एक महिनामा एक लाख ६५ हजार अफगानीले पाकिस्तान छाडे

Friday November 3, 2023

Read Time = 3 mins

प्रिन्ट संस्करण

विदेश

A A- A+

तोर्खम । एक महिनामा एक लाख ६५ हजारभन्दा बढी अफगानी पाकिस्तान छाडेको अधिकारीहरूले बिहीबार बताएका छन् । इस्लामाबादले १७ लाख अफगानीलाई मुलुक छाड्न वा पक्राउ र निर्वासनको सामना गर्न अल्टिमेटम दिएपछि पाकिस्तान छाडेका हुन् । नोभेम्बर १ को समयसीमा नजिक आउनासाथ प्रहरीले अफगानीहरूलाई पक्राउ गरेर हिरासतमा लिनका लागि दर्जनौँ होल्डिङ सेन्टर खोल्न सुरु गरेपछि पछिल्ला केही दिनमा बहुसंयक मानिस सीमामा पुगेका छन् ।

खैबर पख्तुनख्वा प्रान्तको तोर्खममा पाकिस्तानको सबैभन्दा व्यस्त सीमाविन्दुमा अधिकारीले सात किलोमिटरसम्म फैलिएको २८ हजार मानिसको लाइनलाई हटाउन बिहीबार बिहानै काम गरेका थिए । त्यसपछि सीमामा यातायात सहज भएको छ । प्रहरीले खोजी अभियान सुरु गरेका कारण अधिकारीहरूले कागजातविहीन अफगानहरूलाई स्वेच्छाले जान प्रोत्साहन गरेका छन् ।

सीमावर्ती जिल्लाका डेपुटी कमिश्नर अब्दुल नासिर खानले भन्नुभयो, ‘समयसीमा समाप्त भएकाले अवैध अफगानीहरू ठूलो संख्यामा तोर्खमा पुगेका छन्, मानिस अहिले पनि स्वेच्छाले फर्किन सक्छन् तर आज सीमामा एक हजार मात्र उपस्थित छन् ।’

खैबर पख्तुनख्वा प्रान्तबाट एक लाख २९ हजार मानिस भागेको प्रान्तीय गृह विभागले जनाएको छ । त्यहाँको सीमा अधिकारीले ३८ हजार एक सय मानिस बलुचिस्तानको चमन हुँदै आएको बताएका छन् ।

हालैका दशकमा हिंसात्मक संघर्षका क्रममा भागेर लाखौं अफगानीहरू पाकिस्तान आएका छन् । तीमध्ये सन् २०२१ अगस्टमा तालिबान सरकारले सत्ता कब्जामा लिएर कठोर इस्लामी कानुन लागू गरेपछि करिब ६ लाख मानिस रहेका छन् । रासस/एएफपी ।

अफगानी

पाकिस्तान

यो खबर पढेर तपाईलाई कस्तो महसुस भयो ?