केजरीवालको हिरासत बसाई लम्बियो

भारतको दिल्लीका मुख्यमन्त्री अरविन्द केजरीवाललाई त्यहाँको एक अदालतले थप पाँच दिन हिरासतमा राख्न अनुमति दिएको छ । यसअघि अदालतले उनलाई दश दिन हिरासतमा राख्न अनुमति दिएको थियो । सो म्याद बिहीबार सकिएको थियो । केजरीवाललाई मदिराको नीतिमा घोटाला गरेको भन्दै भारतको प्रवर्तन निर्देशनालय (ईडी) ले पक्राउ गरेको हो । अदालतले केजरीवाललाई थप पाँच दिन ईडीको हिरासतमा राख्न अनुमति दिएको भारतीय सञ्चारमाध्यमहरूले जनाएका छन् ।

बिहीबार अदालतमा केजरीवालले आफूलाई किन पक्राउ गरिएको हो भन्दै प्रश्न गरेका थिए । तर, ईडीका अधिकारीहरूले सोधपुछमा केजरीवालले सहयोग नगरेको बताएका थिए । यसैबीच, केजरीवाललाई मुख्यमन्त्रीबाट हटाउन भन्दै दिल्ली उच्च अदालतमा दायर रिट खारेज भएको छ । केजरीवालले हिरासतबाटै सरकार चलाइरहनुभएको छ ।

लोकसभा चुनाव घोषणा भइसकेको स्थितिमा विपक्षी नेताहरूमध्येका बलिया र चर्चित व्यक्ति केजरीवालको गिरफ्तारीले विपक्षी गठबन्धनलाई धक्का पुग्ने बताइएको छ । १९ अप्रिलबाट १ जुनसम्म सात चरणमा भारतमा लोकसभाको १८औं चुनाव हुँदै छ । देश चुनावमा होमिएका बेला विपक्षी गठबन्धन ‘इण्डिया’ का एकजना प्रभावशाली नेता केजरीवाल पक्राउ परेका हुन् । दुई महिनाको अन्तरालमा भ्रष्टाचारको आरोपमा पक्राउ पर्नेमा केजरीवाल विपक्षी गठबन्धनका दोस्रो बहालवाला मुख्यमन्त्री हुन् । झारखण्डका मुख्यमन्त्री हेमन्त सोरेनलाई ईडीले केही समय अगाडि उनको राँचीस्थित सरकारी निवासबाटै नियन्त्रणमा लिएको थियो । सन् २०११ मा भारतमा तरंग ल्याउने गरी सन् २०११ मा भ्रष्टाचारविरोधी अभियान सुरु गरेका केजरीवालको गिरफ्तारी देशमा संसद्को निर्वाचनको मिति घोषणा भइसकेपछि भएको छ ।

यो पनि पढ्नुहोस्

विद्युत् आयात सम्झौता : आशाको दियो निभ्नु भएन

ADVERTISEMENT

सत्तारूढ भारतीय जनता पार्टी (भाजपा) लाई चुनौती दिँदै २७ वटा दलले निर्माण गरेको ‘इण्डिया’ गठबन्धनमा आप पनि सहभागी छ । नयाँ दल भए पनि एक दशकभन्दा केही बढी समयमा आप एउटा बलियो शक्तिका रूपमा स्थापित भएको थियो । उसले सन् २०१३ यता दिल्लीमा विधानसभाको चुनावमा एकपछि अर्को सफलता हासिल गरेको छ, अनि संघीय सरकारविरुद्ध असन्तुष्टि रहेको पञ्जावमा पनि आफ्नो प्रभाव विस्तार गरेको छ । आपले आगामी निर्वाचनमा दिल्लीका सातवटा संसदीय क्षेत्रमध्ये चारवटामा प्रतिस्पर्धा गर्न लागेको छ । सन् २०१९ मा उसले सबै सात सिटमा बीजेपीसँग हार खेपेको थियो । तर, सन् २०२० मा विधानसभाको निर्वाचनमा दिल्लीका ७० मध्ये ६२ सिट जितेको थियो । सोरेनमाथि सरकारी जमिन खरिद बिक्रीमा भ्रष्टाचार गरेको आरोप छ ।

मदिरासम्बन्धी नीति ल्याएर भ्रष्टाचार गरेको आरोपमा ईडीले केही समयदेखि केजरीवाललाई सोधपुछका लागि बोलाउँदै आएको थियो । एक साताअगाडि मात्रै ईडीले केजरीवाललाई १०औं पटक बोलाएको थियो । तर, दिल्लीका मुख्यमन्त्री केजरीवाल ईडीको विरुद्ध दिल्ली उच्च अदालत जानुभएको थियो । तर, अदालतले बयानका लागि जान नपर्ने केजरीवालको माग अस्वीकार गरेपछि ईडीका अधिकारीहरू गत बिहीबार केजरीवालको गिरफ्तारीको तयारीसहित उहाँको निवास पुगेका थिए । मदिरासम्बन्धी नीति ल्याएर दिल्ली सरकारले भ्रष्टाचार गरेको आरोपमा दिल्लीका उपमुख्यमन्त्री मनीष सिसोदिया र राज्यसभा सांसद सञ्जय सिंह यसअघि नै हिरासतमा छन् । दिल्ली सरकारले तीन वर्षअघि मदिरा बिक्रीसम्बन्धी नयाँ नीति ल्याएको थियो । त्यही नीतिलाई दिल्लीमा विपक्षीको भूमिकामा रहेको भारतीय जनता पार्टीले ‘नीति घोटाला’ भन्दै केजरीवाल सरकारलाई घेर्दै आएको छ । २०२१ अगाडि दिल्लीमा मदिराको बिक्रेतामा ६० प्रतिशत सरकारी र ४० प्रतिशत निजी कारोबारी थिए । तर, केजरीवाल सरकारले नयाँ नीति ल्याएर मदिरा बिक्री वितरणको सम्पूर्ण जिम्मा निजी क्षेत्रलाई दिएको थियो ।

यही प्रकरणमा दिल्ली सरकारमाथि सय करोडभन्दा बढी भ्रष्टाचार गरेको आरोप छ । त्यसमा भ्रष्टाचारको आरोप र विवाद बढेपछि केजरीवाल सरकारले एक वर्षपछि उक्त नीति फिर्ता लिएको थियो । ईडीले सोही प्रकरणको छानविन गर्दै आएको छ । मुख्यमन्त्री केजरीवाल र आम आदमी पार्टी (आप) ले भने ईडीको कारबाहीलाई भाजपा निर्देशित भएको आरोप लगाउँदै आएका छन् । भाजपा नेतृत्वको केन्द्रीय सरकारले सरकारी जाँच एजेन्सीका अन्य दल र नेताविरुद्ध प्रयोग गरेको आरोप लगाएका छन् । चुनावभन्दा अगाडि विपक्षी पार्टीको आवाज कमजोर गर्न भाजपाले षड्यन्त्र गरिरहेको आपका नेताहरूले बताएका छन् ।

यसैबीच केजरीवालका गुरु अन्ना हजारेले पनि उनको गिरफ्तारीबारे बयान दिइसकेका छन् । आफनो बयानमा केजरीवालका गुरु भनिने अन्ना हजारेले केजरीवालले आफ्नो कर्मको सजाय भोगिरहेको बताएका छन् । मदिरा नीतिका कारण यो सबै भएको अन्नाले बताएका छन् । ‘केजरीवालले मसँगै मदिराको विरुद्धमा आवाज उठाउनुहुन्थ्यो तर अहिले मदिरामा नीति बनाइरहेका छन्,’ उनले भने । अन्नाले आफ्नो गाउँ रालेगन सिद्धिबाट जारी गरेको विज्ञप्तिमा केजरीवालजस्ता व्यक्तिले आफूसँग काम गरेकोमा दुःख लागेको बताएका छन् ।