बिजनेसमा कम्पिटिसन जरुरी छ तर त्यो फेयर हुनुपर्छ : सुष्मा महरा, सञ्चालक फेसियल हाउस

सुन्दरताका पारखीहरूको ब्राण्ड बनेको छ ‘स्किन केयर फेसियल हाउस’ । काठमाडौंको मुटु सुन्धारास्थित काठमाडौं मलमा रहेको यो फेसियल हाउसलाई सबैको रोजाइ बनाउन सफल नाम हो यसकी सञ्चालिका सुष्मा महरा । विगत डेढ दशकदेखि सौन्दर्य व्यवसायमा संलग्न रहँदै आउनुभएकी उहाँ धेरैको प्रेरणाको स्रोतसमेत हुनुहुन्छ । विभिन्न आरोह-अवरोह र आरोप-प्रत्यारोपबीच नबिराउनु नडराउनु भन्ने मूल वाक्यलाई आत्मसात गर्दै अघि बढिरहेका कारण यो सफलता हात लागेको उहाँ बताउनुहुन्छ । अन्य विभिन्न नौवटा ब्राञ्च पनि सञ्चालनमा ल्याउनुभएको उहाँ सफलताको मुख्य कारण ग्राहकको सन्तुष्टिलाई नै मान्नुहुन्छ । हाल काठमाडौं मल (हेड अफिस) छ भने विभिन्न ब्राञ्च सञ्चालनमा छन् । यतिबेला उहाँको फेसियल हाउसले १७औँ वार्षिकोत्सव मनाउँदै छ । हजारौं विद्यार्थीलाई सौन्दर्यकला सिकाउनुभएको महराले सयौंलाई रोजगारीसमेत दिनुभएको छ । मानिसको बाहिरी आवरण मात्र सुन्दर भएर हुँदै भित्री र बाहिरी दुवै रूपमा सुन्दरता हुनुपर्ने महरा ‘भन्नलाई मान्छेको रूप जस्तो भए तापनि मन सफा हुनुपर्छ भनिन्छ । तर, हरेक मान्छेले देख्ने भनेकै मान्छेको बाहिरी सुन्दरता हो । उसको रूप हो । भित्री रूप हेर्न त कसले कसको सक्छ र ?’ भन्नुहुन्छ । उहाँ भन्नुहुन्छ, ‘यसो भन्दैमा बाहिरी रूपमात्र सुन्दर भएर हुँदैन । मानिसको बानी, बेहोरा, भित्री मन सबै सफा र सुन्दर हुनुपर्छ । भित्री रूप मेकअप गरेर सुन्दर बनाउन नसके पनि बाहिरी सुन्दर बनाउन सकिन्छ । र, आफू सुहाउँदो मेकअप गर्नु पनि पर्छ ।’

मेकअप भन्नेबित्तिकै महिलालाई भन्ने हामीकहाँ मान्यता रहेको बताउँदै महरा पुरुषका लागि पनि उत्तिकै जरुरी रहेको बताउनुहुन्छ ।
‘मेकअपले अनुहारमा सुन्दरता बढाउने हो । चाहे महिला होस् चाहे पुरुष, सबैलाई आफू सुन्दर बनूँ भन्ने हुन्छ । महिलाहरू देखिने गरी नै मेकअप गर्छन् । पुरुष त्यसरी गर्दैनन् । फरक यति हो । यो दुवैका लागि उत्ति नै आवश्यक छ ।’ आफ्नो फेसियल हाउसमा महिला-पुरुष दुवै खाले ग्राहक आउने उहाँको भनाइ छ । पछिल्लो समय सौन्दर्यचेत बढ्दै गएको बताउनुहुने उहाँ सबैले आफ्नो छालाको, हेयरको र सम्पूर्ण स्वास्थ्यको ख्याल गर्नुपर्ने बताउनुहुन्छ । बिजनेसमा कम्पिटिसन जरुरी छ तर त्यो फेयर हुनुपर्छ भन्ने मान्यता राख्नुहुने सुष्मा महरासँग हिमालय टाइम्सका लागि गीता अधिकारीले गर्नुभएको संवाद :

निकै व्यस्त हुनुहुन्छ है ?
एकदमै व्यस्त नै छु भन्नुपर्ला । आफ्नो काम, पारिवारिक जिम्मेवारी र सामाजिक कार्य । यस्तै-यस्तै दिनचर्यामा आफूलाई व्यस्त बनाउँदै आएकी छु ।

बढी फोकस केमा दिनुहुन्छ ?
सबैतिर समय छुट्टाएकी छु तर बढी समय मैले मेरो बिजनेसलाई नै दिएकी छु । पछिल्लो समय आर्थिक संकटको सामना देशले नै गरिरहेको छ । यो समय कमाउने भन्दा पनि बाँच्नुपर्छ है भन्ने खालको रहेको पाउँछु म ।

यहाँका विभिन्न अफरहरू सामाजिक सञ्जालमा आइरहेका हुन्छन्, यसले कत्तिको ग्राहकलाई आकर्षित गर्दोरहेछ ?
मलाई के लाग्छ भने यतिबेला सबैतिर आर्थिक संकट छ । यस्तो बेलामा पनि आइरहनुहुन्छ । फेरि राम्रो हुने चाहना सबैलाई हुन्छ । अफरहरू दिँदा यो अफरलाई सदुपयोग गरौँ भन्ने धेरैको चाहना हुन्छ र आउनुहुन्छ । अफरले कस्टमरलाई तान्छ । अर्को कुरा हामी ब्राण्ड भएका छौँ । हामीले राम्रो प्रोडक्टमात्र चलाउँछौँ । अफर हुँदा यसले आकर्षित गर्छ र आउनुहुन्छ ।

पछिल्लो समय सौन्दर्य चेतमा वृद्धि भएको हो ?
हो, पछिल्लो समय सौन्दर्य चेतमा निकै वृद्धि भएको छ । पहिला-पहिला कलेज सुरु भएपछि मात्र अलिकति राम्री हुन खोज्ने खालको थियो । त्यो लगाउँदा पनि डराइडराइ लगाउने बानी थियो । तर, अहिले त्यस्तो छैन । पहिला लगाएको पनि थाहा नहोस भन्ने पाराले लगाइन्थ्यो । तर, अहिलेको समयमा छोरा मान्छे होस् वा छोरी मान्छे होस् त्यस्तो छैन । अहिले सानैदेखि केयरिङ गर्ने बानीको विकास भएको छ । आफ्नो स्किनलाई कसरी केयर गर्ने, छाला कसरी राम्रो बनाउने, केशलाई स्वस्थ कसरी राख्ने भन्ने सानैदेखि नै विकास भएको पाउँछु म । पहिला अर्कोले जे लगायो त्यही लगाउने गरिन्थ्यो भने अहिले आफ्नो स्किनलाई कुन राम्रो हुन्छ त्यही लगाउने, आफ्नो छालाको कसरी स्याहार गर्ने भन्ने विकास भएको छ । सोसियल मिडियाले पनि यसलाई प्रभाव पारेको मान्छु म ।

यहाँको यो फेसियल हाउसमा कस्ता मान्छे बढी आउने गरेका छन् ?
हामीकहाँ स्किन र हेयर दुवै थरिका व्यक्तिहरू आउनुहुन्छ । तपाईंले पनि यहाँ देखिहाल्नु भयो बाहिर हामी हेयर टेस्टमा बिजी छौँ भने भित्र स्किन टेस्टमा बिजी छौँ । हामीकहाँ दुवै प्रकारका ग्राहकहरू आउनुहुन्छ । हामीले स्किनको समस्या कसरी भयो, कपालको समस्या कसरी भयो भनेर पहिला उहाँलाई बुझाइदिन्छाँै । समस्या भएपछि त्यसको समाधान त छँदै छ एउटा पार्ट, त्यो रोग लाग्न नदिन के गर्न सकिन्छ त्यो पनि हामी जानकारी गराउँछाँै उहाँहरूलाई । कति जना त यो नलेजमात्रै पनि लिन आउनुहुन्छ ।

स्किन कति प्रकारको हुन्छ ?
स्किन भन्न त ड्राई, ओएली, कम्बिनेसन सेन्सेटिभ भनिन्छ । यो सँगसँगै वेदरले पनि धेरै महत्व राख्दछ । ओएली स्किन विन्टरमा एकदम ड्राई पनि हुन्छ, एकदमै मेरो ड्राई स्किन भनेर पनि भएन गर्मी महिनामा ओएली बन्न पनि सक्छ । स्किन टाइप वेदरले गर्दा पनि चेन्ज हुन्छ । सदाबाहर ओएली र ड्राई स्किन भन्ने हुँदैन ।

अब आफूले मेरो स्किन कस्तो भनेर कसरी थाहा पाउने ?
साधारण कुरा छ । जब हामीले बेलुका फेस वास गरेर सुत्यौँ र सुतिसकेपछि बिहान उठेर एउटा ड्राई टिस्यु लिएर स्किनमा ड्याप गरौँ, ड्याप गर्दा तेल देखियो भने त्यो ओएली छ, देखिएन भने त्यो ड्राई छ । होइन टि जोनमा मात्रै चिल्लो आएको छ, छेउ-छेउमा ड्राई छ भने त्यो कम्बिनेसन छ ।

पछिल्लो समय हरेक टोलदेखि लिएर महल र व्यापारिक केन्द्रहरूमा निकै पार्लर खुलेका छन्, कत्तिको छ कम्पिटिसन ?
मलाई के लाग्छ भने बिजनेसमा कम्पिटिसन जरुरी छ । मात्रै के हो भने त्यो फेयर हुनुपर्छ । फेयरवाला कम्पिटिसनले सबैलाई बाँच्न सजिलो हुन्छ । खराब कम्पिटिसनले न आफूले कमाउँछ न अर्कोलाई कमाउन दिन्छ । बिजनेसमा पोलिसी चाहिन्छ । केही नयाँ थिम चाहिन्छ । म त के भन्छु भने आउँदैन भने कपी गर्नुहोस् । अरूलाई होच्याएर आफू कहिल्यै अघि बढिँदैन । हरेक देशमा कम्पिटिसन छ । हरेक पसलमा आ-आफ्नो राइट्स छ । बाटोबाट कसैले तानेर त ल्याउँदैन नि ।

ADVERTISEMENT

यति धेरै फेसियल हाउस छन्, ब्युटिपार्लरहरू छन्, तपाईंकोमा नै आउनुपर्ने के-कस्ता कारण छन् ?
पछिल्लो समय हामीले रिभ्यु लिन पनि थालेका छौँ । तपाईं यहाँ किन आउनुभयो भनेर पनि सोध्न थालेका छौँ । कहाँदेखि र किन हामीकहाँ आउनुभयो भनेर सोध्ने गर्छौं । पार्लर भनेर पहिलोपल्ट हामीकहाँ आएको पनि पाएका छौँ भने नियमित ग्राहक पनि हुनुहुन्छ । अनि अर्को कस्तो पनि छ भने वाक्क दिक्क सबै पार्लर चहारेर हामीकहाँ आएको पनि हामीले धेरै पायौँ । मेरा भिडियोहरू हेरेर, कस्टमरको रिभ्यु हेरेर पनि धेरै आउनुभएको छ । धेरैतिर गयौँ एकचोटि त्यहाँ लास्ट ट्राई गरौँ भनेर पनि धेरै आउनुभएको छ ।

यहाँको फेसियल हाउस एउटा ब्राण्ड भएको छ । यहाँ पनि यो बिजनेसमा सक्सेस हुनुभएको छ । कत्तिको ग्राहो रहेछ ?
धेरै गाह्रो रहेछ । जन्माउन त जन्माइयो त्यसलाई राम्रो बनाउन धेरै गाह्रो काम हो । अनेक आरोह अवरोहबीच अघि बढ्नुपर्ने रहेछ । विभिन्न आरोप प्रत्यारोपबीच आफूलाई अघि बढाउँदै जानुपर्ने रहेछ । मैले देश विदेशबाट आफूले सिकेका चिजहरू देशमा नै केही गराँै भनेर यो सुरुवात गरेकी थिएँ । तर, हौसलाभन्दा पनि अनेक लाञ्छना लगाउने काम भए । काम गर्न होमिइसकेपछि यसलाई कसरी राम्रो बनाउने भन्नेतिर नै मैले दिनरात लगाएँ । यसले मलाई नाम दियो, सबैको माया दियो । यो नाम र माया बढ्दै जाँदा, यसको लोकप्रियता बढ्दै गयो । बाह्रवटा ब्राञ्च पनि मैले मेरै हातले खोलेँ । यो बीचमा कहिले भूकम्प र कहिले कोभिडका कारण मैले तीनवटा ब्राञ्च बन्द गर्नुप¥यो । अहिले नौवटा ब्राञ्च सञ्चालनमा छन् । सफल हुनका लागि हिम्मत हार्नुहुँदैन । मिसन र भिजनका साथ निरन्तर आफ्नो लक्ष्यमा अघि बढ्नुपर्छ । काम कहिल्यै पनि ठूलोसानो हुँदैन । जसले जे काम गर्छ, त्यही काम उसका लागि ठूलो हो । निरन्तर गरियो भने सफल पनि भइन्छ ।

यो बीचमा यहाँले विभिन्न आरोप-प्रत्यारोप पनि खेप्नुप¥यो ?
हो, मैले माथि इंगित गरेकी थिएँ तपाईंले यसलाई सोध्नुभयो । ममाथि विभिन्न मिथ्या आरोप पनि लगाइयो । नेपालमा भनौँ या विश्वमै म एउटा यस्तो अचम्मको पात्र बनेकी छु आफ्नै देशमा केही गर्छु भनेर कति जनालाई रोजीरोटी दिएर बसेको एउटा श्रमिकलाई ब्युटिपार्लरमा अनैतिक काम गर्छ भनेर राज्य नै लाग्यो । यसमा छानबिन समिति पनि गठन गरियो । सायद विश्वमा नै अहिलेसम्म यस्तो रेकर्ड छैन होला एउटा ब्युटिसियनलाई यत्रो केस लागेको । विसं २०८० सालमा मलाई लागेको थियो । यो केस गृहमन्त्रालयको एउटा कर्मचारीले जुन किसिमको मलाई आरोप लगाएको थियो, त्यो आरोपको प्रतिकार गर्दा मलाई एक वर्ष लाग्यो । उसले मलाई लगाएका मिथ्या आरोप पुष्टि हुन सकेनन् । यतिसम्म भनिएको कि नेकेट भिडियो बनाएर बेच्छ समेत भनियो । उसले मलाई एघारवटा मुद्दा लगाएको थियो । यी मुद्दामा म आफैं गएर उपस्थित भएर त्यसको प्रतिकार गरेँ । यी मुद्दामा मैले एउटा वकिल लगाउँथे भने उसले आठदेखि १० वटा वकिल लगाउँथ्यो । यसरी मलाई चौतर्फी हमला गर्दा पनि म डगमगाइनँ । किनकि नखाएको विष लाग्दैन भन्ने मलाई थियो । पूरै राज्य नै लाग्दा पनि आजको दिनमा मैले सबै मुद्दा जितँे । उनीहरूले गरेकोलाई पदीय दुरूपयोग भनेर अदालतले पनि लेखिदियो । आफ्नो देशमा नै केही गर्छु भन्ने मान्छेलाई अरू देशमा त अवार्ड पो दिन्छन्, कति सम्मान पो गर्छन् तर यहाँ त यस्तो छ के । यस्तै भयो भने के होला हाम्रो देश भन्ने लाग्छ ।

यहाँले हाम्रो कला, संस्कार र संस्कृतिको जगेर्ना गर्ने उद्देश्यले पनि विभिन्न कार्यक्रम गरेको पाइन्छ नि ?
मलाई के लाग्छ र सत्य पनि के हो भने त्यो देशको मूल सम्पत्ति नै भाषा, साहित्य, संस्कार, कला र संस्कृति हो । मैले पनि यसको संरक्षण र संवद्र्धनमा सकेजति आफूलाई उभ्याउने कोसिस गरेकी छु । हरेक चाडबाडमा कल्चर थिममा कति वटा फोटो सुट गरिरहेकी हुन्छु । भोलिको पुस्ता विकृतितर्फ उन्मुख नहोस् भनेर हामी सचेत हुनुपर्छ भन्ने लाग्छ । मैले पनि त्यही आफ्नो कर्तव्य पूरा गरिरहेकी हुँ । आफूलाई माया गर्ने एकपल्ट मर्छ देशलाई माया गर्ने घरी-घरी मर्छ भनिन्छ । सायद ममा पनि त्यो लागू हुन्छ । धेरैचोटि मरेर बाँचेकी छु । माथिका यस्ता आरोप लगाउँदा मलाई ज्युँदै मारेको जस्तो भयो नि होइन र ? हिजोको दिनमा काठमाडौं मलमा अध्यक्ष हुँदा यहाँ भएको अनियमितताका विषय बाहिर ल्याउँदा मलाई ज्यान मार्ने धम्कीहरू आए, विभिन्न व्यक्तिहरू परिचालित भए । तर, म आफू कति डगमगाइकन अघि बढेँ ।

महिला भएकै कारण केही समस्या खेप्नुभएको छ कि ?
निकै खेपेकी छु नि । राइट बोल्दा पनि पोथी बास्यो भन्छ यो समाजले । अझै पनि त्यस्तो बोली आउँछ । काम गर्न गाह्रो नै छ । यति धेरै भोग्दै गर्दा पनि मलाई धेरै कुरा समाजले दिएको छ । अजम्बरी कोही छैन मर्न त एकदिन छँदै नि तर जति बाँचिन्छ राम्रो काम गरौँ, देशका लागि केही गरौँ भन्ने नै हो । जस्तोसुकै बाधा अड्चन आए पनि त्यसलाई फेस गर्ने हिम्मत छ ममा । हरेक चुनौती पार गरेर अघि बढ्छु ।

धेरैतिर व्यस्त हुनुहुन्छ, समयको व्यवस्थापन कसरी गर्नुहुन्छ, सोसियल मिडियामा पनि सक्रिय देखिनुहुन्छ ?
सबैभन्दा ठूलो कुरा मानिसको इच्छा हो । इच्छा भयो भने सबै सम्भव हुन्छ । तपाईंमा ती चिजमा लगाव छ भने त्यो भइहाल्छ । खाली भएको बेला श्रीमान् र छोरालाई समय दिन्छु ।

जीवन के रहेछ ?
जीवन संघर्ष हो । संघर्षभित्र पारिवारिक विश्वास हुनुपर्छ । उहाँहरूले दिएको विश्वासमा हामी खरो उत्रनुपर्छ ।

राजनीतितिर पनि आउने सोच बनाउनुभएको छ कि ?
तत्काललाई त त्यस्तो सोच बनाएको छैन । हेरौँ आवश्यकता महसुस भयो भने त्यतिबेला सोच्न सकिन्छ । समयको माग भयो भने त्यसलाई नकार्न सकिँदैन । हाललाई भने त्यस्तो सोच बनाएकी छैन । एउटा सचेत नागरिकको कर्तव्य समाजलाई कसरी सही मार्गमा अघि बढाउने भन्ने पनि हुन्छ ।

अन्त्यमा ?
हामीले १७औँ वार्षिकोत्सव मनाइरहँदा अझ बढी जिम्मेवारी र कर्तव्य बोधका साथ अघि बढिरहेका छौँ । विदेशिनु नपरोस् देशमै केही गरौँ भन्ने अभिप्रायले हामीले आफूलाई अघि बढाइरहेका छौँ । आफ्नो कामलाई माया गरौँ, कला संस्कृतिलाई माया गरौँ । सत्यको पछि अडिग भएर लागौँ । कसैमाथि मिथ्या आरोप लगाउनुभन्दा अगाडि दशपल्ट सोचौँ भन्न चाहन्छु । कसैलाई अनाहकमा आरोप नलगाऔँ । देशलाई छातीमा राखेर अघि बढौँ भन्न चाहन्छु ।