पुल निर्माण १० वर्षदेखि अलपत्र

बैतडी । बैतडीमा १० वर्षदेखि मोटरेवल पुल निर्माण कार्य सम्पन्न हुन सकेको छैन । जिल्लाको पाटन नगरपालिका-६ को सुर्नया नदीमाथि बन्न लागेको मोटरेबल पुल १० वर्षदेखि अलपत्र अवस्थामा रहेको हो । पाटन-लोर्खा-सकार-कैलपाल ग्रामिण सडकखण्ड अन्तर्गत सुर्नया गाडको निर्माणाधीन सम्पन्न हुन नसकेको हो । उक्त पुल निर्माण नहुँदा पाटन नगरपालिकाको वडा नं १ र ७ का स्थानीयहरू सडक पहुँचबाट वञ्चित हुने गरेका छन् । वर्षातको समयमा सुर्नयामा पानीको बहाव बढ्ने गरेका कारणले सवारी आवागमन ठप्प हुने गरेको छ । हिउँदयाममा पनि उक्त सडकमा सहज आवागमन हुने गरेको छैन । मोटरेबल पुल नभएकै कारणले नगरपालिका र जिल्लाको सदरमुकामसम्म आवतजावतमा समस्या हुने गरेको वडा नं १ का स्थानीय हिक्मत भट्टराईले बताउनुभयो ।

आर्थिक वर्ष २०७१/०७२ मा तीन वर्षभित्रै निर्माण सम्पन्न गर्ने सम्झौताअनुसार काम सुरु भएको भए पनि हालसम्म निर्माण सम्पन्न हुन सकेको छैन । सडक डिभिजन कार्यालयका अनुसार पुल निर्माणको ६० प्रतिशत मात्रै भौतिक प्रगति भएको छ । २०७१ साउन ४ गते एडभेञ्चर कन्ट्रक्सन प्रालिसँग दुई करोड ९१ लाख २७ हजार ३५५ रुपैयाँमा तीन वर्षभित्र निर्माण सम्पन्न गर्ने भन्दै सम्झौता भएको थियो ।

निर्माण व्यवसायीलगायत अन्य प्राविधिक कारणहरूले ढिलाइ भएको सडक डिभिजन कार्यालय बैतडीका प्रमुख मुकुन्दप्रसाद लामिछानेले जानकारी दिनुभयो । ‘ठेकेदारलाई ताकेता पत्र पठाएका छौँ, यो वर्ष नसकिए ठेक्का नै रद्द तयारी छ,’ लामिछानेले भन्नुभयो । निर्माण कम्पनीले निर्माणमा ढिलाइ गरेको भनिए पनि हालसम्म प्रत्येक आर्थिक वर्षमा सडक डिभिजन कार्यालयले नै भुक्तानी गर्दै आएको छ ।

निर्माणको जिम्मा पाएको कम्पनीले पनि तीनपटक म्याद थप गर्दा पनि निर्माण गर्न सकेन । २०७१ भदौ १५ गते पुल निर्माण सुरु गरिएको थियो । पुलको निर्माणस्थलसम्म जाने बाटोको विवादका कारण ३२ महिनासम्म अल्झिनु परेको निर्माणको जिम्मेवारीमा रहनुभएका मदनमोहन विष्टले बताउनुभयो । त्यसपछि पनि संघ र प्रदेश सरकार मातहत हेर्ने भन्ने उल्झनका कारण समयमा काम गर्न नसकिएको विष्टले बताउनुभयो । पुल निर्माणका लागि आवश्यक कच्चा पदार्थ र सामान ढुवानी भइरहेकाले लगत्तै काम सुरु गरिने उहाँले जानकारी दिनुभयो ।

ADVERTISEMENT

निर्माण व्यवसायी र सडक डिभिजन कार्यालयको लापरबाहीका कारणले स्थानीयहरूले समस्या भोग्नुपरेको वडा नं ७ का वडा अध्यक्ष ललितबहादुर चन्दले बताउनुभयो । ‘हामीले पटक-पटक सडक डिभिजन कार्यालयसँग आग्रह गर्‍यौँ, काम समयमा नै सम्पन्न गर्दिनुहोस् भनेर, कहिल्यै वास्ता गरिएन’, वडा अध्यक्ष चन्दले भन्नुभयो, ‘मोटरेबल पुल नबन्दा यहाँका विकास आयोजनाहरू प्रभावित बने, नागरिकहरू समस्यामा छन्,’ । उक्त पुल समयमै निर्माण सम्पन्न भएको भए अहिले दुवै वडा जोड्ने सडक पक्की भइससक्ने चन्दको दाबी छ ।

बेलाबेला सबै निकायसँग पुल निर्माण सम्पन्न गर्नका लागि खबरदारी गर्दा पनि कुनै सफलता हात नलागेको वडा नं १ का वडा अध्यक्ष तर्क ठगुन्नाले बताउनुभयो । स्थानीय तहदेखि संघीय सरकारसमक्ष पुल निर्माणको लागि हारगुहार गर्दा पनि कुनै सुनुवाइ नभएको उहाँको भनाइ थियो । सडक डिभिजन कार्यालयको विवरणअनुसार यहाँ बर्सेनि बजेट निकासा भइरहेको पाइएको छ । पटकपटक म्याद थप गर्दै आर्थिक वर्षको अन्त्यमा बजेट भने निकासा भइरहने गरेको पाइएको छ ।

पुल निर्माणका लागि हालसम्म तीनपटक म्याद थप गरिएको छ भने एक करोड ९८ लाख आठ हजार २५८ रुपैयाँ निकासा भई खर्च भइसकेको सडक डिभिजन कार्यालय पाटन, बैतडीका सूचना अधिकारी असिम रसाइलीले जानकारी दिनुभयो । ‘विविध कारणले निर्माण सम्पन्न हुन सकेन, यस वर्षभित्रै निर्माण सम्पन्न हुनेगरी निर्माण कम्पनीसँग सर्त भइसकेको छ,’ इञ्जिनियर रसाइलीले भन्नुभयो, ‘यस वर्षभित्र निर्माण सम्पन्न नभएमा ठेक्का रद्द गरी कम्पनीलाई कालोसूचीमा राख्नेछौँ,’ उहाँले भन्नुभयो ।