काठमाडौं । सभापति शेरबहादुर देउवाले नेपाली कांग्रेसको केन्द्रीय समिति बैठक आह्वान गर्नुभएको छ ।
सभापति देउवाले लामो समय पछि असार २७ गतेदेखि सुरू हुने गरी केन्द्रीय समिति बैठक आह्वान गर्नुभएको हो ।
बुधबार देउवा निवास धुम्बाराहीमा सभापति, उपसभापति र महामन्त्रीहरूबीच भएको बैठकले केन्द्रीय समिति बैठक आह्वान गर्ने निर्णय गरेको थियो ।
पार्टीका पदाधिकारीको आजको छलफलपछि असार २७ गते दिउँसो १ बजेका लागि केन्द्रीय समितिको बैठक बोलाइएको कांग्रेसका कार्यवाहक मुख्यसचिव डा प्रदीप पराजुलीले जानकारी दिनुभयो ।
पार्टी केन्द्रीय कार्यालय सानेपामा बस्ने बैठकमा समसामयिक राजनीतिक विषयका साथै पार्टी सङ्गठनका विविध विषयमा छलफल हुने उहाँले बताउनुभयो । कांग्रेस केन्द्रीय समिति बैठक झन्डै एक वर्षपछि बस्न लागेको हो ।
गत वर्ष साउनमा कांग्रेसको केन्द्रीय समिति बैठक बसेको थियो । उक्त बैठक २७ असारदेखि २ साउनसम्म बसेको थियो । तर, कांग्रेसको विधानअनुसार प्रत्येक दुई महिनामा केन्द्रीय समिति बैठक बस्नुपर्ने हुन्छ।
केन्द्रीय समिति ठूलो भएको र तत्कालै बैठक बस्न असम्भव रहने भन्दै कांग्रेसले महत्वपूर्ण निर्णय पनि केन्द्रीय कार्यसम्पादन समितिमार्फत गर्दै आएको थियो।
Like
Love
Happy
Surprised
Sad
Excited
Angry
