सहमतिमा संविधान संशोधन हुन्छ : देउवा

काठमाडौं । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले संविधान संशोधनका लागि सबै राजनीतिक दलहरूलाई साथमा लिएर अघि बढ्ने बताउनुभएको छ । लोकतन्त्रप्रति प्रतिबद्ध कांग्रेस र एमालेले संविधान संशोधनका लागि गरेको सहमति सबै दललाई साथमा लिएर अघि बढाउनका लागि भएको देउवाको भनाइ थियो । मंगलबार नेपाली कांग्रेसका नेता एवं समाजवादी चिन्तक स्व. प्रदीप गिरीको स्मृतिमा काठमाडौंमा आयोजित एक कार्यक्रममा बोल्दै उहाँले ठूलो दुई पार्टी बीचको संविधान संशोधन गर्ने सहमतिलाई अन्य दलहरूले आफ्नो खिलाफको रूपमा लिन नहुने पनि बताउनुभयो ।

सभापति देउवाले संविधान संशोधनको क्रममा उपराष्ट्रपतिलाई नै राष्ट्रिय सभाको अध्यक्ष बनाउन सकिने विषयमा पनि अन्य दलको सहमति भए आफूहरूले सो विषयमा पनि संविधान संशोधन गरेर अघि बढ्न तयार रहेको बताउनुभयो । उहाँले भन्नुभयो, ‘बहुलवादमा आधारित प्रजातान्त्रिक समाजवाद उन्मुख सिद्धान्तको आधारमा हामी अघि बढिराखेका छौँ । अहिले पनि संविधान संशोधनको विषयमा ओलीजी र मेरो बीचमा सहमति भएको हो । केही कुराहरू छन् । त्यसमा नौलो कुरा केही छैन हेर्नुस् । सबैसँग सल्लाह गरेर गर्ने कुरा हो ।’ सभापति देउवाले दुई ठूला पार्टीबीचको सहमतिमा आउनु मुलुकका लागि आवश्यक रहेको पनि बताउनुभयो ।

दुई दलको सहमति मान्दैनौँ : नेपाल
नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले संविधान संशोधन गर्ने कांग्रेस-एमालेको सहमतिमा शंका गर्ने ठाउँ रहेको बताउनुभएको छ । अध्यक्ष नेपालले कहिल्यै संविधान संशोधनको विषयमा नबोलेका दुई ठूला दलले मध्यरातमा संविधान संशोधन गर्ने कुरामाथि शंका गर्नु स्वाभाविक रहेको जिकिर गर्नुभयो । मंगलबार प्रदीप गिरीको स्मृतिमा काठमाडौंमा आयोजित कार्यक्रममा बोल्दै उहाँले संविधान संशोधन गर्ने कुरा आवश्यक रहेको भए पनि दुई ठूला नेताहरूले सही गर्दैमा त्यो सम्भव नरहेको दाबीसमेत गर्नुभयो । अध्यक्ष नेपालले संविधान संशोधनका लागि खुला बहस गर्नुपर्ने आवश्यकता पनि औँल्याउनुभयो । प्रधानमन्त्री केपी शर्मा ओलीले विगतमा बहुमत पाएर पनि राजनीतिक स्थायित्वको पक्षका काम गर्न नसकेको भन्दै त्यस्ता खालका गल्ती स्वीकार गरेर अघि बढ्नुपर्ने पनि अध्यक्ष नेपालले बताउनुभयो । उहाँले संविधानमा कतिपय विषय छलफल गर्नुपर्ने भए पनि त्यसलाई अचानक अघि बढाउने कुरा मान्य नहुने बताउनुभयो ।

कांग्रेस संयन्त्र बनाएरै अगाडि बढ्ने तयारीमा छ : थापा
नेपाली कांग्रेसले पार्टीबाट उम्मेदवार भई विभिन्न तहमा जनप्रतिनिधि भएकाहरूको काम प्रभावकारी बनाउने संयन्त्र बनाउने तयारी गरेको छ । वडाध्यक्षदेखि मन्त्रीसम्मका काम प्रभावकारी बनाउन संयन्त्र बनाउन लागिएको हो । अब बस्ने केन्द्रीय समिति बैठकबाट केन्द्रीय सदस्यहरूलाई जिल्ला तोकेर चार महिनाका लागि खटाउने तयारी छ । भदौ ७ गते कांग्रेस केन्द्रीय समिति बैठक बस्दै छ । यो बैठक साउन २३ देखि २८ गतेसम्म चलेको बैठककै निरन्तरता हो ।

ADVERTISEMENT

केन्द्रीय सदस्यहरूले आफूलाई खटाइएको जिल्लाका प्रत्येक तहमा छलफल चलाएर संयन्त्र गठन गर्नेछन् । महामन्त्री गगन थापाले पार्टीबाट टिकट पाएर निर्वाचित जनप्रतिनिधि र पार्टीबीच समन्वय गरी काम गर्न र काम कारबाही प्रभावकारी बनाउन प्रत्येक तहमा संयन्त्र गठन गर्न लागिएको जानकारी दिनुभयो । कांग्रेस जिल्ला कार्यसमिति रुपन्देहीले मंगलबार गरेको कार्यक्रममा बोल्दै उहाँले सो जानकारी गराउनुभयो ।

‘केन्द्रीय सदस्यहरू चार महिनाका लागि खटिएर जिल्ला–जिल्लामा आउनुहुने छ,’ महामन्त्री थापाले भन्नुभयोे, ‘केन्द्रीय सदस्यले प्रत्येक तहमा बैठक र सम्मेलन गराउनुहुन्छ । र, प्रत्येक तहमा एउटा संयन्त्र बनाउनुहुन्छ । त्यो संयन्त्रमा निर्वाचित वडाध्यक्ष, मेयर बस्नुहुन्छ, पार्टी सभापति, शिक्षक तथा प्राध्यापकजस्ता बौद्धिक साथीहरू पनि बस्नुहुन्छ ।’

संयन्त्रले जनप्रतिनिधि र पार्टीबीच समन्वय गर्नेछ । ‘जनप्रतिनिधिको दुःख पनि पार्टीका साथीहरूलाई संयन्त्रमार्फत बताइनेछ, पार्टीका साथीहरूको कुरा पनि जनप्रतिनिधिलाई जानकारी हुन्छ, सँगै बसेर काम गर्नुहुन्छ । हाम्रा काम गर्ने तरिका अलिकति बदल्नुपर्ने भएको छ,’ थापाले भन्नुुभयो, ‘संघ, प्रदेश र स्थानीय तहमा हामी यसैगरी काम गर्छौं ।’ उहाँले जनप्रतिनिधिले कामसँगै प्रचार पनि गर्नुपर्ने बताउनुभयो । महामन्त्री थापाका अनुसार गत शनिबार संघीय सरकारमा सहभागी १० मन्त्री र २ राज्यमन्त्रीसँग सभापति शेरबहादुर देउवासहित पदाधिकारीहरूले छलफल पनि गर्नुभएको थियो । ‘मन्त्रीहरूसँग कम्तीमा महिनामा एकपटक छलफल गर्छौं, यस्तै छलफल प्रदेश र स्थानीय तहमा पनि पार्टीले चलाउनुपर्छ,’ उहाँले भन्नुभयो ।

थापाले पार्टीभित्र गुट अन्त्य गरिनुपर्नेमा पनि जोड दिनुभयो ।‘पार्टीभित्र यति धेरै विभाजन राखेर र एउटा साथीलाई दुःख पर्दा अर्को खुसी हुने, परिवारजस्तो भावना पार्टीभित्र कहीँ पनि नहुने, एकले अर्कालाई संरक्षण गर्न नसक्ने, परिवारजस्तो भएर कुनै पनि विषयमा लड्न नसक्ने, एकले अर्कालाई कसरी सक्ने भन्नेमा मात्र दिनरात लागेर हिँड्ने, कांग्रेसको कार्यकर्ताको ९० प्रतिशत समय अर्को कार्यकर्तासँग लड्दैमा जान्छ,’ थापाले भन्नुभयोे, ‘स्वदेशदेखि विदेशसम्म गुटका कुरा, गुनासो र नकरात्मकता राखेर कसरी पार्टी उँभो लाग्छ ?’ कांग्रेसका शत्रु कोही नभएको बताएका महामन्त्री थापाले पार्टी एक भएर २०८४ को चुनावमा १६५ क्षेत्रमै उम्मेदवारी दिने र ४० प्रतिशत बढी मत ल्याएर पाँच वर्ष एक्लै सरकार बनाउने गरी काम गर्नुपर्ने पनि बताउनुभयो ।