रास्वपा सभापति रविको तिहार हिरासतमै !

काठमाडौं । सहकारी ठगी र संगठित अपराधको मुद्दामा पक्राउ पर्नुभएका पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेको तिहार हिरासतमै बित्ने भएको छ । अनुसन्धानका लागि लामिछानेलाई जिल्ला अदालत कास्कीले बिहीबार सात दिनको म्याद थपेसँगै उहाँको तिहार हिरासतमै बित्ने भएको हो । जिल्ला अदालत कास्कीका ६ नम्बर न्यायाधीश चन्द्रकान्त पौडेलको इजलासले लामिछानेलाई थप सात दिन म्याद थप्न अनुमति दिएको हो । पोखरास्थित सूर्यदर्शन सहकारीको रकम हिनामिना प्रकरणमा लामिछाने कात्तिक २ गते पक्राउ पर्नुभएको थियो । उहाँलाई सोही दिन राति पोखरा लगिएको थियो । शनिबार सार्वजनिक बिदा परेकाले आइतबार अदालतमा उपस्थित गराइएको थियो । अदालतले प्रहरीलाई अनुसन्धानका लागि भनेर पक्राउ परेकै दिन अर्थात् शुक्रबारबाटै गणना हुने गरी ६ दिन म्याद दिएको थियो । दोस्रोपटक थपिएको म्याद कात्तिक १४ गते राति १२ बजेसम्म हुन्छ । म्याद सकिएको भोलिपल्ट अदालतमा हाजिर गराउनुपर्ने हुन्छ । तर, दोस्रोपटक थपिएको म्याद सकिएको भोलिपल्ट अर्थात् कात्तिक १५ गतेदेखि तिहारको सार्वजनिक बिदा छ । १५ गतेदेखि १९ गतेसम्म सार्वजनिक बिदा नै छ । त्यसकारण उहाँलाई २० गते मंगलबार मात्र अदालतमा लगिनेछ । अदालतमा फेरि म्याद थप गर्ने÷नगर्ने भन्नेबारे बहस हुनेछ । त्यतिबेला म्याद थपियो भने तिहार बिदासमेत गणना हुन्छ । त्यसो त, उहाँले बन्दी प्रत्यक्षीकरणको रिट निवेदन दायर गर्न सक्नु हुनेछ ।

जिल्ला प्रहरी कार्यालय कास्कीमा सूर्यदर्शन सहकारीको रकम गोर्खा मिडियामार्फत अपचलन गरेको भन्दै गोर्खा मिडिया प्रालिका पूर्वप्रबन्ध निर्देशक रवि लामिछाने, सञ्चालक छविलाल जोशीसहित १८ व्यक्ति र संस्थाविरुद्ध किटानी जाहेरी परेको थियो । यही प्रकरणमा गोर्खा मिडिया प्रालिका तत्कालीन अध्यक्ष जिबी राई भने फरार छन् ।

गोर्खा मिडियामार्फत सहकारीको रकम अपचलन भएको भन्दै सहकारी ठगी र दुई वा दुईभन्दा बढी समूह मिलेर रकम दुरुपयोग भएको भन्दै रवि र छविविरुद्ध संगठित अपराधको मुद्दा लगाइएको छ । सूर्यदर्शन सहकारीबाट पाँच करोड ५८ लाख नौ हजार रुपैयाँ गोर्खा मिडियामा गएको देखिन्छ । जिबी राई नेतृत्वको देशभरका सहकारीबाट ६५ करोड प्रत्यक्ष रूपमा गोर्खा मिडिया नेटवर्कमा गएको देखिएको छ । रवि लामिछानेले सूर्यदर्शन सहकारीबाट एक करोड रुपैयाँ लिएर गोर्खा मिडियाको नाममा ऋण मिलान गरेको वित्तीय प्रतिवेदनमा समेत उल्लेख छ । सहकारी ठगी प्रकरणमा रविसहित माओवादी केन्द्रका विद्यार्थी नेता दीपेश पुनसहित व्यक्ति र संस्था गरी १८ जनाविरुद्ध पीडितले पूरक जाहेरी दिएका थिए । पूर्वअध्यक्ष ज्ञानबहादुर बम्जन, नेचर हब प्रालि, गोर्खा मिडिया प्रालि, वारिसान इन्फर्मेसन टेक्नोलोजी, स्प्रिङ उड रियल स्टेट, गोर्खा गु्रप इन्भेस्टमेन्ट, गोर्खा आयुर्वेद प्रालि लगायतलाई विपक्षी बनाएर उनीहरूले पूरक जाहेरी दिएका थिए ।

जोशी पनि थप सात दिन हिरासतमा
कास्की जिल्ला अदालतले सहकारी ठगी र संगठित अपराधमा अनुसन्धानका लागि पक्राउ परेका पूर्वडिआइजी छविलाल जोशीलाई पनि थप सात दिन हिरासतमा राखेर अनुसन्धान गर्न अनुमति दिएको छ । बिहीबार न्यायाधीश चन्द्रकान्त पौडेलको इजलासले रवि लामिछानेसहित जोशी र सोही प्रकरणमा पक्राउ परेकी लीला पछाईलाई बिहीबारदेखि नै लागू हुनेगरी थप सात दिन हिरासतमा राखेर अनुसन्धान गर्न अनुमति दिएको हो । बिहीबार जिल्ला सरकारी वकिल कार्यालयकी न्यायाधिवक्ता कमला काफ्ले, सहायक जिल्ला न्यायाधिवक्ताद्वय शान्तिदेवी शर्मा र विपिनराज तिवारी तथा कानुन व्यवसायीहरू युवराज पराजुली र वेदबहादुर विष्टले बहस गर्दै उनीहरूलाई थप २५ दिन हिरासतमा राखेर अनुसन्धान गर्नुपर्ने माग दाबी गरेका थिए । उनीहरूले अनुसन्धानको क्रममा विभिन्न सरकारी कार्यालयहरू, संघसंस्था र बैंकहरूबाट कागजात माग गरिएको तर प्राप्त भइनसकेको तथा बयानको कामसमेत बाँकी रहेकाले थुनामै राखेर अनुसन्धान गर्नुपर्ने माग गरेका हुन् । जोशी गत असोज ६ मा पक्राउ पर्नुभएको थियो भने पछाईलाई प्रहरीले असोज १२ गते पक्राउ गरेको थियो । रवि लामिछानेका तर्फबाट वरिष्ठ अधिवक्ताहरू नारायण घिमिरे, हरिप्रसाद सुवेदी तथा अधिवक्ताहरू नारायण कँडेल, सांसदसमेत रहेकी सोविता गौतम, पदमराज शर्मा र मधुकुमार चौलागार्इंले बहस गर्नुभएको थियो । त्यस्तै, जोशीका पक्षबाट अधिवक्ता जगन्नाथ ढकालले बहस गर्नुभएको थियो ।

पोखरामा प्रदर्शनकारीमाथि प्रहरीको अश्रुग्यास
कास्की जिल्ला अदालतले सभापति रवि लामिछानेलाई थप सात दिन हिरासत राख्न अनुमति दिएसँगै रास्वपा कार्यकर्ता आक्रोशित भएका छन् । रवि पक्राउदेखि निरन्तर आन्दोलित बनेका उनीहरू बिहीबार निषेधित क्षेत्र प्रवेश गर्ने क्रममा प्रहरीले बल प्रयोग गरेको हो । त्यस क्रममा स्थिति नियन्त्रणमा लिन प्रहरीले दुई सेल अश्रुग्यास हानेको हो । रविलाई अदालत लगिँदा कार्यकर्ताले निषेधित क्षेत्रबाहिर बसेर प्रदर्शन गरिरहेका थिए । तर, म्याद थपको सूचनालगत्तै प्रदर्शनकारी आक्रोशित भएका हुन् । उनीहरू निषेधित क्षेत्रतर्फ अघि बढेपछि प्रहरीले रोकेको हो । आक्रोशित रास्वपाका कार्यकर्ता र समर्थकले नारावाजी गरेका थिए । पार्टी सभापति लामिछाने पक्राउ परेपछि रास्वपाले त्यसलाई राजनीतिक प्रतिशोध भनेको छ । सिंगो पार्टी पंक्ति पोखरा उतारेर विरोध प्रदर्शन गरेको छ ।

ADVERTISEMENT

‘ममाथि राज्य पक्षबाट हृयारेसमेन्ट भयो’
सहकारी ठगी प्रकरणमा प्रहरी हिरासतमा रहनुभएका रास्वपा सभापति रवि लामिछानेले आफूमाथि राज्यपक्षले ज्यादतिपूर्ण व्यवहार गरेको गुनासो गर्नुभएको छ । बिहीबार म्याद थपका लागि अदालतमा बहसका क्रममा इजलाससमक्ष आफ्नो भनाइ राख्दै लामिछाने आक्रोशित रूपमा प्रस्तुत हुनुभएको थियो । लामिछानेले प्रहरीले आफूलाई राम्रो व्यवहार नगरेको र मानसिक यातना दिएको आरोप लगाउँदै भन्नुभयो, ‘ममाथि तपाईंहरूबाट अन्यायपूर्ण व्यवहार भएको छ । राजनीतिक प्रतिशोध साँध्न खोजियो । मलाई हिरासतभित्र मानसिक रूपमा हृयारेसमेन्ट गर्न खोजिएको छ । मैले सबैतिर बयान दिएको छु । सबै परीक्षामा पास भएको छु । तर, राज्यशक्तिको दुरुपयोग गरेर मलाई जेल हाल्न खोजियो । मलाई अदालतले नै हो न्याय दिने ।’

स्वर्णिमको आक्रोश : ‘रविलाई दालभात खुवाउन ल्याइएको हो ?’
रास्वपाका उपसभापति स्वर्णिम वाग्लेले कास्की हिरासतमा रहनुभएका रवि लामिछानेको बयान लम्ब्याएर दुःख दिन खोजिएको टिप्पणी गर्नुभएको छ । बिहीबार कास्कीको पोखरामा पत्रकार सम्मेलन गरेर सरकारले १२५ घण्टा हिरासतमा राख्दा जम्मा चार/पाँच घण्टा बयान लिएको भन्दै वाग्लेले भन्नुभयो, ‘उहाँलाई शुक्रबार दिउँसो पक्राउ गरियो । लामो सडक यात्रा गरेर उहाँलाई राति १ बजे ल्याइयो । बुधबार साँझ १० बजेसम्मको हिसाब गर्दा १२५ घण्टा उहाँलाई हिरासतमा राखिएको रहेछ । १२५ घण्टामा चार/पाँच घण्टा मात्रै बयान लिइएको छ । के उहाँलाई यहाँ दालभात खुवाउन ल्याएको हो र ?’

सम्पत्ति शुद्धीकरणमा पनि अनुसन्धान हुने
सहकारी ठगी र संगठित अपराधको अनुसन्धानका लागि कास्की प्रहरीको हिरासतमा रहनुभएका रास्वपाका सभापति रवि लामिछानेविरुद्ध सम्पत्ति शुद्धीकरणमा समेत अनुसन्धान अगाडि बढेको छ । कास्की प्रहरीले त्यससम्बन्धी प्रतिवेदन तयार गरिरहेको प्रहरी स्रोतको भनाइ छ । रविले राजनीतिमा प्रवेश गर्नु अघिदेखि हालसम्म जोडेको सम्पत्ति र परिवारको चल/अचल सम्पत्ति सम्बन्धमा छानविन हुने प्रहरी स्रोतको दाबी छ । सहकारी ठगी र संगठित अपराध मुद्दामा थुनछेक बहस भए पनि लगत्तै सम्पत्ति शुद्धीकरणको मुद्दासमेत दर्ता गर्ने प्रहरीको तयारी छ । गत वैशाखमै सम्पत्ति शुद्धीकरण निवारण ऐन, २०६४ लाई संशोधन गरी प्रहरी, अख्तियार दुरुपयोग अनुसन्धान आयोग लगायतका निकायले सम्पत्ति शुद्धीकरणसम्बन्धी कसुरमा अनुसन्धान र अभियोजन गर्न पाउने अधिकार प्रत्यायोजन गरिएको थियो ।

रविसहित १२ जनाविरुद्ध रुपन्देहीमा पनि पक्राउ पुर्जी जारी
रास्वपाका सभापति तथा पूर्वगृहमन्त्री रवि लामिछानेविरुद्ध रुपन्देही जिल्ला अदालतबाट पक्राउ पुर्जी जारी भएको छ । जिल्ला अदालत रुपन्देहीले बिहीबार लामिछानेविरुद्ध प्रहरीलाई पक्राउ अनुमति दिएको हो । सुप्रिम सहकारी ठगी प्रकरणमा अनुसन्धान गर्नका लागि लामिछानेसहित १२ जनाविरुद्ध पुर्जी जारी भएको जिल्ला अदालत रुपन्देहीले जनाएको छ । लामिछाने पोखराको सूर्यदर्शन सहकारी ठगी प्रकरणमा अनुसन्धानका लागि जिल्ला प्रहरी कार्यालय पोखराको हिरासतमा हुनुहुन्छ । बुटवलको सुप्रिम बचत तथा ऋण सहकारी संस्थाका बचतकर्ता नारायणबहादुर पहराईको जाहेरीका आधारमा न्यायाधीश श्यामप्रसाद श्रेष्ठको इजलासले पक्राउ गर्न अनुमति दिएको हो ।

अदालतले छविलाल जोशी, रवि लामिछाने, दिपक लामा, अनन्त बाबु राई, श्री वल्लभ नेपाल, विशाल तामाङ, रविना रिमाल, भगवती बम्जन, विज्ञान राई, सुरक्षा अधिकारी, नरेश जिसि र शिवबहादुर गुरुङलाई पक्राउ गर्न अनुमति दिएको हो । सहकारी संस्थाको बचत रकम यी विपक्षीहरू शेयर सदस्य सञ्चालक समितिका पदाधिकारी र बैंकिङ कारोबारमा आधिकारीक हस्ताक्षरकर्ताहरू भएको मिसिल संलग्न कागजातबाट देखिएको पक्राउ आदेशमा उल्लेख छ । पक्राउ पुर्जी जारी भएसँगै अब रविलाई पनि सुप्रिम सहकारी ठगीको कसुरमा रुपन्देही लैजाने बाटो खुलेको छ ।