लामिछानेमाथि ढकालको आरोपै आरोप

काठमाडौं । राष्ट्रिय स्वतन्त्र पार्टीबाट निष्कासित गरिएका पूर्वमहामन्त्री डा. मुकुल ढकालले पार्टी सभापति तथा उपप्रधानमन्त्री रवि लामिछानेमाथि सहकारी प्रकरण र पासपोर्ट प्रकरणमा छानविन हुनुपर्ने बताउनुभएको छ । पार्टीले कारबाही गरेको भोलिपल्ट बुधबार पत्रकार सम्मेलन गरी उहाँले आफ्नो धारणा सार्वजनिक गर्नुभएको हो । पत्रकार सम्मेलनमा लामिछानेमाथि आक्रामक रूपमा प्रस्तुत हुनुभएका ढकालले पासपोर्ट प्रकरणमा लामिछाने दोषी ठहर भए उहाँले चुनावै लड्न नपाउने भन्दै यो पार्टीका लागि महत्वपूर्ण विषय भएको बताउनुभयो । उहाँले त्यसैले पार्टीबाटै यो प्रकरणमा छानविन हुनुपर्ने धारणा राख्नुभयो ।

लामिछानेले अमेरिकी र नेपाली गरी दोहोरो पासपोर्ट प्रयोग गर्नुभएको थियो । उहाँले नागरिकता पनि निष्क्रिय रहेको अवस्थामा प्रयोग गर्नुभएको थियो । पछि अदालतले उहाँलाई यस प्रकरणमा दोषी ठहर गर्दै सांसद पदबाट समेत पदमुक्त गरिदिएको थियो । त्यसपछि लामिछानेले नेपाली नागरिकता लिनुभएको थियो भने त्यसअघि बनाएको नेपाली पासपोर्ट राहदानी विभाग पुगेर बुझाउनुभएको थियो ।

यो विषयमा अहिले सर्वोच्च अदालतमा मुद्दा विचाराधीन छ । यस्तै, गोर्खा मिडिया नेटवर्क प्रालिको प्रबन्ध निर्देशक रहेका बेला विभिन्न सहकारीको करोडौँ रकम सो प्रालिमा आएको भन्दै त्यसमा पनि लामिछानेमाथि छानविन गर्न संसद्ले विशेष समिति नै बनाएको छ । ढकालले यी दुवै प्रकरण पार्टीको भविष्यसँग जोडिएको बताउनुभएको छ । उहाँले पार्टीको बैठकमा आफूले टेप लगाएर बस्नु गल्ती भए पनि त्यसपछि आफूसँग कुनै छलफल नगरी बैठक चलाएकाले त्यो पनि गल्ती भएको बताउनुभयो ।

ADVERTISEMENT

ढकालले बाढी-पहिरोबाट पीडित जनताका लागि गृह मन्त्रालयबाट जुन रफ्तारमा काम हुनुपर्ने हो त्यसो हुन नसकेको बताउनुभयो । उहाँले जनतालाई महसुस हुनेगरी काम गर्न गृहमन्त्री लामिछानेलाई सुझावसमेत दिनुभयो । नेता ढकालले जनता बाढी र पहिरोमा फसिरहँदा सभापति लामिछाने पार्टीको बैठक राखेर आफूलाई कारबाही गर्ने कि नगर्ने भनेर दौडधूपमा लागेको आरोप लगाउनुभयो । ढकालले लामिछानेलाई हिजोआज प्रचण्ड, देउवा र ओलीको शैली मनपर्न थालेको भन्दै टिप्पणी गर्नुभयोे । उहाँले लामिछानेलाई लक्षित गर्दै प्रधानमन्त्री पुष्पकमल दाहाल ‘प्रचण्ड’, नेकपा एमालेका अध्यक्ष केपी शर्मा ओली र कांग्रेस सभापति शेरबहादुर देउवाको शैली मनपर्नेलाई आफ्नो शैली बालापन लाग्न सक्ने भन्दै यसमा कुनै आपत्ति नभएको बताउनुभयो । उहाँले देउवा नेतृत्वमा सरकार बन्छ कि भनेर लामिछाने सरकारमा बसिरहेको जिकिर गर्नुभयो । ‘आजको रवि लामिछानेलाई प्रचण्डको शैली मन पर्छ । आजको रवि लामिछानेलाई कता÷कता ओलीको शैली मनपर्छ । देउवाको नेतृत्वमा सरकार बन्ला कि, ७६(३) अनुसार सरकार बन्ला कि भनेर कतै सुटुक्क सरकारमा जान पाइएला कि भनेर अझैसम्म उहाँ सरकारमा बसिरहनु भएको छ,’ उहाँले भन्नुभयोे, ‘प्रचण्ड, ओली र देउवाको शैली मनपर्ने लामिछानेलाई मुकुल ढकालको शैली बालापना लाग्नसक्छ । लागोस् मलाई मतलब छैन ।’

नेता ढकालले राजीनामा बुझाउन गएका रास्वपाका मन्त्रीहरू प्रधानमन्त्री प्रचण्डको कुरा सुनेर फर्किनुलाई बालापन भन्ने कि नभन्ने ? भन्दै प्रश्न गर्नुभयो । पार्टी केन्द्रीय समिति बैठकमा आफ्नो प्रतिवेदनमाथि छलफल हुनुअघि आफूसँग छलफल नगरिएको गुनासो पोख्नुभयो । बैठकअघि आफूले सार्वजनिक गरेको प्रतिवेदनको सारांश पनि सभापति लामिछानेको सल्लाहमै सार्वजनिक गरिएको उहाँले दाबी गर्नुभयो ।

ढकालले आफूलाई पार्टीले गरेको कारबाहीको विधि र प्रक्रिया नमिलेको भन्दै आफू अझै पनि महामन्त्री रहेको जिकिर गर्नुभयो । आफूलाई कारबाही गरेर रवि लामिछानेको एलिट क्लबले पार्टी कार्यालय कब्जा गरेकाले मिडियामा आउन बाध्य भएको उहाँको भनाइ छ । उहाँले अब आफूले के बोल्ने वा नबोल्ने भन्ने सुझाव लिनका लागि आगामी महिना देशभर प्रस्ताव यात्रा सुरु गर्ने र जनताको घर जाने जानकारी दिनुभयो । पार्टीको अनुशासनविपरीत ‘अभद्र’ र ‘अमर्यादित’ काम गरेको भन्दै रास्वपाले मंगलबार ढकाललाई साधारण सदस्य मात्रै रहने गरी महामन्त्री, केन्द्रीय सदस्य र प्रवक्ताको जिम्मेवारीबाट बर्खास्त गरेको थियो ।