काठमाडौं । नेपाली हलहरूमा आजबाट हिन्दी चलचित्र प्रदर्शन भएका छन् ।
उच्च अदालत पाटनको अल्पकालीन अन्तरिम आदेशसँगै काठमाडौं महानगरपालिकाले फिल्म हलहरूबाट नगर प्रहरी फिर्ता गरेसँगै हलहरूमा हिन्दी चलचित्र प्रदर्शन भएका हुन् ।
बिहीबार हलहरूमा १०/१० जना नगर प्रहरी खटाएर हिन्दी फिल्म रोक्न आदेश दिएको महानगरले आज बिहान आठ बजे सबै नगर प्रहरी फिर्ता बोलाएको हो ।
मेयर बालेन शाहले हिन्दी चलचित्र आदिपुरुषमा सीताको बारेमा विवादास्पद संवाद राखेको भन्दै सबै हिन्दी फिल्म चलाउन रोक लगाउनुभएको थियो । तर उच्च अदालत पाटनले बिहीबार भारतीय चलचित्रलगायत सेन्सर बोर्डले स्वीकृत गरेका चलचित्रको प्रदर्शन नरोक्न अल्पकालीन अन्तरिम आदेश दिएको थियो ।
हिजो बसेको चलचित्र संघको बैठकले आजबाट हिन्दी सिनेमा प्रदर्शन गर्ने निर्णय गरेको थियो ।
काठमाडौं महानगरपालिकाका मेयर बालेन शाहले भने अदालतको फैसला नमान्ने भन्दै कुनै पनि हालतमा ‘आदिपुरुष’ र हिन्दी सिनेमा प्रदर्शन गर्न नदिने बताउनुभएको थियो ।
‘आदिपुरुष’मा जानकी भारतकी छोरी हुन् भन्ने आसयको संवाद नहटाएसम्म उक्त सिनेमासहित कुनै पनि हिन्दी सिनेमा प्रदर्शन हुन नदिने बालेनले बताउँदै आउनुभएको थियो। सोही कारण ‘आदिपुरुष’ प्रदर्शन रोकिएको थियो ।
Like
Love
Happy
Surprised
Sad
Excited
Angry
