साफ महिला च्याम्पियनसिप : घरमै उपाधि राख्ने नेपालको लक्ष्य

काठमाडौं । साफ वुमन्स च्याम्पियनसिप २०२४ को उपाधिका लागि आज (बुधबार) नेपाल र बंगलादेश भिड्दै छन् । दुई देशबीचको फाइनल खेल साँझ काठमाडौंस्थित दशरथ रंगशालामा हुनेछ । यसअघि २०२२ मा काठमाडौंमै भएको साफमा पनि यी दुई टोली भिडेका थिए । जहाँ नेपाललाई हराएर बंगलादेश पहिलोपटक च्याम्पियन बनेको थियो । यसपालि नेपाललाई घरेलु मैदानमा दुई वर्षअघिको बदला लिएर च्याम्पियन बन्ने अवसर छ ।

सातौँ संस्करणको च्याम्पियनसिपको पहिलो सेमिफाइनलमा साबिक विजेता बंगलादेशले भुटानलाई ७-१ ले हराएर फाइनलमा स्थान बनाएको हो । घरेलु टोली नेपालले भने तनावग्रस्त सेमिफाइनलमा पाँचपटकको विजेता भारतलाई पेनाल्टी सुटआउटमा ४-२ ले पराजित गर्दै फाइनल पुगेको हो । दक्षिण एसियाली महिला फुटबलमा भारतको दबदबा छ । ६ संस्करणमा ऊ पाँचपटकको विजेता हो । तर, यसपालि भने फाइनल पुग्न सकेन ।

सन् २०१० बाट सुरु भएको साफ च्याम्पियनसिपको एक दशकमा भारतले जतिपटक उपाधि उचालेको छ, त्यति नै पटक फाइनलमा पुगेर नेपाल पराजित भएको छ । नेपालले पाँचपटक फाइनल खेलिसक्यो तर कहिल्यै उपाधि जित्न सकेको छैन । नेपाल समग्रमा छैटौँ पटक र बंगलादेश तेस्रो पटक फाइनल पुगेको हो । लगातार तेस्रो पटक घरेलु मैदानमा साफ वुमन्स च्याम्पियनसिप खेलिरहेको नेपाली टोली यसपटक च्याम्पियन बन्ने लक्ष्यमा छ ।

महिला साफ च्याम्पियनसिपको आयोजकका रूपमा भने नेपालले यसपालि हृयाट्रिक गरेको छ । दक्षिण एसियाका महिला फुटबल प्रतियोगिताको यो सातौँ संस्करण हो । पाँचौँ र छैटौँ साफको पनि आयोजक राष्ट्र नेपाल नै थियो ।

नतिजा आफ्नो पक्षमा पार्ने दाबी
साफ महिला च्याम्पियनसिपको उपाधिका लागि आज (बुधबार) नेपाल र बंगलादेशबीच हुने प्रतिस्पर्धाका लागि दुवै टोली तयार रहेको नेपाल र बंगलादेशका कप्तान तथा प्रशिक्षकले बताएका छन् । खेलअघि मंगलबार रंगशालामा आयोजित प्री-म्याच कन्फ्रेन्समा नेपालका मुख्य प्रशिक्षक राजेन्द्र तामाङले बलियो टिम बंगलादेशलाई पराजित गर्दै उपाधि जित्ने लक्ष्यका साथ नेपाली टोली मैदान उत्रने बताउनुभयो ।

यसअघि भएका खेलमा देखिएका गल्तीलाई सुधार गरेर फाइनल खेल्ने उहाँको भनाइ थियो । उहाँले महिला फुटबलमा दर्शकको समर्थनले थप हौसला मिलेको धारणा राख्नुभयो ।

त्यस्तै नेपाली राष्ट्रिय महिला फुटबल टिमकी कप्तान एन्जिला तुम्बापोले उपाधि जित्नेमा विश्वस्त रहेको बताउनुभयो । नेपालले मौलिक खेल देखाउने र खेल आफ्नो पक्षमा पार्ने उहाँको भनाइ थियो । उहाँले साफमा उपाधि जित्ने अवसर भएकाले मौका खेर नफाल्ने पनि बताउनुभयो । त्यस्तै बंगलादेशका कप्तान तथा प्रशिक्षकले पनि उत्कृष्ट खेल प्रदर्शन गर्ने र नजिता आफ्नो पक्षमा पार्ने बताए ।

एन्फा आफैँले टिकट बिक्री गर्ने, अनलाइन बुकिङ रद्द
नेपाल र बंगलादेशबीच हुने फाइनल खेलको टिकट अखिल नेपाल फुटबल संघ (एन्फा) आफैंले बिक्री गर्ने भएको छ । साफ महिला च्याम्पियनसिपको आज (बुधबार) हुने फाइनलका लागि तीन स्थानमा काउन्टर राखेर टिकट बिक्री गर्ने भएको हो । एन्फाले मंगलबार पत्रकार सम्मेलन गरेर टिकट बुधबार बिहान ८ बजेबाट जावलाखेलको फुटबल मैदान, एन्फा कम्पुले र भद्रकाली आर्मी गेटबाट बिक्री हुने जनाएको हो । अधिकतम १० हजार टिकट बिक्री हुने गरिने छ । एक व्यक्तिले भिआइपी दुई र साधारण पाँच टिकट मात्र किन्न पाउने एन्फाले जनाएको छ ।

नेपाल र भारतबीच आइतबार भएको सेमिफाइनल खेलमा करिब १५ हजार दर्शक क्षमता रहेको रंगशालामा १८ हजार बढीलाई टिकट बिक्री भएको थियो । त्यसपछि फाइनलका लागि भइरहेको टिकट बिक्री रोकिएको थियो ।

अनलाइन टिकट नबेच्ने र यसअघि अनलाइन खरिद गरेकाको पैसा फिर्ता हुने पत्रकार सम्मेलनमार्फत जानकारी गराइएको छ । माउन्ट एभरेस्ट स्पोर्ट्स एन्ड इभेन्ट्स प्रालिले टेन्डर प्रक्रियामार्फत ८० लाख रुपैयाँमा टिकेटिङ अधिकार लिएको थियो ।

ADVERTISEMENT

‘रंगशालाभित्र पानीका बोतल नल्याउनु’
अखिल नेपाल फुटबल संघ (एन्फा)ले यही आज हुने साफ महिला च्याम्पिसयनसिपको फाइनल खेल हेर्न आउने दर्शकका लागि दशरथ रंगशालाभित्र प्रवेश गर्दा कतिपय वस्तु ल्याउन निषेध गरेको छ । मंगलबार सूचना प्रकाशित गरी एन्फाले खेल मैदानमा उपस्थित व्यक्तिहरूको सुरक्षा र व्यवस्थित वातावरणलाई मध्यनजर गर्दै, केही सामग्रीहरूमाथि रंगशाला भित्र लैजान निषेध गरिएको जनाएको छ ।

एन्फाका अनुसार प्रतिबन्धित सामग्रीहरूमा हातहतियारः बन्दुक, छुरा, र अन्य कुनै पनि प्रकारका धारिला, हातहतियार, धुम्रपान र आगो बाल्ने सामग्रीः चुरोट, लाइटर, सलाइ आदि, मादक पदार्थः मदिरा र अन्य नशालु पदार्थहरू, झोला र ठूला ब्यागहरूः साना ब्यागहरू जाँचपछि मात्र अनुमति दिइनेछ, तर ठूला ब्यागहरू निषेध गरिएका छन्, हेल्मेट र सुरक्षात्मक उपकरणहरूः हेल्मेट र यस्तै सुरक्षा सामग्रीहरू, प्रचार सामग्रीः अनुमति बिना ब्यानर, झण्डा, पोस्टर आदिमा निषेध गरिएको छ ।

यस्तै, प्रक्षेपण गर्न मिल्ने वस्तुहरूः पानीको बोतल, क्यान, पत्थर, र अन्य फ्याँक्न मिल्ने, धातुका मुद्रा क्याइन, सामग्रीहरू, लेजर लाइटः खेलाडी तथा रेफ्रीलाई लक्षित गर्ने लेजर लाइट, ड्रग्स र अन्य अवैध पदार्थः कुनै पनि प्रकारका लागू औषधहरू, छाता, लिबिस्टिक, नेल कटर, कैँची, काइयो निषेध गरिएको छ ।

‘एन्फाको तर्फबाट सबै दर्शकहरूलाई सुरक्षित र शान्तिपूर्ण वातावरणमा खेलको आनन्द उठाउन अनुरोध छ’ सूचनामा भनिएको छ, ‘सबैले नियमहरूको पालना गरी खेलकुदप्रति सम्मान जनाउनु हुनेछ भन्ने अपेक्षा राखिएको छ ।’

भारतले साफमा उजुरी गर्ने
अखिल भारतीय फुटबल महासंघ (एआईएफएफ)ले साफ महिला च्याम्पियनसिपको सेमिफाइनलमा नेपालले एक घण्टाभन्दा बढी समय खेल रोकेको भन्दै दक्षिण एसियाली फुटबल महासंघ (साफ) उजुरी गर्ने भएको छ ।

भारतीय सञ्चारमाध्यमका अनुसार यही कात्तिक ११ (अक्टोबर २७) मा भारत-नेपालबीचको सेमिफाइनलमा भएको विवादप्रति आफ्नो ध्यानाकर्षण भएको जनाउँदै यसविरुद्ध साफमा पत्र पठाउने निर्णय गरेको हो ।

एआईएफएफले जारी गरेको विज्ञप्तिमा भनिएको छ, ‘एआईएफएफले यो घटनाबारे साफलाई पत्र लेख्नेछ र उपयुक्त मञ्चमा यो मुद्दा उठाउनेछ । भारतको अन्डर-१९ महिला टोलीले पनि भर्खरको साफ प्रतियोगितामा झन्डै यस्तै अवस्थाको सामना गर्नुपरेको थियो र एआईएफएफले यस क्षेत्रको फुटबलको विकासका लागि यस्ता कुरा राम्रो नहुने ठानेको छ ।’

गत आइतबार साँझ काठमाडौंस्थित दशरथ रंगशालामा भएको सेमिफाइनल खेलको ७१औँ मिनेटमा संगीता बासफोरले गरेको गोलमा भारतले सुरुवाती अग्रता लिएको थियो । तर, लगत्तै नेपालकी प्रिती राईले गोल फर्काउनुभएको थियो । तर, रेफ्रीले गोलको मान्यता नदिएपछि केही बेर तनाव भएको थियो । भुटानी रेफ्री ओम चुकीको निर्णयविरुद्ध नेपाली पक्षले विरोध गर्दा खेल एक घण्टाभन्दा बढी समय रोकिएको थियो ।

सहमतिपछि पुनः सुरु भएको खेलमा १० खेलाडीमा सीमित भएको नेपाली टोलीले गोल फर्काएपछि खेल टाइब्रेकरमा गएको थियो । जसमा भारतलाई चार-दुई गोलअन्तरले हराउँदै नेपाल फाइनलमा पुगेको हो ।