सर्लाही । सर्लाहीका किसानले उत्पादन गरेको स्थानीय (लोकल) जातको गोलभेँडा प्रशस्त मात्रामा बजार भित्रिन थालेको छ । यो वर्ष गत असोजको भारी वर्षाले गोलभेँडाको बेर्ना सखाप पारेकाले पुनः बेर्ना तयार पारेर बोट सार्नुपर्दा ढिलो गरी उत्पादन भएको किसानले बताएका छन् ।
स्थानीय गोलभेँडा बजारमा पर्याप्त भित्रन थालेसँगै भारतीय गोलभेँडाको आयात घट्न थालेको छ । तुलनात्मक रुपमा स्वादिलो हुने स्थानीय जातको गोलभेँडाले केही दिनदेखि भारतीय गोलभेँडा तत्काललाई यहाँका बजारबाट विस्थापित नै गरेको छ । चारैतिर स्थानीय जातको गोलभेँडा तयार भएर बजारमा ठूलो परिमाणमा भित्रन थालेसँगै किसानले मूूल्य भने कम पाउन थालेका छन् । यो वर्ष किसानले २५ किलो अट्ने एकक्रेट गोलभेँडा तीन हजार रुपियाँसम्ममा बिक्री गरेका छन् ।
अहिले प्रशस्त फल्न थालेपछि क्रेटको एक हजार २०० रुपियाँदेखि एक हजार ५०० रुपियाँसम्ममा बिक्री हुन थालेको छ । मधेश प्रदेशको प्रमुख तरकारी बजारका रुपमा रहेको लालबन्दी थोक तरकारी बजारमा गोलभेँडा प्रतिक्रेजी ४५ देखि ५० रुपियाँसम्म बिक्री गर्न पाउँदा किसान खुसी देखिन्छन् ।
भण्डारण गरेर राख्ने चिस्यान केन्द्रको अभावमा गोलभेँडा खेती गर्ने किसानलाई गोलभेँडा पाक्नासाथ बजारमा जति नै मुल्य भएपनि बेचिहाल्नुपर्ने बाध्यता छ । अघिल्ला वर्षहरुको तुलनामा यो वर्ष गोलभेँडाले राम्रो मूल्य पाइरहेको लालबन्दी नगरपालिका-११, हीरापुरका किसान सुमनलाल घिसिङले बताउनुभयो । बोट हुर्काउने बेला वर्षाले निराश पारेपनि अहिले राम्रो भाऊ पाउँदा खुसी लागेको घिसिङको भनाई छ ।
सर्लाहीमा उत्तरी भेगको लालबन्दी, हीरापुर, पत्थरकोट, जियाजोर, परवानिपुर, घारिबथान, रानीगन्ज, सासापुर, नवलपुर, डाबरी, घुर्कौलीलगायत भेगमा व्यवसायिक रुपमा गोलभेँडा खेती हुने गरेको छ । यस भेगका किसानले बजारमा प्रशस्त गोलभेँडा बिक्री गर्न ल्याउन थालेसँगै लालबन्दी थोक तरकारी बजारका व्यापारीले अन्यत्र शहरमा पठाउने गोलभेँडाको परिमाण बढाउन थालेका छन् ।
लालबन्दी थोक तरकारी बजारका अध्यक्ष समेत रहेका व्यापारी तोरनबहादुर मगरले यहाँबाट दैनिक ६० टन गोलभेँडा निकासी हुन थालेको जानकारी दिनुभयो । किसानले लालबन्दी बजारमा ल्याएर बेच्ने गोलभेँडा व्यापारीले मलङ्गवा, जनकपुर, वीरगन्ज, सिन्धुलीसहित सङ्घीय राजधानी काठमाडौंसम्म पुर्याउने गरेका छन् । पछिल्लो समय गोलभेँडा फल्ने सिजनमा पूर्व पश्चिम राजमार्गस्थित हरिवनको तीनघरे लच्कामा अस्थायी बजार राखेर व्यापारीले त्यसभेगका किसानले फलाएको गोलभेँडा खरिद गर्ने गरेका छन् ।
Like
Love
Happy
Surprised
Sad
Excited
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच