एमालेले लियो मंसिर ७ को जनप्रदर्शनको स्वामित्व

काठमाडौं । प्रमुख प्रतिपक्ष दल नेकपा एमालेले पार्टीको भ्रातृ संगठन युवा संघले मंसिर ७ गते काठमाडौंमा गर्ने बृहत् जनप्रदर्शनको स्वामित्व लिएको छ । शनिबार पार्टी केन्द्रीय कार्यालय च्यासलमा अध्यक्ष केपी शर्मा ओली र महासचिव शंकर पोखरेलसहितका नेता सहभागी विशेष भेलाले मंसिर ७ को प्रदर्शनको स्वामित्व लिएको हो । पार्टी केन्द्रीय कार्यालय च्यासलमा आयोजना गरिएको विशेष भेलालाई सम्बोधन गर्दै अध्यक्ष केपी शर्मा ओलीले मंसिर ७ गते राष्ट्रिय युवा संघको नेतृत्वमा हुने बृहत् जनप्रदर्शनमा पार्टीको साथ/समर्थन रहेको बताउनुभयो । ७ गतेको दिन सरकार र दक्षिणपन्थी शक्तिहरूलाई थोरै संकेत मात्र गर्ने बताउँदै अध्यक्ष ओलीले भन्नुभयो, ‘हामीले यातना सहेर, अंगभंग भएर, जेलनेल सहेर ल्याएको लोकतन्त्र हो यो । बेघरबार भएर, बेहालका अनेक स्थितिहरू झेलेर ल्याएको हो । त्यसकारण लोकतान्त्रिक गणतन्त्रलाई चलाउने र औँलो ठड्याउने काम कतैबाट नहोस् भनेर म चेतावनीको भाषामा भन्न चाहन्छु । लोकतन्त्रको विरुद्ध लड्ने कुरा त छोड्दिऊँ, लोकतन्त्रको विरुद्ध औँलो ठड्यायो भने त्यो औँलो कसरी तल झार्नुपर्छ शान्तिपूर्ण तरिकाले हामी तल झार्दिन्छौँ ।’

अध्यक्ष ओलीले प्रदर्शनमा निषेधित क्षेत्र नतोड्न निर्देशन दिँदै भन्नुभयो, ‘हामी निषेधित क्षेत्र तोड्दैनौँ । निषेधाज्ञा तोड्दैनौँ,कुनै समय त्यस्तो आउन सक्छ कालान्तरमा । आन्दोलनका क्रममा के हुन्छ त्यो बेग्लै कुरा हो । आज निषेधाज्ञा तोडिँदैन, सरकारले स्थल विशेष हामीलाई तोक्यो भने हामी त्यही स्थल विशेषमा केन्द्रित हुन सक्छौँ । जुन रुट सरकारले भन्छ त्यो रुटमा हामी चल्न सक्छौँ, अहिले अवज्ञा गरेर जानपर्ने खालको स्थिति होइन ।’ सकेसम्म राता टोपी लगाएर र हरेकले झण्डा बोक्नु राम्रो हुने उहाँको सुझाव छ । प्रदर्शनका क्रममा कसैप्रति जाइनलाग्न र संयमित हुन पनि अध्यक्ष ओलीले निर्देशन दिनुभयो । पार्टीको प्रदर्शनस्थल पनि अहिले माइतीघर तोकिए पनि पछि परिवर्तन हुनसक्ने उहाँको भनाइ छ ।

अध्यक्ष ओलीले दुर्गा प्रसाईंको नेतृत्वमा मंसिर ७ गते हुन लागेको प्रदर्शनले काठमाडौं फोहोर मात्र पार्ने टिप्पणीसमेत गर्नुभएको छ । दुर्गा प्रसाईंको नाम नलिई कसैकसै व्यक्तिलाई उभ्याएर प्रतिक्रियावादी शक्तिहरू देशभरबाट मान्छे उतार्न लागेको टिप्पणी गर्नुभएका ओलीले भन्नुभयो, ‘एउटा कसै/कसै व्यक्तिलाई उभ्याएर प्रतिक्रियावादी शक्तिहरू जोडतोडले लागेका छन् देशभरबाट काठमाडौंमा मानिसहरू उतार्न, ती मानिसहरू आएर काठमाडौंमा कुनै केही हुने होइन, काठमाडौं फोहोर मात्र हुने हो ।’ अहिलेको अनियमितता र बेथितिको कारण गठबन्धन सरकार रहेको ओलीको आरोप छ ।

ADVERTISEMENT

सरकारले गुण्डा र अपराधीलाई छुट्कारा दिन रुचि देखाएको आरोप
पूर्वप्रधानमन्त्रीसमेत रहनुभएका अध्यक्ष ओलीले सरकारले विकासभन्दा गुण्डाहरूको संरक्षणमा आफ्नो रुचि देखाएको समेत आरोप लगाउनुभएको छ । वर्तमान सरकारलाई विकासतर्फ नभएर गुण्डाहरूको प्रोत्साहन र अपराधीहरूलाई छुटकारा दिनतर्फ केन्द्रित भएको आरोप लगाउँदै ओली भन्नुभयो, ‘जिल्ला अदालतले सर्वस्वसहित जन्मकैद गर्छ । पुनरावेदन अदालतले, उच्च अदालतले त्यसैलाई दोहोर्‍याउँछ । सर्वोच्चले त्यही भन्छन् । तर, सरकार थुन्नै नहुने भन्छ । अदालत किन चाहियो ? सरकारलाई मन परेका मान्छे थुन्न नपर्ने मन नपरेका मान्छेहरू थुन्न पर्ने ?’

राष्ट्रपतिले कांग्रेसको प्रतिनिधिको रूपमा काम गरेको आरोप
नेकपा एमालेका अध्यक्ष केपी शर्मा ओलीले राष्ट्रपति रामचन्द्र पौडेलले नेपाली कांग्रेसको प्रतिनिधिको रूपमा काम गरिरहेको आरोप लगाउनुभएको छ । राष्ट्रपतिले तनहुँमा पुगेर कांग्रेसमा भोट हालेकोमा धन्यवाद दिएको र भूकम्प प्रभावित क्षेत्र जाजरकोटमा पनि कांग्रेसको प्रतिनिधिको रूपमा पुगेको ओलीको जिकिर छ । भूकम्प पीडितको राहतमा खटिएका सेना र प्रहरीको काम गर्न नदिने गरी किन जाजरकोट जानुपरेको ? भनी राष्ट्रपति पौडेललाई प्रश्न गर्नुभएका ओलीले भन्नुभयो, ‘राष्ट्रपति जाजरकोट किन जानुभएको ? कति मान्छे मरे भन्ने कुरा उहाँले सुन्नुभएको थियो । नेताहरूको भिडले, नेताहरूको चाकडीमा सेना, प्रहरी खट्नुपर्दा त्यहाँ उद्धार गर्न पाइएन भन्ने आएकै थियो । उहाँ अस्पतालमा बिरामी हेर्न जाने नाममा अस्पतालका सम्पूर्ण डाक्टरहरू उहाँहरूलाई ब्रिफिङ गर्न आउनुपर्ने । बिरामी छोडेर आउनुपर्ने भन्ने कुरा थाहा नै थियो । अनि, माओवादी गए भनेर कांग्रेस भएर किन जानु पर्‍यो राष्ट्रपतिज्यू ? उहाँ राष्ट्रपति भएर त्यहाँ जानुभएन । त्यहाँ कांग्रेस छुट्यो भनेर जानुभयो ।’ अध्यक्ष ओलीले प्रधानमन्त्री प्रचण्ड र सरकारका मन्त्रीहरूले भूकम्प प्रभावित क्षेत्रमा गएर माओवादीका अध्यक्ष र मन्त्रीहरूको रूपमा काम गरेको भन्दै आक्रोशसमेत व्यक्त गर्नुभयो ।

देश कमजोर बनाउन एमाले र नेपाली सेनामाथि आक्रमणः महासचिव पोखरेल
नेकपा एमालेका महासचिव शंकर पोखरेलले सरकार चलाउनेहरू नालायक भए भन्दैमा एमाले सामाजिक अराजकता टुलुटुलु हेरेर बस्न नसक्ने चेतावनी दिनुभएको छ । मंसिर ७ गते आयोजना गरिने जनप्रदर्शनको तयारीको सन्दर्भमा जनसंगठन समन्वय संयन्त्रले पार्टी कार्यालय च्यासलमा आयोजना गरेको भेलालाई सम्बोधन गर्दै महासचिव पोखरेलले देशलाई पराधीन बनाउन एमाले र सेनामाथि प्रहार भइरहेको जिकिर गर्दै भन्नुभयो, ‘राष्ट्रलाई पराधीन बनाउनका लागि आज षड्यन्त्र भइरहेको छ । यति बेला दुईवटा शक्तिहरूमाथि प्रहार भइरहेको छ । देशलाई पपेट बनाउन सकिन्छ कि भनेर एमालेमाथि प्रहार भएको छ । तर, एमाले सरकारमा छैन । तर, प्रहारको निशाना एमालेतर्फ छ । अर्को नेपाली सेनामाथि प्रहार भएको छ । एमाले र सेनालाई कमजोर बनाउन सकियो भने नेपाल राष्ट्रलाई विदेशहरूको क्रिडास्थल बनाउन सकिन्छ भन्ने लागेर त्यस्तो भएको हो ।’ महासचिव पोखरेलले राष्ट्रनिर्माणको अभियानका लागि मंसिर ७ वार्मअप मात्रै भएको र त्यसपछि पनि बेथिति, कुशासन र सत्ताका गलत नीति र प्रतिगामी कदमहरूविरुद्ध निरन्तर जारी रहने बताउनुभयो । राष्ट्रिय युवा संघले आगामी मंसिर ७ गते भ्रष्टाचार, महँगी, अनियमितता तथा राज्यको अराजकताविरुद्ध काठमाडौंमा जनप्रदर्शन गर्दै छ । त्यसैदिन दुर्गा प्रसाईंले पनि काठमाडौं केन्द्रित प्रदर्शन कार्यक्रम राख्नुभएको छ ।