सामाजिक उत्तरदायित्वतर्फ टेलिकमको योगदान

काठमाडौं । नेपाल टेलिकमले संस्थागत सामाजिक उत्तरदायित्वअन्तर्गत विगत लामो समयदेखि विविध कार्यक्रमहरू सञ्चालन गर्दै आएको छ । व्यावसायिक क्रियाकलापहरू सञ्चालन गर्दा कम्पनीले सदैव सामाजिक उत्तरदायित्वप्रतिको प्रतिबद्धता व्यक्त गर्दै आएको छ । पछिल्लो समय कम्पनीले हरियाली संरक्षण तथा वृक्षारोपणअन्तर्गत काठमाडौैंको माइतीघरदेखि तीनकुनेसम्मको सडक खण्डमा हरियाली संरक्षण तथा वृक्षारोपण कार्यक्रम सञ्चालन गर्दै आएको थियो । उक्त स्थानमा मौसमी फूलका बिरुवा रोप्ने, रुखहरू तथा दुबो रोप्ने, गोडमेल गर्ने र काँटछाँट गर्नेलगायतका सुन्दरता अभिवृद्धि गर्ने क्रियाकलाप सञ्चालन गरिएका थिए ।

त्यसैगरी विद्यालयमा विभिन्न भौतिक तथा शैक्षिक सामग्री वितरणतर्फ नेपालभरिका विभिन्न सरकारी तथा सामुदायिक विद्यालयमा फर्निचर, कम्प्युटर, झोला, ट्र्याकसुटलगायतका विभिन्न भौतिक तथा शैक्षिक सामग्री उपलब्ध गराएको छ । साथै देशभरका २० जिल्लाका एक/एक सरकारी र सामुदायिक विद्यालयमा महिला स्वास्थ्यमा सहयोग पुग्ने गरी महिला स्वास्थ्य सामग्री स्यानेटरी प्याड, भेण्डिङ मेसिन-वीग स्यानेटरी प्याड्स उपलब्ध गराइएको छ ।

वातावरण सरसफाइतर्फ धार्मिक मठमन्दिर, पुरातात्विक एवं पर्यटकीयस्थल, बसपार्क, सार्वजनिक पार्क तथा बगैंचालगायतका महत्वपूर्ण सार्वजनिक स्थलमा आवश्यकताबमोजिम डस्टबिन वितरण गरेको छ भने वृद्धाश्रम, बाल आश्रमलगायतका संरक्षणस्थलमा सहयोगतर्फ सातवटै प्रदेशका वृद्धाश्रम, बालआश्रम, फरक क्षमताका व्यक्तिहरूलाई संरक्षण गर्ने संस्था तथा सामुदायिक केन्द्रहरूमा भोजन एवं न्यानो कपडा र ब्ल्यांकेट सहयोग गरेको छ । अस्पतालमा बेड कम चेयर वितरणतर्फ नेपालको सबैभन्दा पुरानो अस्पताल वीर अस्पताललगायत अन्य सरकारी तथा सामुदायिक अस्पतालमा आउने बिरामीका कुरुवाका लागि बेड कम चेयर उपलब्ध गराएको छ ।

ADVERTISEMENT

त्यस्तै विद्यालयमा इन्टरनेट सेवातर्फ विद्यालयहरूमा पठनपाठन कार्य सहजताका साथै विद्यार्थीले इन्टरनेटको सहज प्रयोग गर्न सकून् भन्ने उद्देश्यले फाइबर टु दि होम सेवा पुगेका देशभरका विभिन्न सयवटा सरकारी तथा सामुदायिक विद्यालयमा ५० एमबिपिएसको इन्टरनेट एक वर्षसम्मका लागि निःशुल्क उपलब्ध गराएको छ भने एफटिटिए सेवा नपुगेका सातवटै प्रदेशका विभिन्न ५० सरकारी तथा सामुदायिक विद्यालयमा एक वर्षसम्मका लागि नमस्ते वाइफाई(डब्लुबिबी) राउटरसहितको इन्टरनेट प्याकेज निःशुल्क उपलब्ध गराएको छ । एसइई तयारी गरिरहेका विद्यार्थीलाई सहयोगतअन्तर्गत विद्यार्थीहरूलाई अनलाइन माध्यमबाट निःशुल्करूपमा पढ्न पाउने व्यवस्था मिलाएको छ ।

त्यसैगरी फरक क्षमता भएका व्यक्तिहरूलाई छुट्टै प्याकेजसहितको निःशुल्क प्रिपेड सिमकार्ड वितरण, नेपाल सरकार, सञ्चार तथा सूचना प्रविधि मन्त्रालय, नेपाल दूरसञ्चार प्राधिकरणलगायतका संस्थाहरूको सिफारिसमा विभिन्न पर्व, अवसर तथा विपत्तिको समयमा निःशुल्क कलर रिंगटोन प्रसारण कार्य, गणतन्त्र दिवस, संविधान दिवसलगायतका पर्व, अभियान, सम्मेलन तथा प्राकृतिक विपद्का समयमा सूचना तथा अन्य जानकारीमूलक सन्देशहरू निःशुल्क ब्लक एसएमएसमार्फत् प्रवाह गर्दै आएको छ । कम्पनीले गत वर्षको जाजरकोट भूकम्पबाट प्रभावित जनसमुदायका लागि ब्ल्यांकेट, टेन्टलगायतका राहत सामग्री उपलब्ध गराएकोे थियो भने गत असोजको पहिरो तथा डुबानपीडितलाई राहत वितरण कार्यमा सहयोग पुर्‍याउन प्रधानमन्त्री दैवी प्रकोप उद्धार कोषमा पनि सहयोग प्रदान गरेको थियो ।