सरकारको काम पर्याप्त नभएको एमालेको निष्कर्ष

काठमाडौं । नेकपा (एमाले)ले सरकारको काम पर्याप्त नभएको निष्कर्ष निकालेको छ । बिहीबार केन्द्रीय कार्यालय च्यासलमा बसेको सचिवालय बैठकमा एमालेले सरकारको ६ महिनाको कामको समीक्षा गरेको हो । ‘नेकपा (एमाले) को निष्कर्ष के हो भने यति मात्रै काम पर्याप्त छैन । सरकारले अझ बढी पुस गरोस्, सरकारले अझ बढी गति देओस्, दुईवटा दल मिलेर बनेको, अरू पार्टीको समर्थनमा समेत बनेको शक्तिशाली सरकार हो । त्यसले त्यहीअनुरूप नै प्रभावकारी ढंगले दिनुपर्छ भनेर हामीले सुझाव दिएका छौँ,’ बैठकको निर्णय सुनाउँदै उपमहासचिव प्रदीपकुमार ज्ञवालीले भन्नुभयो । यसबीचमा सरकारले दुई राजनीतिक दलको बीचमा विश्वासको वातावरण बनाउँदै स्थिरताको सन्देश दिन सकेको उहाँले बताउनुभयो । अर्थतन्त्र अपेक्षित रूपमा प्रगति नभए पनि गएको चौमासिकमा अघिल्लो चौमासिकको तुलनामा १७ प्रतिशत राजस्व वृद्धि भएको उहाँले बताउनुभयो ।

बैठकमा सरकारले ठोस कामहरूबारे पनि छलफल भएको उहाँले बताउनुभयो । सरकार बनेको पहिलो दिन नै २२ सदस्यीय मन्त्रिपरिषद् गठन, नेपाली कांग्रेस र एमालेका बीचमा राजनीतिक संयन्त्र गठन गरेर राजनीतिक स्थायित्वको विश्वास दिलाउने काम भएको ज्ञवालीले सुनाउनुभयो । राजनीतिक संयन्त्रअन्तर्गत कार्यदल बनाएर सरकारले गर्नुपर्ने कामको नौवटा क्षेत्रहरूमा प्रष्ट भएको ज्ञवालीले बताउनुभयो । ‘संविधान संशोधन, संघीयताको कार्यान्वयन, संसद्मा विचाराधीन विधेयकहरू छिटो टुंग्याउने,’ ज्ञवालीले भन्नुभयोे, ‘यी विषयहरूमा दुई दलका बीचमा विश्वासको वातावरण बनाएर स्थिरताको विश्वास दिलाउन सकेको छ ।’

‘सेयर बजार माथि नै छ । लगानी, वैदेशिक सहायता, ऋण, निजी क्षेत्रमा लगानी बढेको छ । आर्थिक क्षेत्रमा अगाडि बढेको छ । बंगलादेशसँग ऊर्जा व्यापार सम्झौता, गौतम बुद्ध अन्तर्राष्ट्रिय विमानस्थल सञ्चालनका विषयमा प्रगति भएको छ । संक्रमणकालीन न्यायसम्बन्धी विधेयक सर्वसम्मतिले पारित भएको छ । आयोग बन्न ढिलाइ भएको छ । त्यसलाई तीव्रता दिनुपर्छ । सम्बन्धलाई सन्तुलनमा राख्ने र सहकारी क्षेत्रमा देखिएको बेथिति रोक्न सरकारले काम गरिरहेको छ । एकातिर यसबीचमा ६ हजार बचतकर्ताको एक अर्ब ५७ करोड बचत रकम सम्पूर्ण रूपले फिर्ता गरेको छ,’ उहाँले भन्नुभयो । करिब ६२ हजार बचतकर्ताको उजुरी रहेको र त्यसमध्ये १५-१६ हजारको सम्बोधन भएको उहाँको दाबी छ । ‘यसरी बचतकर्ताको बचत फिर्ता, अनियमितता गर्नेलाई कारबाही, उच्चस्तरीय प्राधिकरण गर्ने, भविष्यमा यस्तो नहोस् भनेर नियमन गर्ने कुरा सकारात्मक छन्,’ उहाँले भन्नुभयो ।

ADVERTISEMENT

अध्यक्ष केपी शर्मा ओलीले केन्द्रीय कमिटीमा प्रस्तुत गर्न तयार पारेको राजनीतिक प्रतिवेदन नेकपा एमालेको सचिवालय बैठकमा प्रस्तुत भएको छ । बिहीबार बसेको पार्टीको सचिवालय बैठकले उक्त प्रतिवेदन केन्द्रीय समितिमा प्रस्तुत गर्ने निर्णय लिएको हो । एमालेको केन्द्रीय कमिटी बैठक आगामी पुस २१ र २२ गतेका लागि तय भएको छ । उक्त बैठकका लागि अध्यक्ष ओलीले राजनीतिक प्रतिवेदन तयार पार्नुभएको हो । ‘पर्सि पुस २१ र २२ गते दुई दिन बस्ने केन्द्रीय कमिटीका लागि तयार पारिएको मुख्य प्रतिवेदनमा छलफल गर्‍यौँ,’ ज्ञवालीले भन्नुभयो, ‘अध्यक्षको तर्फबाट तयार गरिएको प्रतिवेदन केन्द्रीय कमिटीमा प्रस्तुत गर्ने निर्णय गरेको छ ।’ उहाँका अनुसार प्रतिवेदनमा पछिल्लो राजनीतिक अवस्थाबारे ‘गम्भीर विवेचना’ गरिएको छ ।

‘ओलीमाथि रावलको आरोप प्रचण्डको ‘कपी पेष्ट’
नेकपा एमालेका नेता प्रदीप ज्ञवालीले हालै एमालेले कारबाही गरेका भीम रावलले अध्यक्ष ओलीमाथि लगाएको आरोप अपेक्षित नै भएको बताउनुभएको छ । साथै उहाँले रावलको आरोप नेकपा माओवादी केन्द्रका अध्यक्ष प्रचण्डले २०७७ सालमा लगाएको भन्दा भिन्न नरहेको बताउनुभयो । बिहीबार बसेको सचिवालय बैठकपछि सञ्चारकर्मीले सोधेको प्रश्नमा उपमहासचिवसमेत रहनुभएका ज्ञवालीले ओलीबारे रावलको आरोप प्रचण्डकै कपी पेष्टको संज्ञा दिनुभयो । ‘हामीले धेरै छलफल गरेनौँ । किनभने त्यो नौलो कुरा भएन । २०७७ साल कात्तिकमा यिनै भाषामा प्रचण्डले अध्यक्ष केपी ओलीलाई यस्तै खालका टिप्पणी गर्नुभएको थियो’, ज्ञवालीले भन्नुभयो, ‘एक किसिमले कपी पेष्ट जस्तै हो नयाँ कुरा छैन ।’ आरोप लगाएबाटै रावलमा कति धेरै नकारात्मकता भरिएको रहेछ भन्ने पुष्टि भएको ज्ञवालीको भनाइ थियो । ‘एक जमाना बाबुराम, प्रचण्डहरू पुराना पार्टीलाई डिक्सनेरीमा भएका सबै शब्द प्रयोग गर्नुहुन्थ्यो, पछि रविजीहरू पनि त्यसैगरी उदाउनुभयो । गालीगलौजले देश बन्दैन’, ज्ञवालीले भन्नुभयोे, ‘३१ पेजमा साढे ३० पेज गाली गलौज र आधा पेज अभियान चलाउने कुरा गर्नुभएपछि छलफल गर्नुपर्ने विषय हामीलाई लागेन ।’ ज्ञवालीले प्रतिनिधिसभा विघटन, नेकपा विभाजन लगायतका विषय रावलले उठाएको भन्दै तिनै मुद्दा तत्कालीन गठबन्धनले चुनावमा लगे पनि जनताको रोजाइमा एमाले रहेको देखिएको दाबी गर्नुभयो । साथै उहाँले गालीगलौजको प्रतिस्पर्धामा नगएर देश बनाउने अभियानमा लाग्ने बताउनुभयो ।