काठमाडौं । जाजरकोट र रुकुम पश्चिममा भूकम्पबाट प्रभावितलाई गैरआवासीय नेपाली संघ(एनआरएनए)ले मंगलबार राहत सामग्री हस्तान्तरण गरेको छ । एनआरएनए अध्यक्ष डा. बद्री केसीको नेतृत्वमा जाजरकोटको बागान गाउँमा पुगेको टोलीले त्यहाँस्थित भूकम्प प्रभावितलाई प्रत्यक्ष भेटेर राहत सामग्री हस्तान्तरण गरेको हो ।
राहत सामग्री वितरण गर्दै अध्यक्ष केसीले भूकम्पका कारण सिंगो देशलगायत विदेशमा रहेका नेपालीको मन दुखेको बताउनुभयो । उहाँले विदेशमा बस्ने नेपाली दाजुभाइ, दिदीबहिनीको गाँस काटेर संकलन भएको सानो सहयोग भूकम्पपीडितसमक्ष ल्याउन पाउँदा सन्तोष मिलेको उहाँको भनाइ थियो । अध्यक्ष केसीले सन् २०१५ मा गएको महाभूकम्पमा समेत एनआरएनएले पाँच सयभन्दा बढी स्वयंसेवक खटाएर राहत तथा उद्धारमा सहयोग गरेको स्मरण गर्दै जाजरकोट र रुकुम पश्चिमको पुनर्निर्माणमा समेत विदेशमा बस्ने नेपालीले सहयोग गर्ने प्रतिबद्धता जनाउनुभयो ।
ADVERTISEMENT
एनआरएनएका महासचिव गौरीराज जोशीको नेतृत्वमा रुकुम पश्चिम पुगेको संघको टोलीले स्थानीय सरकारको समन्वयमा राहत सामग्री वितरण गरेको र टोली तीन दिन लगाएर भूकम्प प्रभावित क्षेत्रमा पुगेको एनआरएनएद्वारा जारी प्रेस विज्ञप्तिमा उल्लेख छ ।
महासचिव जोशीका अनुसार भूकम्प प्रभावित क्षेत्रमा त्रिपाल दुई सय थान, फेन्सी कपडा १० सेट (दुई सय थान), ब्ल्यांकेट दुई सय थान, चप्पल चार सय जोर, चामल चार सय बोरा, दाल सय केजी, हजार लिटर तेल, पाँच सय केजी नुनलगायतका राहत सामग्री हस्तान्तरण गरेको छ । यसअघि अध्यक्ष केसीको अध्यक्षतामा बसेको आकस्मिक बैठकले न्यूनतम एक करोड रुपैयाँको राहत कोषको स्थापना गर्ने घोषणा गर्दै भूकम्प प्रभावित क्षेत्रमा खट्न गैरआवासीय नेपालीलाई आग्रह गरेको थियो । अध्यक्ष, महासचिवका साथै उपाध्यक्ष राज रेग्मी, महिला उपाध्यक्ष रोजिना प्रधान, उपमहासचिव प्रवीन गुरुङ, सचिव मनोज गोर्खाली, सहकोषाध्यक्षद्वय कृष्ण तिमल्सिना, अभिमन्यु बस्नेतलगायतको टोली भूकम्प प्रभावित क्षेत्रमा खटिएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
देशका अधिकांश जिल्लामा वर्षा, सतर्कता