सरकारको पक्षमा एकढिक्का हुने सत्तारूढ दलहरूको निष्कर्ष

काठमाडौं । सत्ता साझेदार दलहरूले सरकार र संसद्लाई प्रभावकारी बनाउन एकढिक्का भएर उभिने निष्कर्ष निकालेका छन् । प्रधानमन्त्रीको सरकारी निवास बालुवाटारमा सोमबार साँझ बसेको सत्तारूढ दलहरूको बैठकले सत्ताको पक्षमा एकढिक्का भएर उभिने निष्कर्ष निकालेका हुन् । ‘सरकारको पक्षमा दलहरू एकढिक्का भएर उभिने निष्कर्षमा पुगेका छौँ’, नेपाली कांग्रेसका प्रमुख सचेतक श्याम घिमिरेले बैठकपछि भन्नुभयो । उहाँका अनुसार सत्ता साझेदार दलहरू एकढिक्का भएर उभिनकै निम्ति न्यूनतम साझा कार्यक्रम तयार पार्ने गृहकार्य सुरु भएको हो । ‘एमाले र हाम्रो बीचमा सात बुँदे भइसकेकै थियो । तर, त्यही सात बुँदेलाई आधार मानेर न्यूनतम साझा कार्यक्रम बनाउँछौँ । यसले सबैलाई एकढिक्का बनाएर उभ्याउँछ’, उहाँले भन्नुभयोे । प्रमुख सचेतक घिमिरेले केही दिनभित्रै न्यूनतम साझा कार्यक्रम तयार हुने बताउनुभयो ।

आइतबार साँझ कांग्रेस र एमालेका नेताहरूको बैठकबाटै न्यूनतम साझा कार्यक्रम मस्यौदा कार्यदल गठन भइसकेको छ । कांग्रेसका महामन्त्री गगन थापा र प्रवक्ता प्रकाशशरण महत, एमालेका उपमहासचिवद्वय प्रदीपकुमार ज्ञवाली र विष्णु रिमाल सदस्य रहेको मस्यौदा समिति गठन भएको छ । प्रमुख सचेतक घिमिरेले कार्यदलबाट बन्ने मस्यौदामाथि अरू सत्ता साझेदार दलहरूको धारणा पनि राखिनेछ । तर, प्रमुख दल कांग्रेस र एमाले नै भएकाले दुई दलका नेताहरू रहेको मस्यौदा कार्यदल बनेको उहाँले बताउनुभयो ।

कार्यदल बनेको भोलिपल्ट, सोमबार सत्तारूढ अरू दलहरू जसपा, लोसपा, जनमत पार्टी र नाउपाका नेताहरू सहितको बैठक बोलाइएको थियो । बालुवाटारमा झण्डै तीन घण्टा चलेको छलफलपछि एमालेका प्रमुख सचेतक महेश बर्तौलाले पनि कांग्रेसकै घिमिरेसँग मिल्दो निष्कर्ष सुनाउनुभएको छ । ‘सरकार र संसद्लाई प्रभावकारी बनाउन सत्तारूढ दलहरू एकताबद्ध भएर उभिनेबारे छलफल थालेका छौँ’ प्रमुख सचेतक बर्तौलाले भन्नुभयोे । सरकारको पक्षमा एकढिक्का भएर उभिने निष्कर्षसँग सत्तारूढ नेताहरूको बैठकमा संविधान संशोधनबारे पनि छलफल भएको छ । ‘संविधान संशोधन गर्ने कुरामा भ्रमहरू छरिएका छन् । दुई दलीय व्यवस्थामा सरकार लाग्यो भन्ने जस्ता भाष्य निर्माण गर्न खोजिएको छ’ प्रमुख सचेतक बर्ताैलाले भन्नुभयोे, ‘यस्ता भ्रम चिर्नेगरी अगाडि बढ्नेबारे छलफल भएको छ ।’

ADVERTISEMENT

विशेषगरी प्रमुख प्रतिपक्षी माओवादी केन्द्रका अध्यक्ष पुष्पकमल दाहाल प्रचण्डको अभिव्यक्तिका कारणले गलत प्रचार भइरहेको बर्ताैलाले बताउनुभयो । ‘नेपाललाई बंगलादेश बनाइदिन्छु भन्ने जस्तो कुरा आउने, संविधान संशोधनबारे गलत हल्ला चलाउने भएपछि हामीले छलफल थालेका हौँ’, उहाँले भन्नुभयो । कांग्रेसका प्रमुख सचेतक घिमिरेले पनि संविधान संशोधनबारे सकेसम्म धेरैलाई सहभागी गराउने गरी छलफल थालेको बताउनुभयो । ‘संविधान संशोधनबारे प्रधानमन्त्री पनि प्रष्ट हुनुहुन्छ, हामी पनि प्रष्ट छौँ’, घिमिरेले भन्नुभयोे, ‘यो सात बुँदे गरेजस्तो सजिलो विषय होइन । त्यसैले बढीभन्दा बढी सहमति जुटाएर संशोधन गर्न धेरै छलफलको पनि जरुरी पर्छ ।’ छलफलपछि घिमिरेले सातबुँदे सहमतिमा कांग्रेस प्रतिबद्ध रहेको पनि बताउनुभयो । ‘कांग्रेस सातबुँदे सहमतिप्रति प्रतिबद्ध छ, बाहिर गएर कुनै पनि काम गर्दैन’, उहाँले भन्नुभयो ।

सत्तारूढ दलले सत्तापक्षको बैठक हरेक साता गर्ने निर्णय पनि गरेका छन् । आइतबार प्रधानमन्त्रीको सरकारी निवास बालुवाटारमा बसेको प्रधानमन्त्री केपी शर्मा ओली र कांग्रेस सभापति शेरबहादुर देउवासहितको बैठकले न्यूनतम साझा कार्यक्रम तय गर्न कार्यदल बनाएको थियो । कार्यदलमा कांग्रेसबाट महामन्त्री गगन थापा र प्रवक्ता प्रकाशशरण महत तथा एमालेबाट उपमहासचिवद्वय प्रदीप ज्ञवाली र विष्णु रिमाल सदस्य हुनुहुन्छ । सरकार गठन भएको लामो समय बितिसक्दा पनि न्यूनतम साझा कार्यक्रम सार्वजनिक नगरिएको भन्दै प्रश्न उठ्न थालेपछि कांग्रेस-एमालेले बल्ल न्यूनतम साझा कार्यक्रमको मस्यौदा तयार गर्न लागेका हुन् ।