विचाराधीन विधेयक पेस गर्न सभामुखको निर्देशन

काठमाडौं । सभामुख देवराज घिमिरेले संसदीय समितिहरूमा विचाराधीन रहेका विधेयकलाई आगामी अधिवेशनमा पेस गर्न निर्देशन दिनुभएको छ । सिहंदरबारस्थित सभामुखको कार्यकक्षमा मंगलबार बसेको संसदीय समितिका सभापति र प्रमुख दलका प्रमुख सचेतक तथा सचेतकसँगको बैठकमा उहाँले सो निर्देशन दिनुभएको हो । बैठकमा सभामुख घिमिरेले भनेका कुरा उल्लेख गर्दै उद्योग तथा वाणिज्य र श्रम तथा उपभोक्ता हित समितिका सभापति अब्दुल खानले भन्नुभयो, ‘कुन समितिमा कति विधेयक छन् ? त्यसलाई पास गर्न कति समय लाग्छ ? भनेर सभामुखले चासो देखाउनुभएको छ ।’ बैठकमा समिति सभापतिहरूले संसद् अधिवेशन अन्त्य भएसँगै बैठक बस्न नसकेको जानकारी सभामुखलाई दिनुभएको थियो । सभापति खानले भन्नुभयो, ‘हामी समितिका सभापतिहरू अधिकांश सांसद गृहजिल्ला गएकाले बैठक बस्न कोरमसमेत नपुगेको कुरा सभामुखसँग राख्यौँ ।’

संसद्को आगामी अधिवेशनमा बिजनेसको अभाव हुन नदिनका लागि पनि संसदीय समितिमा विचाराधीन विधेयक टुंगोमा पु¥याउनुपर्ने सभामुखको भनाइ थियो । बैठकमा एमालेका मुख्य सचेतक महेश बर्तौला, कांग्रेस सचेतक सुशीला थिङ, माओवादी केन्द्रका प्रमुख सचेतक हितराज पाण्डे, राष्ट्रिय प्रजातन्त्र पार्टीका सचेतक बिना लामा सहभागी थिए। अर्थ समितिमा भन्सार विधेयक, बैंक तथा वित्तीय संस्थासम्बन्धी (पहिलो संशोधन) विधेयक, सुरक्षित कारोबार (पहिलो संशोधन) विधेयक, धितोपत्रसम्बन्धी (पहिलो संशोधन) विधेयक र आर्थिक कार्यविधि तथा वित्तीय उत्तरदायित्व (पहिलो संशोधन) विधेयक विचाराधीन छन् । उद्योग तथा वाणिज्य र श्रम तथा उपभोक्ता हित समितिमा विद्युतीय व्यापार विधेयक विचाराधीन रहेको छ । राज्यव्यवस्था तथा सुशासन समितिमा अख्तियार दुरुपयोग अनुसन्धान आयोग (तेस्रो संशोधन) विधेयक, निर्माणमुखी सामग्री (व्यवस्थापन तथा नियमन) विधेयक, भ्रष्टाचार निवारण (पहिलो संशोधन) विधेयक र संघीय निजामति सेवा विधेयक विचाराधीन रहेका छन् । त्यस्तै, शिक्षा, स्वास्थ्य तथा सूचना प्रविधि समितिमा विद्यालय शिक्षा विधेयक र शहीद दशरथ चन्द स्वास्थ्य विज्ञान विश्वविद्यालय विधेयक विचाराधीन छन् । कानुन, न्याय तथा मानव अधिकार समितिमा केही नेपाल ऐनलाई संशोधन गर्न बनेको विधेयक विचाराधीन रहेको छ भने पूर्वाधार विकास समितिमा जलस्रोत विधेयक र विद्युत् विधेयक विचाराधीन छन् ।

बैठकमा एमालेका मुख्य सचेतक महेश बर्तौला, कांग्रेस प्रमुख सचेतक श्यामकुमार घिमिरे, माओवादी केन्द्रका प्रमुख सचेतक हितराज पाण्डे, राष्ट्रिय स्वतन्त्र पार्टीका प्रमुख सचेतक सन्तोष परियार र राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीलाई बोलाइएको थियो ।

ADVERTISEMENT

बैठकमा सांसदहरू नआएको समिति सभापतिहरूको गुनासो
संसदीय समिति बैठक नियमित राख्नका लागि सांसदहरूको उपस्थित गराउन समस्या रहेको बारे संसदीय समितिका सभापतिहरूले सभामुख देवराज घिमिरेसमक्ष गुनासो गरेका छन् । मंगलबार सिंहदरबारस्थित सभामुखको कार्यकक्षमा भएको छलफलमा समितिको बैठक राख्न समस्या भएको बारे सभापतिहरूले सभामुख घिमिरेसमक्ष गुनासो गरेका थिए । बैठकमा सभामुखलाई समिति बैठक राख्नका लागि सांसदहरूको उपस्थिति गराउन समस्या रहेको, बैठकमा चिया खाजा खुवाउनसमेत समस्या रहेको गुनासो गरेका थिए । उद्योग समितिका सभापति अब्दुल खानले बैठकपछि भन्नुभयोे, ‘समिति बैठक अघि बढाउन सांसदहरूको कोरम पुर्‍याउन समस्या रहेको, चिया खाजा खुवाउने लगायतका समस्या राख्यौँ ।’ समिति बैठकमा सांसदहरूको उपस्थित बढाउन दलका प्रमुख सचेतकहरू मार्फत सांसदहरूलाई खबर गर्नेबारे छलफल भएको छ ।

बैठकपछि अर्थ समितिका सभापति सन्तोष चालिसेले अब सांसदहरूलाई खबर गरेर समितिका बैठकहरूलाई अगाडि बढाउने बताउनुभयो । उहाँले अर्थ समितिमा महत्वपूर्ण पाँचवटा विधेयक रहेको बताउनुभयो । यस्तै, चारवटा विधेयक राज्य व्यवस्था समितिमा विचाराधीन छन् । बैठकमा रास्वपाका प्रमुख सचेतक र सचेतक आएका थिएनन् ।