प्रधानमन्त्री ओलीद्वारा कन्दराको ‘हुनेछ : द सङ्ग अफ होप’ सार्वजनिक

काठमाडौं । प्रधानमन्त्री केपी शर्मा ओलीले कन्दरा ब्याण्डको नयाँ गीत ‘हुनेछ : द सङ्ग अफ होप’ सार्वजनिक गर्नुभएको छ । अंग्र्रेजी नयाँ वर्ष सन् २०२५ को पहिलो बिहानीको कोसेलीको रूपमा प्रधानमन्त्री निवास बालुवाटारमा प्रधानमन्त्री ओलीले उक्त गीतको भिडियो सार्वजनिक गर्नुभएको हो ।

सकारात्मक समाज निर्माण, सम्भावना, समृद्धि र स्थायित्वबारे प्रधानमन्त्री ओलीका अभिव्यक्तिहरूलाई समेटेर यो गीत तयार पारिएको हो । गीत सार्वजनिक गर्ने क्रममा प्रधानमन्त्री ओलीले गीतको प्रशंसा गर्नुभएको थियो । कन्दराका प्रमुख भोकलिस्ट विवेक श्रेष्ठलाई ओलीले भन्नुभयो, ‘साह्रै राम्रो गाउनुभएको रहेछ, कति मीठो गीत । ठ्याक्कै देशले खोजे जस्तो ।’ ओलीले गायक विवेकलाई धन्यवाद दिँदै सन् २०२५ बाट प्रारम्भ गर्न थालेको कन्दराको विश्वभ्रमणको पनि शुभकामना दिनुभयो ।

गायक श्रेष्ठले यो गीतले नेपालीहरूमाझ सकारात्मक सम्भावनाको बिम्ब प्रस्तुत गरेको सुनाउनुभयो । ‘यो गीत आशाको किरण हो, जसले हरेक नेपालीलाई आफ्नो दायित्व, जिम्मेवारी र एकताबद्ध भएर अगाडि बढ्न प्रेरणा दिनेछ’, उहाँले भन्नुभयो ।’ प्रधानमन्त्रीले गीतलाई अपनत्व दिएर यसको म्युजिक भिडियो सार्वजनिक गर्नुले आफूहरूलाई थप उत्साह प्रदान गरेको श्रेष्ठले बताउनुभयो ।

‘हुनेछ : द सङ्ग अफ होप’ मा शब्द तथा संगीत ब्याण्डका ड्रम वादक सुनिल थापाको छ । गीतको भिडियो निर्देशन र कथा केदार भुसालले तयार पार्नुभएको हो । सेटमा क्यामेरा सञ्चालन नवीन थापा र दीपेश केसीले गर्नुभएको छ भने मोन्टाज र बी–रोल्समा यज्ञ ज्ञानवाली र दीपेश केसीको सहयोग छ । सम्पादन मधु सन्जेलले गर्नुभएको छ भने भिएफएक्स बमबहादुर थापाले गर्नुभएको छ ।

ADVERTISEMENT

गिटार, मिक्सिङ, र मास्टरिङ देव लामाले गर्नुभएको छ, बासमा पंकज झा, किबोर्डमा उमेश थापा र पर्कसनमा अविनाश गायकले योगदान दिनुभएको छ । गीतको एरेन्ज र गिटार वर्क हरि महर्जनले गर्नुभएको छ । गीतको निर्माणमा रेडियो नेपाल, स्टुडियो प्रोजेक्ट प्रोडक्सन र डिएलसी जस्ता प्रतिष्ठित स्टुडियोले सहकार्य गरेका छन् । कला निर्देशन सन्तोष देवकोटा, पोष्टर र प्रचारप्रसार रोयल भीमसेनले तयार पार्नुभएको छ ।

यो गीत राष्ट्रभक्तहरूका लागि विशेष सान्दर्भिक छ । यसले देशप्रतिको प्रेम, राष्ट्रिय एकता र समृद्ध नेपालको सपनालाई जीवन्त राख्न, हामीलाई आशा, एकता, परिवर्तन, साहस र त्यागका मूल्यहरूलाई आत्मसात् गर्न, सामना गरिरहेका कठिन परिस्थितिहरू, नकारात्मक सोच र अन्धकारलाई पछाडि छोडेर उज्यालो भविष्यको सपना देख्न यो गीतले प्रेरित गर्छ । आशावादी बन्न, एकजुट भएर काम गर्न प्रेरित गर्ने यस गीतले देशको रूपान्तरणका लागि व्यक्तिगत परिवर्तनको महत्वलाई उजागर गर्दै विभाजन र द्वन्द्वले होइन एकताले हामीलाई बलियो बनाउँछ भन्ने गीतको सन्देश छ ।

कन्दरा ब्याण्डका ‘लेककी हे माया’, ‘विदेसिएर गइन् उनी’, ‘चञ्चले कान्छीको’, ‘भेडी गोठैमा’, ‘हङ्कङ पोखरा’, ‘तगारोमा रुमाल’, ‘विचरा म’ जस्ता गीतहरू नेपाली संगीतमा चर्चित छन् । कन्दराको वर्तमान लाइनअपमा भोकलमा विवेक श्रेष्ठ, ड्रम्समा सुनिल थापा, लिड गिटारमा देव लामा, बास गिटारमा पंकज झा, मादलमा अविनाश गायक र किबोर्डमा उमेश थापा हुनुहुन्छ । भोकलिस्ट श्रेष्ठ र ड्रम्स वादक सुनिल थापा ब्याण्डका संस्थापक सदस्य हुनुहुनुन्छ ।
यसअघि नै कन्दरा ब्याण्डले आफ्नो ३२ वर्षे सांगीतिक यात्राको उत्सव वर्षको रूपमा सन् २०२४-०२५ लाई ‘पहिला घरदेश, अनि परदेश’को नारा दिएर देशभर र विश्व भ्रमणको तालिका सार्वजनिक गरिसकेको छ ।