पिपल्स च्वाइस विद्याको मनोनयन सार्वजनिक

काठमाडौं । नेपाल खेलकुद पत्रकार मञ्चले ‘एनएसजेएफ पल्सर स्पोर्टस अर्वाड’को २१औं संस्करणका लागि पिपल्स च्वाइस अवार्डको मनोनयन सार्वजनिक गरेको छ । मञ्चले शुक्रबार एक कार्यक्रमबीच पिपल्स च्वाइस अवार्डका लागि विभिन्न पाँच खेलाडीको नाम सार्वजनिक गरेको हो । पिपल्स च्वाइस अवार्डका लागि राष्ट्रिय क्रिकेट टोलीका सदस्य गुलशन झा, भलिवल खेलाडी कविता भट्ट, कबड्डी खेलाडी मानमती विष्ट, फुटबल खेलाडी प्रीति राई र रग्बी खेलाडी श्रीराम श्रष्ठलाई समावेश गरेको छ । मनोनयनमा परेका पाँच खेलाडीमध्येबाट एकजनाले यो अवार्ड प्राप्त गर्ने आयोजक नेपाल खेलकुद पत्रकार मञ्चले जनाएको छ । स्पोर्टस अर्वाड भदौ २८ गते काठमाडौंमा आयोजना हुँदैछ ।

पिपल्स च्वाइस विधाको विजेता मञ्चका सदस्य र राष्ट्रिय प्रशिक्षक तथा इ-सेवा र फेसबुक पेजमा खेलप्रेमीले गर्ने मतका आधारमा चयन हुनेछ । खेलप्रेमीले इ-सेवामा गरेको मतको मतभार ५० प्रतिशत, फेसबुकमा गरेको मतको भार २५ प्रतिशत तथा खेल पत्रकार र राष्ट्रिय प्रशिक्षकको मतको भार समान १२.५ प्रतिशत हुने मञ्चका महासचिव एवं अवार्डको खेलाडी छनोट समितिका संयोजक प्रज्ज्वल ओलीले जानकारी दिनुभयो ।

नेपाली खेलकुदकै सबैभन्दा ठूलो अवार्डका रूपमा स्थापित पल्सर स्पोर्टस अवार्डमा मञ्चले यसपालि १० विधा समावेश गरेको छ । जस अनुसार वर्षको उत्कृष्ट पुरुष खेलाडी, महिला खेलाडी, युवा खेलाडी, प्रशिक्षक र पिपल्स च्वाइस विधा छन् । यसैगरी पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड, एसियन स्पोर्टस जर्नालिस्ट अवार्ड र टिम अफ दी इयर विधा पनि अवार्ड कार्यक्रममा समावेश हुनेछन् ।

उत्कृष्ट घोषित हुने पुरुष, महिला, युवा खेलाडी तथा प्रशिक्षकले पुरस्कारस्वरुप पल्सर एनएस २०० मोटरसाइकल प्राप्त गर्नेछन् भने पिपल्स च्वाइस विधाका विजेताले पल्सर एनएस ४०० पाउने मञ्चले जनाएको छ । यसैगरी अन्य विधाका विजेताले जनही एक लाख रुपैयाँ पाउने बताइएको छ । पिपल्स च्वाइस विधाका लागि भोटिङ पार्टनरका रूपमा मञ्चले शुक्रबारै इ-सेवासँग सम्झौता गरेको छ ।

यसपटक पिपल्स च्वाइस अर्वाडको मनोनयनमा परेका खेलाडीमध्ये गुलशन झा राष्ट्रिय क्रिकेट टोलीका महत्वपूर्ण सदस्य हुनुहुन्छ । नेपाललाई पहिलो पटक एसिया कपमा छनोट गराउने क्रममा उहाँले एसिसी प्रिमियर कपको फाइनलमा युएईविरुद्ध बलबाट १ विकेट लिनुका साथै ब्याटबाट अविजित ६७ रनको महत्वपूर्ण योगदान गर्नुभएको थियो । १६ वर्षको उमेरमै राष्ट्रिय टिमबाट मैदान उत्रिनुभएका नेपाल पुलिस क्लबका अलराउण्डर गुलशनले आइसिसी एसिया ट्वान्टी-२० विश्वकप एसिया छनोटको फाइनलमा ओमानविरुद्ध नेपालबाट सर्वाधिक ५४ रन बनाउनुभएको थियो ।

ADVERTISEMENT

यस्तै, विभागीय टोली एपीएफबाट घरेलु भलिबल खेल्ने राष्ट्रिय खेलाडी कविता भट्ट नेपालले हालै त्रिपुरेश्वरमा सम्पन्न काभा महिला नेसन्स लिगमा दोस्रो स्थान हासिल गर्दा टिमकी महत्वपूर्ण सदस्य हुनुहुन्थ्यो । अघिल्लो वर्ष यही प्रतियोगितामा कांस्य पदक जित्दा पनि टिममा रहनुभएकी उहाँले चीनको हान्झाउमा सम्पन्न १९औं एसियाली खेलकुदमा पनि नेपालको प्रतिनिधित्व गर्नुभएको थियो । गतवर्ष एपीएफले ढोरपाटन महिला डबल लिग, केएनपी राष्ट्रिय महिला च्याम्पियनसिप तथा टाइगर कपमा उपाधि जित्दा उहाँको भूमिका महत्वपूर्ण थियो ।

यस्तै, मानमती विष्टले चीनको हान्झाउमा सम्पन्न १९औं एसियाली खेलकुदमा कबड्डीमा रेड र डिफेन्स दुवैमा उत्कृष्ट प्रदर्शन गर्नुभएको थियो । नेपालले एसियाली खेलकुदमा टिम खेलबाट कास्य पदक जितेको थियो । १२औं दक्षिण एसियाली खेलकुद (साग)मा एथ्लेटिक्सबाट भाग लिनुभएकी मानमतीले १३औं सागमा भने रजत पदक जित्नुभएको थियो ।

यस्तै, महिला राष्ट्रिय फुटबल टोलीकी मिड्फिल्डर प्रीति राईले १६ वर्षको उमेरमै राष्ट्रिय टोलीबाट ‘डेब्यु’ गर्नुभएको थियो । गतवर्ष साउदी अरेबियामा सम्पन्न आठौं वाफ वुमेन्स च्याम्पियनसिपमा नेपाल उपविजेता हुँदा प्रीतिको प्रदर्शन प्रशंसायोग्य थियो । लेबनानविरुद्ध सेमिफाइनलमा उहाँले निर्णायक गोल गनुृभएको थियो ।

यस्तै नेपालमा आधुनिक रग्बी खेल सुरु गर्दा श्रीराम श्रेष्ठ राष्ट्रिय खेलकुदमा बागमती प्रदेशलाई च्याम्पियन बनाउने कप्तान हुनुहुन्छ । चीनको हान्झाउमा सम्पन्न १९औं एसियाली खेलकुद खेल्दा नेपाली टिमका मुख्य खेलाडी श्रीरामले ओलम्पिक छनोटका साथै तीनपटक एसियन रग्बी सेभेन्स खेल्नुभएको छ ।