरूको सातो त गइनै सकेको छ । उनीहरू होपलेस भइनै सकेका छन् । उनीहरूलाई होपलेस हुन दिनुपर्छ र हामीहरू नयाँ आत्मविश्वासका साथ एउटा नयाँ आन्दोलनमा हामी जानुपर्दछ ।’

प्रत्यक्ष निर्वाचित कार्यकारी प्रमुख नहुँदासम्म राजनीतिक स्थिरता हुँदैन : प्रचण्ड
अध्यक्ष प्रचण्डले प्रत्यक्ष निर्वाचित कार्यकारी प्रमुख नहुँदासम्म राजनीतिक स्थिरता नहुने भन्दै अब आफू त्यसैलाई एजेण्डा बनाएर आन्दोलित हुने बताउनुभएको छ । वाइसिएल नेपाल थाहा नगरपालिकाको दोस्रो नगर अधिवेशनमा बोल्दै पूर्व-प्रधानमन्त्रीसमेत रहनुभएका अध्यक्ष प्रचण्डले यस्तो बताउनुभएको हो । ‘यो देशमा जबसम्म प्रत्यक्ष निर्वाचित कार्यकारी प्रमुख हुँदैन र त्यो प्रमुखले पाँच वर्ष शासन गर्न पाउँदैन स्थिरता हुँदैन,’ अध्यक्ष प्रचण्डले भन्नुभयो, ‘बेथितिको अन्त्य हुँदैन । त्यसकारण प्रत्यक्ष निर्वाचित कार्यकारी प्रमुखको नारासहित सबै उत्पीडित जाति, वर्ग, लिंग र समुदायलाई आन्दोलित गर्ने हिसाबले एउटा नयाँ संकल्पसहित म जाँदै छु ।’ अध्यक्ष प्रचण्डले आफू अझै पाँच-सात वर्ष स्वस्थ हुने र नेपालमा जनताबाट प्रत्यक्ष निर्वाचित कार्यकारीको व्यवस्था नगरी विश्राम नलिने सुनाउनुभयो ।

‘यो सरकार केपी-शेरबहादुर मिलेर बनेको हैन’
माओवादी केन्द्रका अध्यक्ष प्रचण्डले केपी ओली नेतृत्वको सरकार कांग्रेस-एमाले मिलेर नबनेको जिकिर गर्नुभयो । माओवादी केन्द्रको नेतृत्ववाला सरकारले बिचौलिया, दलाल र पुँजीपतिको सेटिङ भत्काएपछि आत्तिएकाहरूले एमाले र कांग्रेस नेतृत्वलाई भेटेर सरकार फेर्न दबाब दिएपछि सरकार परिवर्तन भएको उहाँको दाबी थियो । अध्यक्ष प्रचण्डले आफूहरूको नेतृत्वको सरकारले भ्रष्टाचारीलाई धमाधम पक्राउ गर्न थाल्दा आत्तिएकाहरूले कुनै एउटा व्यवसायीको घरमा बसेर सरकार ढाल्ने कथा लेखेको सुनाउनुभयो । आफू अघिल्लो सरकारमा सके राम्रो गर्छु, तर नराम्रो गर्दिनँ र नराम्रो गर्न दिन्नँ भन्ने संकल्पसहित आएको र सोही अनुसारको काम गर्दा दलालहरूको सातो गएको उहाँका जिकिर थियो । आफ्नो कार्यकालमा अन्तर्राष्ट्रिय मञ्चमा समेत शिर उठाउने गरी राम्रा काम भएको बताउँदै अध्यक्ष प्रचण्डले संयुक्त राष्ट्रसंघमा जलवायु परिवर्तनबारे आफ्नो धारणा सुनेर राष्ट्रसंघका महासचिव नेपाल आएर नेपालबाट अन्तर्राष्ट्रिय सन्देश दिएको बताउनुभयो ।

अध्यक्ष प्रचण्डले कांग्रेस-एमालेले चाहेअनुसार माओवादी आन्दोलन नमर्ने दाबी गर्नुभयो । ३२ सिट हुँदा त एमाले–कांग्रेसको सातो गएको भन्दै उहाँले अबको निर्वाचनमा माओवादीले बहुमत ल्याउँदा उनीहरूको होस नै उड्ने बताउनुभयो । अध्यक्ष प्रचण्डले अब चाँडै माओवादीले देशको सबै जिल्ला, स्थानीय तहमा आन्दोलनको आँधीबेहरी सिर्जना गर्ने बताउनुभयो ।

ADVERTISEMENT

अध्यक्ष प्रचण्डले अहिलेको सरकारलाई देश लोडसेडिङ मुक्त भएको पटक्कै मन नपरेको टिप्पणी गर्नुभयो । देश चरम लोडसेडिङमा पुगेका बेला आफूले लोडसेडिङ मुक्त गर्नका लागि ऊर्जा मन्त्रीमा जनार्दन शर्मा र विद्युत् प्राधिकरणको कार्यकारी निर्देशकलाई आफूले नियुक्त गरेको उल्लेख गर्नुभयो । ‘देशमा लोडसेडिङ नभएको यो सरकारलाई मन परेको छैन । उनीहरू दलाल पुँजीपतिलाई विद्युत् महसुल तिर्न नपर्ने बनाउनका लागि र गरिब जनतालाई मात्र तिर्न बाध्य पार्न कुलमानलाई निकाल्न खोजेको निकै ठूलो चालबाजी तपाईंहरूले थाहा पाइसक्नु भएको छ । धेरै कुरा भनिराख्न आवश्यक नै छैन । एउटा प्रधानमन्त्रीले देशलाई अँध्यारोबाट उज्यालोतिर लाग्यो, अर्को प्रधानमन्त्रीलाई त्यो सहृय भएन, त्यसकारण उज्यालोबाट अँध्यारोतर्फ लान उद्यत् छ ।’

अध्यक्ष प्रचण्डले आफू प्रधानमन्त्री भएका बेला सरकारी जग्गा जालझेल गर्ने, आफ्नो नाममा लैजाने भूमाफियालाई गिरफ्तार गरेर कारबाहीका लागि हिरासत पु¥याएको तर अर्कोतिर तिनै व्यक्तिबाट अहिलेको प्रधानमन्त्रीले दान लिएर खुला रूपमा भ्रष्टाचारलाई संस्थागत गर्न खोजेको उल्लेख गरे ।

उहाँले आफू पहिलोपटक प्रधानमन्त्री भएका देशलाई रणनीतिक ढंगले एकताबद्ध गर्नुपर्छ भनेर मध्यपहाडी पुष्पलाल लोकमार्ग आफूले प्रस्ताव गरेको र त्यो अहिले पूर्ण हुने अवस्थामा रहेको जिकिर गर्नुभयो । त्यसले पहाडमा पूर्वदेखि पश्चिमलाई जोड्न लागेको उल्लेख गर्दै उत्तर दक्षिण जोड्ने मार्गहरू निर्माणको काममा पनि सफल भएको उल्लेख गर्नुभयो । कार्यक्रममा माओवादी केन्द्रका उपाध्यक्ष अग्नि सापकोटाले माओवादी आन्दोलन चिल भएको बताउनुभयो । चिलले आवश्यक परेको अवस्थामा हृवात्तै उडान बढाउनसक्ने भन्दै उहाँले माओवादलाई कमजोर नआँक्न चेतावनी दिनुभयो । अहिलेको सरकार भ्रष्टाचारको चंगुलमा फसेको बताउँदै उहाँले देशलाई भ्रष्टाचारको चंगुलबाट मुक्त गर्न माओवादी देशको नेतृत्वमा आएरै छाड्नुपर्ने धारणा राख्नुभयो ।