युवा पुस्ताको चौतारी संरक्षण अभियानले पाको पुस्ता खुसी

म्याग्दी । म्याग्दीमा पछिल्लो समय चौतारी निर्माण र संरक्षणमा युवा पुस्ताको चासो बढ्दै गएपछि पाको पुस्तामा खुसीयाली छाएको छ ।
जिल्लाका बेनी नगरपालिका लगाएत मंगला,मालिका, अन्नपूर्ण,रघुगंगा र धौलागिरि गाउँपालिकाका युवाहरुले यहाँ रहेका पुराना चौतारीहरुको संरक्षणका साथै नयाँ चौतारीहरु निर्माण गर्न थालेपछि पाकोपुस्ता पुरानो विरासतको संरक्षण हुन लागेकोमा खुसी भएका हुन् ।

चौतारी संरक्षण र निर्माण अभियानमा यहाँका युवाहरुका साथै जनप्रतिनिधिहरु पनि खटिन थालेका छन् । कतिपय वडा कार्यालयहरुले बजेट नै पारेर आफ्नो क्षेत्रमा रहेका पुराना चौतारीहरुको पुनःनिर्माण र आवश्यक ठाउँमा नयाँ चौतारी निर्माण कार्य गरिरहेका छन् ।

जिल्लाको बेनी नगरपालिका वडा नं ६ अर्थुङ्गे ,वडा नं ७ बेनी,वडा नं २ ज्यामरुककोट, वडा नं १ रत्नेचौर लगायत मंगला, मालिका, धौलागिरि,रघुगंगाा र अन्नपूर्ण गाउँपालिकाका जनप्रतिनिधिहरुसमेत चौतारी निर्माण र संरक्षण अभियानमा जुटेका स्थानीयले बताएका छन् ।
यसैक्रममा मंगला गाउँपालिका–२,खुम्लियामा सातदशक अगाडी बनेको चौतारी पुनःनिर्माण तथा संरक्षण अभियानमा स्थानीय खुम्लिया यूवा क्लव जुटेका छन् ।

बेनी–दरबाङ सडक अन्तरगगत सिम–कुहुँ–टोड्के जोड्ने सडकखण्डको खुम्लियामा रहेको पिपलको रूख सुकेपछि प्रयोगविहिन बनेको चौतारीलाई नयाँ स्वरुपमा मर्मत तथा बर–पिपल रोपण गरिने भएको हो ।

तत्कालिन समयमा भरिया र बटुवा, घाँसदाउराका लागि बनजंगलमा जाने स्थानीयबासीलाई लक्षित गरी स्वर्गीय टेकबहादुर घर्ती मगरद्धारा निर्मित चौतारी सडक सञ्जालको विस्तार र उचित संरक्षणको अभावका कारण पिपल सुकेपछि चौतारी समेत जिर्ण भएको खुम्लिया यूवा क्लवका उपाध्यक्ष तेजेन्द्र आचार्यले बताउनुभयो ।

“चौतारीको पूरानो इतिहास छ, कुनै समय गाउँघरमा भेला, बैठक, चौतारीमै बस्दथे,अब सधै प्रयोग हुने गरी पुननिर्माण गछौंँ” उपाध्यक्ष आचार्यले भन्नुभयो ।

धार्मिक मान्यता र पर्यावरणीय शुद्धतासँग सम्वन्धित वर–पिपल रोपेर बस्न मिल्ने गरी चौतारी बनाइने र खानेपानीको धारा निर्माणका लागि समेत गाउँपालिका सहित अन्य संघसंस्थालाई समेत सहयोग मागिने छ ।

ADVERTISEMENT

तत्कालिन समयमा टोड्केमा रहेको स्वर्गाद्धारीको शाखा आश्रमबाट पैदल हिडेर पश्चिम म्याग्दी हुदै बागलुङबाट प्युठानको स्वर्गद्धारीमा जाने धार्मिक भक्तजनहरुले चौतारी आसपासमा भोजन गर्ने स्थल बनाएर समेत बस्ने गरेको स्थानीय बुढापाकाको भनाई छ ।

चौतारी आसपासमा होडिङ बोर्ड राखेर दाताको सहयोग तथा धार्मिक तथा पर्यटकीयस्थलको प्रचारप्रसार समेत गर्ने योजना छ । चौतारी बनाएका दाताका आफन्त झलकबहादुर घर्तीमगरले पुर्खाले बनाएको चौतारी बनाउन आफ्नो तर्फबाट सहयोग हुने बताउनुभयो । चौतारी नजिकैको डिलबाट म्याग्दी नदी, ताराखेत, बरंजाको सातविसे लगायतका बस्तीहरु देखिन्छ ।

गाउँपालिकाहरुदुई दशक अघिसम्म भरिया र बटुवाले भरिभराउ हुने चौतारी जीर्ण हुन थालेपछि स्थानीय तह र समुदाय दुवै चौतारी संरक्षणमा लागेका हुन् । कुनै समय गाउँघरमा भेला, बैठक, कचहरी, सभा चौतारीमै वस्ने गरिन्थ्यो । तर,पछिल्लो समय सुविधायुक्त सामुदायिक भवन बन्न थालेपछि भवनको हलमा नै वैठक तथा सभा हुन थालेपछि गाउँघरमा रहेका चौतारीहरु प्रयोग विहीन हुन थालेका बेनी नगरपालिका २ का ७९ वर्षिय टेकबहादुर कार्कीले बताउनुभयो ।

धर्मका लागि चौतारी चिन्ने, वर र पीपलका रुख रोप्ने, पानी धारा बनाउने, पोखरी खन्ने चलन थियो । सडक यातायातको विकास र समाजमा आएको परिवर्तनसँगै चौताराको प्रयोग घटेको छ । सार्वजनिक जग्गा जमिन र खाली ठाउँ नभएको म्याग्दी सदरमुकाम बेनी बजारमा रहेका परम्परागत चौतारीलाई संरक्षण र व्यवस्थित गर्न जनप्रतिनिधिले चासो दिएका छन् । बेनी नगरपालिका–७ मा पर्ने चौतारीको संरक्षण थालिएको छ ।
वडाध्यक्ष रमेशकुमार श्रेष्ठले बजारवासीलाई शीतलता र बटुवालाई विश्रामका लागि पुराना चौतारीलाई व्यवस्थित गरेर प्रतीक्षालयमा रुपान्तरण गर्न थालिएको बताउनुभयो । “अहिलेका प्रतीक्षालयजस्तै पहिलेका चौतारीको महत्व छ”, उहाँले भन्नुभयो “धार्मिक, जैविक विविधताको संरक्षण र विश्रामको सुविधाका लागि जीर्ण चौतारीको पुनःनिर्माण गर्न थालेका हौँ ।”

बेनी नगरपालिकाको वडा नम्बर ७ मा १८ वटा चौतारी र एक वटा पोखरी छन् । चौतारी मर्मतका लागि गत आर्थिक वर्ष २०७९/८० मा बेनी नगरपालिकाले रु चार लाख ५० हजार विनियोजन गरेको छ । सो बजेटबाट नगरपालिकाको प्रवेशद्वार, बेनी सामुदायिक र जिल्ला प्रशासन कार्यालय अगाडिको चौतारी संरक्षण गर्न थालिएको छ ।

गत आवमा विनियोजन भएको रु एक लाख २७ हजार बजेटबाट मालपोत कार्यालय अगाडिको चौतारी मर्मत गरिएको थियो । सो चौतारीको नजिकै बेनी बजार अवस्थित बेनी नगरपालिकाको ७ र ८ नम्बरबाहेकका वडाको पहिचान झल्कने होडिङ बोर्ड राख्ने तयारी भएको छ ।
त्यसैगरी ज्यामरुककोटमा रहेका पाँचओटा चौतारीको पनि पुननिर्माण गरिएको बेनी नगरपालिका वडा नं २ का वडाअध्यक्ष यामबहादुर कार्कीले बताउनुभयो ।