देउवालाई प्रधानमन्त्री अफर नगरेको प्रचण्डको प्रष्टोक्ति

काठमाडौं । प्रमुख प्रतिपक्षी दल नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले सरकार परिवर्तनका लागि नेपाली कांग्रेससँग पहल गरेको कुरा झुटो भएको बताउनुभएको छ । खुमलटारमा शनिबार आयोजित एक कार्यक्रममा प्रचण्डले कांग्रेस महामन्त्री गगन थापाले बिहीबार गरेको दाबीमा सत्यता नभएको बताउनुभएको हो । कीर्तिपुर उपनिर्वाचनको चुनावी सभामा कांग्रेसका महामन्त्री गगन थापाले अध्यक्ष दाहालले हप्ताको दुई÷तीनपटक कांग्रेससँग प्रधानमन्त्री बन्न आग्रह गरेको दाबी गर्नुभएको थियो । थापाको सोही दाबीबारे प्रतिक्रिया दिँदै प्रचण्डले सरकार परिवर्तनको कुरा आफूले अघि नबढाएको बताउनुभएको हो ।

उहाँले २०८४ सम्मकै सरकार चलाउन बारम्बार सार्वजनिक मञ्चहरूमार्फत आग्रह गरेको बताउनुभएको थियो । उहाँले महामन्त्री थापालाई आफूले युवा नेताको रूपमा धेरै संवाद र सहकार्य गर्ने गरेको बताउँदै पछिल्ला केही महिनायता धेरै परिवर्तन भएको पाएको बताउनुभयो । जनतालाई झुटो बोलेको देख्दा महामन्त्री थापाप्रति दया लागेको उहाँको टिप्पणी थियो । कांग्रेस सभापति शेरबहादुर देउवासँग आफ्नो सरकार परिवर्तनको बारेमा प्रत्यक्ष र परोक्ष रूपमा कुरा नभएको प्रचण्डको दाबी थियो । उहाँले महामन्त्री थापालाई आफ्नो अभिव्यक्तिबारे आत्मसमीक्षा गर्न सुझाव दिनुभएको थियो । ‘सत्ता परिवर्तनको कुरा अघि बढाएको कुरा बिल्कुल होइन । योभन्दा सफेद झुट अरू केही हुनै सक्दैन,’ प्रचण्डले भन्नुभयोे, ‘गगन थापालाई मैले एउटा युवा नेताको रूपमा उहाँसँग धेरै संवाद, सहकार्य हुने गर्दथ्यो । अहिले केही महिनाभित्रै उहाँमा आएको परिवर्तन र उहाँले यति तल झरेर हुँदै नभएको झुटो कुरो जनतासँग बोलेको देख्दा गगनजीप्रति मलाई साँच्चै दया लागेको छ । कति तल कति छिटो झर्न सकेको हो ? त्यस्तो एउटा राम्रो सम्भावना बोकेको युवा नेता यति छिटो, यति अनैतिक र झुटो कुरा गर्नसक्ने भएको देख्दा उहाँप्रति मलाई साँच्चै दया लागेको छ ।’

ADVERTISEMENT

थापाले सरकार परिवर्तनलाई लिएर गरेको दाबी शतप्रतिशत झुटो भएको प्रचण्डको भनाइ थियो । ‘मैले भनेको छैन, भन्दा पनि भन्दिनँ । सरकारबाट बाहिर आएर जनतामा जाँदा नै हामीलाई सहज भइरहेको छ, सरकार तपाईंहरू २०८४ सम्म नै चलाउनुस् भनेको छु । मेरो शेरबहादुर देउवाजीसँग यो विषयमा कहीँ कतै प्रत्यक्ष, परोक्ष केही कुरा भएकै छैन । यस्तो झुटो कुरामा गगनजी आत्मसमीक्षा गर्नुहोला भन्न चाहन्छु,’ प्रचण्डले भन्नुभयो ।

स्वार्थले बनेको यो सरकार आफैँ ढल्छ : पुन
नेकपा माओवादीका उपमहासचिव वर्षमान पुनले आफ्नो अध्यक्ष पुष्पकमल दाहाल ‘प्रचण्ड’ले शेरबहादुर देउवालाई प्रधानमन्त्री अफर गरेको भन्ने कांग्रेस महामन्त्री गगन थापाको भनाइप्रति आपत्ति जनाउनुभएको छ । गृहजिल्ला रोल्पामा आयोजित शहीद प्रतिष्ठानको प्रथम साधारणसभालाई सम्बोधन गर्दै पुनले भ्रमपूर्ण प्रचार नगर्न थापालाई चेतावनी दिनुभयो । उहाँले आफूहरूको प्राथमिकता सरकार नभएको भन्दै मुलुक र जनताको हितमा राम्रो काम गरेर देखाउन कांग्रेस–एमाले गठबन्धनलाई आग्रह गर्नुभयो । कांग्रेस र एमाले दुवै दलका नेताले एक–अर्कासँग धेरै दिन सहकार्य गर्न सकिन्छ भन्ने विश्वास नभएपछि आफ्नो दललाई देखाएर ‘बार्गेनिङ पावर’ बढाउन खोजेको उहाँको भनाइ थियो । ‘हाम्रो अध्यक्ष प्रचण्डले कहिले र कोमार्फत देउवाजीलाई प्रधानमन्त्री अफर गर्नुभयो त्यसको पुष्टि गर्न गगन थापाजीलाई मेरो चुनौती छ’, पुनले भन्नुभयोे, ‘आफूहरूको गठबन्धन लामो समय नजाने देखेपछि कांग्रेस-एमाले दुवैले हामीलाई देखाएर बार्गेनिङ पावर बढाउन खोजिरहेका छन् । गगनजीले केपी ओलीसँग बार्गिनिङ पावर बढाउन हुँदै नभएको हास्यास्पद दाबी गर्नुभएको छ ।’ आफूहरू कम्तीमा प्रतिनिधि सभाको यो कार्यकालभरि प्रतिपक्षमा बसेर कांग्रेस-एमाले सरकारको बेथिति, भ्रष्टाचार र कुशासनविरुद्ध जनतालाई सचेत र जागरूक बनाउने काममा लाग्ने उहाँको भनाइ थियो । ‘हामीलाई अहिले सरकारतिर हेर्नुछैन । भ्रष्टाचार र विकृतिको जगमा उभिएको यो सरकारलाई जनताले नै उखालेर फाल्ने दिन आउँछ’, पुनले भन्नुभयो, ‘सुशासनको अभियानविरुद्ध भ्रष्टहरू जोगाउने स्वार्थले बनेको सरकार आफैँ कुहिएर झर्छ ।’ उहाँले आफूहरू प्रतिपक्षमा बसेर सरकारका खराब कामप्रति औँला उठाउने र सुशासन, संविधान, संघीयता, समावेशीता, राष्ट्रियताको पक्षमा र कुशासन र भ्रष्टाचारका विरुद्धमा जनतालाई संगठित, जागरूक र आन्दोलित बनाउने बताउनुभयो ।