गीतकार संघ नेपालले १५औं स्थापना दिवस सम्पन्न

काठमाडौं । गीतकार डा.भोला रिजाललाई ‘अमर भावना राष्ट्रिय स्रष्टा सम्मान’ अर्पण गरिएको छ । सोमबार काठमाडौंमा एक विशेष समारोहबीच गीतकार संघ नेपालले १५औं स्थापना दिवसका अवसरमा संस्कृति, तथा नागरिक उड्डयन मन्त्री हितबहादुर तामाङको प्रमुख आतिथ्यतामा डा.रिजाललाई उक्त सम्मान अर्पण गरिएको हो । डा.रिजाललाई एक लाख ५१ हजार रुपैयाँसहित माला र ताम्रपत्रद्वारा सम्मान अर्पण गरिएको थियो ।

त्यसैगरी, मैथिली गीतकार अशोक दत्तलाई २५ हजार २५२ नगद राशिसहित ‘विष्णु मनसरा मातृभाषा २०८०’ प्रदान गरिएको थियो । समारोहमा अमेरिकामा कार्यरत पद्मा लिंखा मगरलाई १५ हजार राशिसहितको ‘वर्ष डायस्पोरा गीतकार सम्मान’ प्रदान गरिएको थियो ।

त्यस्तै, ‘भैरवनाथ रिमाल (कदम) वर्ष गीत पुरस्कार पुरस्कार-२०८०’ मा छनौटमा परेका १० गीत मध्येबाट दुई गीतलाई पुरस्कृत गरिएको छ । मदनमाबो लिखित ‘आमा’ र विष्णु भण्डारी लिखित ‘चाहना हो तिमी मेरो’लाई पुरस्कृत गरिएको थियो । माबो र भण्डारीलाई जनही २८ हजार ५०० रुपैयाँसहित पुरस्कृत गरिएको थियो । गीतकार संघमा आबद्ध सदस्यहरूले २०८० सालका लागि दर्ता भई छनौटमा परेका १० गीतबाट यी दुई गीत उत्कृष्ट भएका हुन् ।

यस वर्षको ‘जगतमर्दन थापा वर्ष गीत पुस्तक पुरस्कार-२०८०’बाट दुई गीति पुस्तक पुरस्कृत भए । गीतकार पूर्णबहादुर साउद शिरिष लिखित ‘आधाआधी’ र जनक वाग्ले लिखित ‘मैना चरी कहाँ गई’ पुरस्कृत भएका हुन् । साउद र वाग्लेलाई जनही २८ हजार ५०० रुपैयाँसहित पुरस्कृत गरिएको थियो ।

कार्यक्रममा प्रमुख अतिथि मन्त्री तामाङले गीतकार संघ र समग्र कलाकारिता क्षेत्रमा आफूले सक्ने सहयोग गर्ने प्रतिबद्धता जनाउनुभएको थियो । सम्मानीत गीतकार डा.रिजालले ‘गीतकार संघले आफूलाई दिएको यो सम्मानले अझ ऊर्जाशील बनाएको बताउनुभयो । उहाँले दराजमा राखिएका पाण्डुलिपीहरूलाई अब चाँडै मूर्तरूप दिने बताउनुभयो ।

ADVERTISEMENT

विशिष्ट गीतकार राजेन्द्र थापाले संघको प्रशासनिक पक्षलाई मजबुत बनाउन अझै सोच्नुपर्ने बताउनुभयो । उहाँले ६० वर्षसम्म नियमित कलम चलाउनुभएका गीतकार रिजाललाई सम्मान गर्न झण्डै ढिला भएको जिकिरसहित बधाई तथा शुभकामना दिनुभएको थियो । समारोहलाई सम्बोधन गर्दै संगीतकार संघ नेपालका अध्यक्ष तथा प्राज्ञ चेतन सापकोटाले गीतकार र संगीतकारहरू राज्यका ‘आविश्कारक’ भएको बताउनुभयो ।

संघका सल्लाहकार एवं अक्षयकोषका संरक्षक अमर बान्तुले भोला रिजाल जस्तो व्यक्तित्वलाई सम्मान गर्न पाउँदा सम्मानकै थप उचाइ बढेको बताउनुभयो । प्रतिलिपि रजिष्ट्रार कार्यालय प्रमुख पुण्यमाया गुरागाईंले कार्यक्रमलाई सम्बोधन गर्दै गीतसंगीतका क्षेत्रमा आफू नयाँ भए तापनि पूर्ण सहयोग गर्ने प्रतिबद्धता व्यक्त गर्नुभयो ।

समारोहका सभा अध्यक्ष एवं संघका अध्यक्ष वसन्त वित्यासी थापाले संघद्वारा सम्मान गर्ने संस्कारलाई निरन्तरता दिएको बताउनुभयो । उहाँले गीतकारहरूलाई राज्यबाट नीतिगत रूपमै सम्बोधन हुनुपर्ने उल्लेख गर्नुभयो । कार्यक्रमा यो वर्ष संघको आजीवन सदस्यता लिएकाहरूलाई प्रमाणपत्रसमेत प्रदान गरिएको थियो । गीतकार संघ नेपालका कोषाध्यक्ष चेतन खतिवडाले स्वागत मन्तव्य राख्नुभएको कार्यक्रमको सञ्चालन संघका उपाध्यक्ष रमेश कोइरालाले गर्नुभएको थियो ।

कार्यक्रममा गीतकार संघका संस्थापक अध्यक्ष कृष्णहरि बराल, गीतकार एवं पूर्वअर्थमन्त्री एसपी कोइराला, पूर्वअध्यक्ष एवं सल्लाहकार चुडामणि देवकोटा, अग्रज गीतकार विश्ववल्लभ लगायतको आतिथ्यता रहेको थियो ।