मेरा लागि गीत-संगीत साधना हो : बेनिशा पौडेल, गायिका

नेपाली गायन क्षेत्रमा छोटो समयमै सफलता हात पार्न सफल गायिकामा अग्रपंक्तिमा आउने नाम हो बेनिशा पौडेल । उहाँको स्वरमा रहेका गीत ‘पर्दैन पर्दैन मलाई फकाउन’, ‘आँखैमा लगाउने’, ‘तिम्रो माया’, ‘सम्बन्ध’, ‘मन्द मन्द’, ‘हाम्रो यो माया’, ‘पटुकी बेरेको’, ‘जहाँ हुन्छु’, ‘नयाँ जीवन’, ‘दिउँला माया’, ‘कबाट कछुवा’, ‘सियोमा धागो’, ‘मन बुढो भएन’, ‘यस्तो माया’, ‘नजरमा नजर’, ‘फूल बुट्टे चोली’ लगायतका गीत चर्चित छन् । दुई सयको हाराहारीमा गीत गाइसक्नुभएकी बेनिशाले केही चलचित्रका गीतमा पनि स्वर दिनुभएको छ । उहाँले चलचित्र ‘चुरीफुरी’, ‘नाइँ न भन्नु ल’, ‘प्रेमगञ्ज’ लगायतका चलचित्रका गीतमा आफ्नो स्वर दिनुभएको छ । बुबा पुण्य पौडेल र माता मेनुकाको कोखबाट ज्येष्ठ सुपुत्रीका रूपमा साउन ४ मा जन्मिनुभएकी बेनिशा काठमाडौंलाई कर्मथलो बनाएर आफ्ना क्रियशन श्रोता/दर्शकमाझ पस्किरहनुभएको छ । सानैदेखि गीत गाउन भनेपछि हुरुक्क हुने बेनिशाले स्कुल र गाउँघरमा हुने मेला महोत्सवमा गीत गाउनुहुन्थ्यो र सबैको तारिफ बटुल्नुहुन्थ्यो । त्यही सानैदेखिको लगावका कारण आज उहाँ सफल गायिकाका रूपमा आफ्नो नाम दर्ज गर्न सफल हुनुभएको छ । चार वर्षको हुँदा महोत्सवमा गाएको गीत ‘मै छोरी सुन्दरी’ले अत्यधिक तारिफ पएपछि उहाँ यो क्षेत्रमा विस्तारै हेलिँदै जानुभयो । सानोमा अरुणा लामा, तारादेवीका गीत गाउने बेनिशालाई सबै प्रकारका गीत गाउन मन पर्छ । उहाँको स्वरमा आधुनिकसँगै राष्ट्रिय, लोक, लोकआधुनिक पप, भजन श्रोता/दर्शकमाझ आएका छन् । एसएलसीपछि उच्च शिक्षाका लागि काठमाडौं आउनुभएकी बेनिशाले आफ्नो पढाइलाई पनि निरन्तरता दिइरहनुभएको छ । अहिले ब्याचलर दोस्रो वर्षमा अध्ययनरत उहाँले दमकमै कमला खनालसँग गीत-संगीत सिक्नुभएको थियो भने काठमाडौं आएपछि चण्डीराज काफ्लेसँग सिक्नुभयो । अहिले राजकुमार मालाकारसँग गितार सिकिरहेको बताउनुहुने उहाँ दैनिक डेढदेखि दुई घण्टा रियाज गर्ने गरेको बताउनुहुन्छ । १५ वर्षको हुँदा सुरशाला आइडल जुनियरमा भाग लिनुभएकी उहाँले नेपाल आइडल-४ को टप सेभेनसम्म आफ्नो स्थान सुरक्षित गर्नुभएको थियो । आफ्ना लागि गीत-संगीत भनेको साधना हो भन्नुहुने गायिका बेनिशा पौडेलसँग हिमालय टाइम्सको हिँड्दा-हिँड्दैका लागि कृष्ण भुसालले गर्नुभएको संवादको संक्षिप्त अंश :-

यतिबेला केमा व्यस्त हुनुुहुन्छ ?
गीत-संगीत क्षेत्रमा आफूलाई पूर्णरूपमा समर्पित गरेर लागेकी हुनाले यही क्षेत्रमा नै आफूलाई व्यस्त राख्दै आएकी छु । पढाइलाई पनि निरन्तरता दिइरहेकी छु । यतिबेला ब्याचलर दोस्रो वर्षमा अध्ययनरत छु । पछिल्लो समय राजकुमार मालाकारसँग गितार पनि सिकिरहेकी छु । यस्तै यस्तै दिनचर्या रहेको छ ।

गीत-संगीततर्फ कसरी आकर्षित हुनुभयो ?
मलाई थाहा नहुँदै पनि म गुनगुनाइरहने गरेको बुबाआमाले भन्ने गर्नुहुन्छ । म सानैदेखि गाउँथेँ, गुनगुनाइरहन्थेँ । स्कुल र गाउँघरमा हुने विभिन्न कार्यक्रममा सहभागी हुन्थेँ । सबैले मेरो गायनको तारिफ गर्नुहुन्थ्यो । विस्तारै बढ्दै जाँदा म यो क्षेत्रमा हेलिँदै गएँ । सायद म गीत-संगीतकै लागि जन्मिएकी हुँ कि !

पहिलोपल्ट औपचारिक गीत कहिले गाउनुभएको थियो, याद छ ?
मैले माथि पनि भनेँ म सानैदेखि गीत गाउँथेँ । मलाई थाहा नहुँदै पनि धेरै गीत गाएँ । मलाई याद भएको चाहिँ म चार वर्षको हुँदा ‘मै छोरी सुन्दरी’ गीत गाएकी थिएँ । त्यो बेला सबैले धेरै तारिफ गर्नुभएको थियो ।

आफ्नै गीतचाहिँ पहिलो कुन थियो ?
‘आँखैमा लाउने गाजल सकियो’ रहेको थियो । शान्तिप्रियले लेख्नुभएको यो गीतमा दीपक शर्माको संगीत रहेको छ ।

अहिलेसम्म कति जति गीत गाउनुभयो, केहीको नाम लिनुपर्दा ?
मैले दुई सयजति गीतमा स्वर दिएकी छु । सबै गीत उत्तिकै प्रिय लाग्छन् । केहीको नाम लिनुपर्दा ‘पर्दैन पर्दैन मलाई फकाउन’, ‘आँखैमा लगाउने’, ‘तिम्रो माया’, ‘सम्बन्ध’, ‘मन्द मन्द’, ‘हाम्रो यो माया’, ‘पटुकी बेरेको’, ‘जहाँ हुन्छु’, ‘नयाँ जीवन’, ‘दिउला माया’, ‘कबाट कछुवा’, ‘सियोमा धागो’, ‘मन बुढो भएन’, ‘यस्तो माया’, ‘नजरमा नजर’, ‘फूल बुट्टे चोली’लगायत । सबै गीतलाई श्रोता/दर्शकले औधी मन पराइदिनुभएको छ । उहाँहरूको यो साथ, सहयोग र माया सधैँ पाइरहने अपेक्षा गर्दछु । ‘हाम्रो यो माया’ करोडौँ क्लबमा रहेको छ ।

यहाँले चलचित्रका गीतमा पनि स्वर दिनुभएको छ ?
मैले चलचित्र ‘चुरीफुरी’, ‘नाइँ न भन्नु ल’, ‘प्रेमगञ्ज’ लगायत चलचित्रका गीतमा आफ्नो स्वर दिएकी छु ।

गीत-संगीतको औपचारिक कक्षा पनि लिनुभएको कि ?
दमकमा कमला खनालसँग सिकेँ भने काठमाडौंमा आएपछि चण्डीप्रसाद काफ्लेसँग सिकेँ । पछिल्लो समय राजकुमार मालाकारसँग गितार सिकिरहेकी छु ।

ADVERTISEMENT

मैले सबै प्रकारका गीत गाएकी छु । आधुनिक, पप, राष्ट्रिय, भजन, लोक, लोकभजन सबै गीत मलाई उत्तिकै मन पर्छ र गाएकी पनि छु । आधुनिक गीत अलिक बढी गाएकी छु । सबै खालका गीत गाउन रुचाउँछु । गीत/संगीतको क्षेत्र व्यापक र विस्तृत छ । यसलाई म कुनै परिभाषामा सीमित गर्न सक्दिन । गीत संगीत हाम्रो जीवन हो । मेरा लागि गीत-संगीत भनेको साधना हो ।

नेपाल आइडल सिजन चारको टप सेभेनसम्म पुग्न सफल हुनुभयो होइन ? अरू रियालिटी शोमा पनि भाग लिनुभएको थियो ।
हो, म नेपाल आइडल सिजन चारको टप सेभेनसम्म पुगेर आउट भएँ । मैले यसअघि सुरशाला जुनियर आइडल र भ्वाइस अफ नेपालमा भाग लिएकी थिएँ ।

यहाँलाई मन पर्ने गायक/गायिका ?
धेरैजना हुनुहुन्छ । पुराना लिजेन्डरी गायक/गायिकादेखि वर्तमान पुस्ताका धेरै मन पर्छ तर पनि नारायण गोपाल र अरुणा लामा असाध्यै मन पर्छ ।

मन पर्ने संगीतकारमा ?
धेरै हुनुहुन्छ । यसमा पनि शम्भुजित बास्कोटा र सुरेश अधिकारी विशेष हुनुुहुन्छ ।

मन पर्ने गीतकार ?
मैले धेरै गीतकारका शब्दमा स्वर दिएकी छु । सबै उत्कृष्ट हुनुहुन्छ । मलाई त्यत्तिकै मन पर्छ । कुनै एकको नाम लिनुपर्दा राजेन्द्र थापाको नाम लिन चाहन्छु ।

संयुक्त स्वरमा को-कोसँग गीत गाउनुभएको छ ?
रामकृष्ण ढकाल, सुगम पोख्रेल, निशान भट्टराई, प्रताप दास, एलिना चौहान, समीक्षालगायत धेरैसँग गाएकी छु ।

गीत-संगीत के हो ?
यो व्यापक र विस्तृत छ । यसलाई म कुनै परिभाषामा सीमित गर्न सक्दिन । गीत-संगीत हाम्रो जीवन हो । मेरा लागि गीत-संगीत भनेको साधना हो । जीवन र संगीत एकअर्काका परिपूरक हुन् भन्ने लाग्छ । जीवन भनेकै संगीत हो र संगीत भनेकै जीवन हो । संसारमा गीत-संगीत मन नपर्ने को नै हुन्छ होला र !

कस्ता गीत गाउन रुचाउनुहुन्छ ?
मैले सबै प्रकारका गीत गाएकी छु । आधुनिक, पप, राष्ट्रिय, भजन, लोक, लोकभजन सबै गीत मलाई उत्तिकै मन पर्छ र गाएकी पनि छु । आधुनिक गीत अलिक बढी गाएकी छु । सबै खालका गीत गाउन रुचाउँछु ।