काठमाडौं । विवादमा अल्झिएर चुनाव अनिश्चित बनेपछि पत्रकारहरूको छाता संगठन नेपाल पत्रकार महासंघले राष्ट्रिय भेला बोलाएको छ । तोकिएको समयमा चुनाव हुन नसकेपछि महासंघको भविष्य नै संकटमा पर्ने देखिएपछि महासंघले राष्ट्रिय भेला बोलाएको हो । महासंघका कार्यवाहक अध्यक्ष बाला अधिकारीले राष्ट्रिय भेला बोलाइएको जानकारी दिनुभएको छ । निर्वाचनको मिति पटकपटक सारेको महासंघले असोज १९ गते जिल्ला तथा प्रदेश अध्यक्षहरूको राष्ट्रिय भेला भक्तपुरमा गर्ने जनाएको हो ।
कावा अध्यक्ष अधिकारीले जारी गर्नुभएको विज्ञप्ति अनुसार भौतिक तथा भर्चुअल माध्यमबाट केन्द्रीय समिति, प्रदेश अध्यक्ष र जिल्ला अध्यक्षहरूको परामर्श भेलाको निर्णय अनुसार असोज १९ गते जिल्ला तथा प्रदेश अध्यक्षहरूको राष्ट्रिय भेला गर्ने निर्णय गरेको हो । महासंघ असोज १२ गते तोकिएको निर्वाचन हुन नसक्ने परिस्थिति सिर्जना भएपछि उक्त भेला बोलाएको हो ।
सदस्यतामा देखिएको विवादका सन्दर्भमा २७औं महाधिवेशनबाट पारित शुद्धीकरण मापदण्डलाई आधार मानी केन्द्रीय समितिलाई दिशानिर्देशसहित विवाद समाधानमा सहजीकरण गर्न महासंघका पूर्वसभापति डा.सुरेश आचार्यको संयोजकत्वमा पूर्वसभापतिद्वय तारानाथ दाहाल, विष्णु निष्ठुरी तथा पूर्वअध्यक्षहरू धर्मेन्द्र झा, शिव गाउँले, डा.महेन्द्र विष्ट र गोविन्द आचार्यलाई आग्रह गर्ने निर्णय गरिएको छ ।
ADVERTISEMENT
बैठकले अध्यक्ष विपुल पोख्रेल र कार्यवाहक अध्यक्ष रमेश विष्टले दिएको राजीनामालाई अनुमोदन गरेको छ । समयमा निर्वाचन सम्पन्न गरी नेतृत्व हस्तान्तरण गर्नुपर्ने बेलामा नेतृत्वपंक्तिबाट सिलसिलेवार राजीनामा दिनुले अन्यौलता सिर्जना भएको छ । महासंघले गत जेठ २६ गते, असार २२ र असोज ५ गते तीन-तीनपटक निर्वाचनको मिति घोषणा गरिए पनि तोकिएको मितिमा निर्वाचन हुन नसक्ने दुःखद् परिस्थितिको सिर्जना हुनु चिन्ताको विषय रहेको विज्ञप्तिमा उल्लेख छ ।
विज्ञप्तिमा भनिएको छ, ‘जतिसुकै विषम परिस्थिति भए पनि निष्क्रिय हुने, मूक दर्शक भएर बस्ने र सदा अन्यौलमा नै रहने छुट हामीलाई छैन । कुनै हालतमा किंकर्तव्यबिमूढ यो अवस्थाबाट मुक्त भएर महासंघलाई विधानसम्मत मार्गमा लागि निर्वाचन प्रक्रियामार्फत नयाँ नेतृत्व चयन गर्ने काम नै अहिलेको पहिलो प्राथमिकता हो । हामीले विगतमा जे जति कमीकमजोरी गरेका छौं, तिनबाट भविष्यका लागि पाठ सिक्दै महासंघलाई साझा संस्थाको रूपमा यसको स्वीकार्यता बढाउन जरुरी छ । यसका लागि जहाँ जसबाट जे जस्ता कमीकमजोरी भएका छन् महासंघको संरचनादेखि महासंघको संरचनागत कामहरूमा महत्वपूर्ण सरोकार राख्ने सबैबाट कमीकमजोरी सच्याएर सहमतिको मार्ग अवलम्बन गर्दा नै महासंघको साख बढ्ने कुरामा मेरो विश्वास छ । यसका लागि एकपटक फेरि हामी सबैले शान्त दिमागले सोचेर सबैको भावनालाई समेट्दै महासंघको गरिमालाई बढाउन विधिसम्मत नेतृत्व हस्तान्तरणको लागि निर्वाचन गराउने वातावरण बनाउन जरुरी छ ।’
१९ गते हुने भेलाले केन्द्रीय समितिका कामको समीक्षासहित एउटा विधिलाई टेकेर सदस्यता विवादलाई निरुपण गर्दै निर्वाचनको मिति तोकेर निर्वाचनको वातवरण बनाउने बताइएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
राजनीतिक नेतृत्व अभिभावक बन्ने कि
नेपाली राजनीति र वाराणसीका पण्डा