आइल बनी कप जिते, रे बौआ सब जिते

काठमाडौं । ‘आइल बनी कप जिते, रे बौआ, सब जिते, पूरा जग जिते’ अर्थात् अहिले हामीले कप जित्यौँ, ए बाबु सब जित्यौँ, संसार जित्यौँ । यो जनकपुर बोल्ट्सको एन्थम हो । जुन घरेलु क्रिकेट इतिहासको अहिलेसम्मकै ठूलो फ्रेन्चाइज नेपाल प्रिमियर लिग (एनपिएल) सुरु हुनुअघि नै सार्वजनिक गरिएको थियो । नभन्दै एनपिएलको पहिलो उपाधि पनि जनकपुर बोल्ट्सले जितेको छ । कीर्तिपुरस्थित त्रिवि क्रिकेट मैदानमा भएको ‘हाई स्कोरिङ’ फाइनलमा सुदूरपश्चिम रोयल्सलाई ५ विकेटले हराउँदै जनकपुरले पहिलो उपाधि जितेको हो ।

सुदूरपश्चिमले दिएको १८४ रनको लक्ष्य जनकपुरले १९.२ ओभरमा पाँच विकेट गुमाएर पूरा गर्‍यो । उपाधि जितेसँगै जनकपुरले एक करोड १० लाख रुपैयाँ हात पारेको छ । यो नेपाली खेलकुद इतिहासमा अहिलेसम्मकै सबैभन्दा ठूलो पुरस्कार राशि हो । उपाधि जनकपुरले जित्दा सुदूरपश्चिम उपविजेतामा सीमित भएको छ । उपविजेता भएको सुदूरपश्चिमले ५१ लाख रुपैयाँ पाएको छ । त्रिवि क्रिकेट मैदानमा आयोजित समारोहमा पूर्व-प्रधानमन्त्रीद्वय पुष्पकमल दाहाल ‘प्रचण्ड’ र शेरबहादुर देउवाले विजेता ट्रफी हस्तान्तरण गर्नुभएको थियो ।

जनकपुरलाई जिताउन लहिरु मिलन्थाले सर्वाधिक ८७ रन बनाउनुभयो । ४९ बल खेल्नुभएका उहाँले नौ चौका र चार छक्का प्रहार गर्नुभयो । उहाँ प्लेयर अफ दी म्याच घोषित हुनुभयो । त्यसैगरी, आसिफ शेखले ३३ रन जोड्नुभयो । १९ बल खेल्नुभएका उहाँले चार चौका र दुई छक्का प्रहार गर्नुभयो । यसैगरी, हर्ष ठाकेर ३० र मयन यादव २ रनमा नटआउट रहनुभयो । २४ बल खेल्नुभएका ठाकेरले दुई छक्का प्रहार गर्नुभयो । त्यसअघि मोहम्मत मोसिन ९ र आकाश त्रिपाठी २ रन बनाएर आउट हुनुभएको थियो । सुदूरपश्चिमका स्कट कुग्लेइन, दीपेन्द्रसिंह ऐरी, सैब जैब र इशान पाण्डेले एक÷एक विकेट लिनुभयो ।

त्यसअघि सैफ जैब र विनोद भण्डारीको शतकीय साझेदारीपछि टस जितेर पहिला ब्याटिङ गरेको सुदूरपश्चिमले ९ विकेट गुमाई १८४ रन बनाएको थियो । जैब र विनोदले पहिलो विकेटमा १२ ओभरमा ११७ रन जोडेपछि सुदूरपश्चिमले विशाल स्कोर बनाएको थियो । जैबले ३३ बलमा अर्धशतक पूरा गरेपछि सुदूरपश्चिमले पहिलो १० ओभरमा बिनाक्षति ९७ रन बनाएको थियो । जैबले ४३ बल खेली ८ चौका र २ छक्का प्रहार गर्नुभयो । विनोदले ३१ बल खेली १ चौका र ३ छक्कासहित ४१ रन बनाउनुभयो । हरमित सिंह ८ बलमा १ छक्का प्रहार गर्दै १४ रनमा आउट हुनुभयो । जिम्मी निसमले १२ बल खेली १ छक्का प्रहार गर्दै १४ रन बनाउनुभयो । ७ बल खेल्नुभएका दीपेन्द्र ९ र आरिफ १ रनमा आउट हुनुभयो । स्कट कुग्लेन १० बलमा २ चौका प्रहार गरी १३ रनमा आउट हुनुभयो । जनकपुरका किशोर र मोहसिनले ३–३ विकेट लिनुभयो । ललित राजवंशीले चार ओभरमा एक मेडन राख्दै १५ रन मात्र खर्चेर एक विकेट लिनुभयो । निसमले चार ओभरमा ४४ रन खर्चिएर एक विकेट लिनुभयो ।

सुदूरपश्चिमले जनकपुरलाई क्वालिफायर १ मा र जनकपुरले कर्णाली याक्सलाई क्वालिफायर २ मा पराजित गरी फाइनलमा पुगेका थिए । सुदूरपश्चिमले प्रतियोगितामा जनकपुरलाई दुईपटक पराजित गरी फाइनलमा पुगेको थियो । राउण्ड रोबिन लिग खेलमा सुदूरपश्चिमले जनकपुरमाथि ७२ रनको विजय हात पारेको थियो । सुदूरपश्चिमलाई १२३-९ को स्कोरमा रोके पनि जवाफमा आएको जनकपुर १२.१ ओभरमा ५१ रनमै अलआउट भएको थियो । यो स्कोर एनपिएलकै न्यून स्कोर रहृयो । मंसिर १५ देखि सुरु भएको प्रतियोगितामा राष्ट्रियस्तरका अधिकांश खेलाडी र क्रिकेट पावरहाउस राष्ट्र भारत, बेलायत, अष्ट्रेलिया सहितका अन्तर्राष्ट्रिय खेलाडी पनि सहभागी थिए । कुल आठ टिम सहभागी प्रतियोगितामा कर्णाली याक्स तेस्रो र चितवन राइनोज चौथो भएको थियो । तेस्रो हुने कर्णाली याक्सले २५ लाख रुपैयाँ तथा चौथो हुने चितवन राइनोजले १५ लाख रुपैयाँ पाएको छ ।

दीपेन्द्रलाई कार र ललितलाई मोटरसाइकल
सुदूरपश्चिम रोयल्सका कप्तान तथा मार्की खेलाडी दीपेन्द्रसिंह ऐरीले कार जित्नुभएको छ । प्रतियोगितामा नौ खेलमा २२७ रन र नौ विकेट लिनुभएका उहाँले ओमोडा कार जित्नुभएको हो । सारडा समूहले एनपिएलकै उत्कृष्ट हुने नेपाली खेलाडीलाई ओमोडा ई ५ कार दिने घोषणा गरेको थियो । नेपाल क्रिकेट संघ, ब्राण्ड डिजिटल लजिक प्रालि र शारदा ग्रुपले मिलेर दिएको कारको मूल्य ६१ लाख ९९ हजार रुपैयाँ रहेको छ । दीपेन्द्र टी-२० क्रिकेटमा विश्वका नम्बर २ अलराउण्डर हुनुहुन्छ ।

ADVERTISEMENT

यसैगरी, लिग विजेता जनकपुर बोल्ट्सका ललितनारायण राजवंशी प्रतियोगिताकै ब्यालिष्टिक बलर बन्नुभएको छ । प्रतियोगितामा कुल १७ विकेट लिनुभएका उहाँले मोटरसाइकल जित्नुभयो ।

विपिन शर्मा उदीयमान खेलाडी
कर्णाली याक्सका विपिनप्रसाद शर्मा एनपिएलको उदीयमान खेलाडी घोषित हुनुभएको छ । उहाँले ५० हजार नगद र एक लाख बराबरको छात्रवृत्ति पाउनुभएको छ । ट्यालेन्ट हण्टबाट छनोट भएर कर्णालीबाट एनपिएल खेल्नुभएका विपिनले आठ खेलमा १३ विकेट लिनुभएको थियो । म्याक्सिमम चौका अवार्ड लाहिरु मिलान्थाले पाउनुभयो । फेयर प्ले अवार्ड लुम्बिनी लायन्स टिमले प्राप्त गरेको छ । खेल अवधिभर अनुशासित खेल प्रदर्शन गरेको टोलीलाई उक्त पुरस्कार दिइन्छ ।

लाहिरु मिलान्था उच्च स्कोरर
जनकपुर बोल्ट्सका लाहिरू मिलान्था एनपिएल क्रिकेटको पहिलो सिजनमा उच्च स्कोरर बन्नुभएको छ । फाइनलमा सुदूरपश्चिम रोयल्सविरुद्ध निर्णायक इनिङ्स खेलेपछि मिलान्थाले रवि बोपारा, रोहित पौडेललाई उछिन्नुभएको हो । फाइनलको दोस्रो इनिङ्स अगाडि सर्वाधिक रन बनाउनेमा मिलान्थाभन्दा माथि चितवन राइनोजका बोपारा, लुम्बिनी लायन्सका कप्तान रोहित, सुदूरपश्चिमका सैफ जैब, जनकपुरकै जिम्मी निशम र सुदूरपश्चिमका विनोद भण्डारी अगाडि हुनुहुन्थ्यो ।

निशम ‘एनर्जेटिक प्लेयर’ र सैफ ‘प्लेयर अफ द टुर्नामेन्ट
न्युजिल्याण्डका जिम्मी (जेम्स) निशम पहिलो संस्करणको एनपिएल लिगको ‘एनर्जेटिक प्लेयर अफ टुर्नामेन्ट’ बन्नुभएको छ । उहाँले दुई लाख नेपाली रुपैयाँ पुरस्कार पाउनुभयो । ब्याटिङ अलराउण्डर उहाँ बायाँहाते ब्याट्सम्यान र राइट आर्म मिडियम फाष्ट बलिङ गर्नुहुन्छ । प्रतियोगितामा उहाँले कुल २४७ रन बनाउनुभयो । सुदूरपश्चिम रोयल्सका सैफ जैब नेपाल प्रिमियर लिगकै ‘प्लेयर अफ द टुर्नामेन्ट’ बन्नुभयो । इंग्ल्याण्डका ब्याटिङ अलराउण्डर उहाँ बायाँहाते ब्याट्सम्यान र स्लो लेफ्ट आर्म अर्थोडक्स बलिङ गर्नुहुन्छ । एनपिएलमा २७५ रन बनाउनुभएका उहाँले १२ विकेटसमेत लिनुभयो ।

सबै खेलाडीको मिहिनेतले उपाधि जित्यौँ : शेख
जनकपुरका कप्तान आसिफ शेखले टिमका सबै खेलाडीको मिहिनेतले उपाधि जित्न सफल भएको प्रतिक्रिया दिनुभएको छ । उपाधि जित्दा आफूलाई निकै खुसी लागेको उहाँले बताउनुभयो । पहिलो एनपिएलको उपाधि जित्न पाउनु टिमका लागि ठूलो अवसर भएको उहाँले बताउनुभयो । ‘उपाधि जित्दा स्वाभाविक रूपमा खुसी लागेको छ । यो हाम्रो टिमको जित हो । सबै खेलाडीको जित हो । सबैले राम्रो खेल्नुभयो र उपाधि जित्न सफल भयौँ,’ उहाँले भन्नुभयो, ‘हामीले हाई स्कोरिङ म्याच हुन्छ भन्ने सोचेकै थियौँ र १८०÷९० रनको टार्गेट चेज गर्छौं भन्ने नै थियो । यो हाम्रो लागि ठूलो अवसर हो ।’

खेलमा हारजित हुन्छ, अर्कोपटक राम्रो गर्छौं : ऐरी
सुदूरपश्चिम रोयल्सका कप्तान दीपेन्द्रसिंह ऐरीले खेलमा हारजित स्वाभाविक हुने प्रतिक्रिया दिनुभएको छ । फाइनल खेलमा जनकपुरसँग स्तब्ध बनेपछि ऐरीले खेलमा हारजित स्वाभाविक हुने र त्यसलाई स्वीकानुपर्ने बताउनुभयो । ‘खेलमा हारजित हुन्छ । अर्कोपटक राम्रो गर्छौं,’ ऐरीले भन्नुभयो । यसैगरी, सुदूरपश्चिमका प्रशिक्षक जगत टमाटाले दुई सय रन बनाउनबाट चुक्दा उपाधि जित्न नसकेको बताउनुभएको छ । योजनाअनुसार खेले पनि अन्तिम पाँच ओभरमा कम रन बनाउँदा उपाधि जित्न नसकेको उहाँले बताउनुभयो । ‘योजनाअनुसार नै ब्याटिङ गइरहेको थियो । पावर प्लेमा राम्रो भइरहेको थियो,’ उहाँले भन्नुभयो, ‘लास्टको पाँच ओभरमा रन कमी भयो । विकेट हातमा थियो । रन अझै बनाउनु पथ्र्याे ।’ प्रशिक्षक टमाटाले उत्कृष्ट खेल खेलेकोमा जनकपुरलाई बधाईसमेत दिनुभयो ।